تۇركىستاندى اباتتاندىرۋعا اۋداندار كومەكتەسۋدە

ايماقتار • 20 قاراشا، 2020

تۇركىستاندى اباتتاندىرۋعا اۋداندار كومەكتەسۋدە

7 رەت كورسەتىلدى

ارىس تاجىريبەسىن نەگىزگە الا وتىرىپ، 32 سەكتورعا بولىنگەن تۇركىستان قالاسىندا جىل باسىنان بەرى اباتتاندىرۋ جۇمىستارى قىزۋ جۇرگىزىلۋدە، دەپ حابارلايدى Egemen.kz.

جىبەك اعداري

بىرقاتار سەكتورلاردىڭ جۇمىسىن ارالاعان وبلىس اكىمى ومىرزاق شوكەەۆكە اۋدان باسشىلارى اتقارىلعان جۇمىس بارىسى جونىندە باياندادى.

مىسالى، ورداباسى اۋدانىنا 13 كوشە، تولەبي اۋدانىنا 11 كوشە جانە تۇلكىباس اۋدانىنا 9 كوشە بەكىتىلگەن. 8 شاقىرىمعا سوزىلعان كوشەلەرگە اعاش، گازون ەگۋ جانە تامشىلاپ سۋعارۋ جۇيەسىن ورناتۋ جوسپارلانعان. جوسپارلانعان 12 مىڭعا جۋىق كوشەتتىڭ 96،2%-ى وتىرعىزىلعان. قاراشا ايىنىڭ اياعىنا دەيىن تەرەك، ۇيەڭكى، ءىرى جاپىراقتى قاراعاش، ارشا اعاشى مەن راۋشان گۇلدەرى ەگىلەدى.

تۇلكىباستىقتار وزدەرىنە بەكىتىلگەن سەكتوردا سەنبىلىك وتكىزىپ، 9 كوشەنى تازالادى. 7 مىڭ ءتۇپ جاسىل جەلەك پەن گازون ەگىلدى. سونداي-اق، ورتالىق داستانوۆ كوشەسىنە جاڭادان سۋارۋ جۇيەسى ورناتىلدى.

سايرام اۋدانىنىڭ سەكتورىندا 8،48 شاقىرىمدى قۇرايتىن 9 كوشەدە 7655 كوشەت وتىرعىزىلدى. اۋدانعا بەكىتىلگەن №2 سەكتوردا تۇراقتى تۇردە سەنبىلىك جۇمىستارى ۇيىمداستىرىلىپ، جەردى تەگىستەۋ، شۇڭقىر قازۋ، كوشەت ەگۋ جۇمىستارى جۇرگىزىلدى. قازىلعان ۇياشىقتارعا توپىراق سالىنىپ، كوشەت تامىرىن ىلعالداندىراتىن گيدروگەل جانە توپىراقتى قوپسىتۋ ءۇشىن بيوگۋمۋس سەبىلۋدە. سونىمەن قاتار، كوشەتتەردى سۋعارۋ جۇيەسى جۇرگىزىلىپ، گازون ەگىلەدى.

شاردارا اۋدانىنا بەكىتىلگەن اۋماقتا دا كوشەتتەر وتىرعىزىلىپ، گۇلدەر ەگىلگەن. اينالا كۇل-قوقىستان تازارتىلىپ، ءتيىستى جۇمىستار قارقىندى جۇرۋدە.

تۇركىستان قالاسىن كوگالداندىرۋعا تولەبي اۋدانى دا اتسالىسىا جاتىر. اۋدان باسشىسىنىڭ باقىلاۋىمەن، 7354 اعاش كوشەتتەرىن ەگۋ، كوشەتتەردى سۋعارۋ ءۇشىن 12 119 مەتر تامشىلاتىپ سۋعارۋ جۇيەسىن جۇرگىزۋ جانە 5 دانا ۇڭعىما قازۋ جۇمىستارى اتقارىلۋدا. بۇل باعىتتاعى جۇمىستار ءوز جالعاسىن تاۋىپ، قالا اۋماعىندا 7 مىڭنان استام ارشا، تەرەك، قارا اعاش كوشەتتەرى وتىرعىزىلماق.

شاھاردى كوگالداندىرۋ اۋماعى 187 گا قۇرايدى. ساياباقتاردى جايقالتىپ، گۇلزارلاردى كوركەيتۋ، جەلەكجولدار مەن تۇرعىن ءۇي ورامدارىن، قوعامدىق عيماراتتاردى كوگالداندىرۋ ىسكە اسىپ جاتىر.

قالانىڭ كليماتتىق جاعدايىن ەسكەرە وتىرىپ، قالا سىرتىندا كوگالداندىرۋدىڭ ۇزدىكسىز جۇيەسىن جانە سىرداريا وزەنىنىڭ تابيعي وسىمدىكتەر دۇنيەسىمەن قوسىلۋدى قامتاماسىز ەتەتىن جاسىل بەلدەۋدى قالىپتاستىرۋ كوزدەلگەن.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز