2020 جىلعى 1 قاڭتاردان باستاپ قازاقستان رەسپۋبليكاسى پرەزيدەنتىنىڭ جارلىعىمەن ەلىمىزدە شاعىن بيزنەس پەن ميكروكاسىپكەرلىكتى تەكسەرۋگە 3 جىلدىق موراتوري ەنگىزىلدى.
حالىقتىڭ ءومىرى مەن دەنساۋلىعىنا, قورشاعان ورتاعا, زاڭدىلىق پەن قوعامدىق تارتىپكە ىقتيمال جاپپاي قاتەر توندىرەتىن, كونستيتۋتسيالىق قۇرىلىس پەن ۇلتتىق قاۋىپسىزدىككە تىكەلەي قاتەر توندىرەتىن بۇزۋشىلىقتاردىڭ الدىن الۋعا نەمەسە ولاردى جويۋعا باعىتتالعان تەكسەرۋلەر عانا بۇل ساناتقا جاتپايدى.
اتالعان تەكسەرۋلەر ورتالىق مەملەكەتتىك نەمەسە جەرگىلىكتى اتقارۋشى ورگاننىڭ ءبىرىنشى باسشىسىنىڭ شەشىمى بويىنشا تاعايىندالىپ, قۇقىقتىق ستاتيستيكا جانە ارنايى ەسەپكە الۋ ورگاندارىندا مىندەتتى تۇردە تىركەلۋى ءتيىس. ەگەر تەكسەرۋ وسى تالاپتارعا جاۋاپ بەرمەسە, كوميتەت تەكسەرۋدى تىركەۋ بارىسىندا بيزنەسكە قاتىستى نەگىزسىز ارالاسۋعا جول بەرمەيدى.
مىسالى, موراتوري بەلگىلەگەن تىيىمعا قاراماستان, الماتى قالاسى الاتاۋ اۋدانىنىڭ سانيتارلىق باقىلاۋ ورگاندارى «جان بوپە» جشس-ءنىڭ قىزمەتىن تەكسەرۋدى تاعايىندادى. كاسىپكەرلىك سۋبەكتىلەرىنىڭ تىزىلىمىنە سايكەس وسى جشس ميكروكاسىپكەرلىك ساناتىنا جاتادى جانە وعان موراتوري شەكتەۋلەرى قولدانىلادى. كوميتەت بۇل تەكسەرۋدى تىركەۋدەن باس تارتتى.
تاعى دا ءبىر نەگىزسىز تەكسەرۋدى «EMARAT» جشس-كە قاتىستى يندۋستريالىق دامۋ جانە ونەركاسىپتىك قاۋىپسىزدىك كوميتەتىنىڭ الماتى قالاسى بويىنشا دەپارتامەنتى تاعايىنداۋعا تىرىسقان. موراتوري كەزەڭىندە تەكسەرۋ جۇرگىزۋ ءتارتىبىن بۇزعانى ءۇشىن مەملەكەتتىك ورگانداردىڭ لاۋازىمدى تۇلعالارى قر اقبتك-ءنىڭ 175-بابى بويىنشا اكىمشىلىك جاۋاپكەرشىلىككە تارتىلدى.
ەگەر ءسىز تەكسەرۋشى ورگانداردىڭ قىزمەتكەرلەرى تاراپىنان زاڭسىز ارەكەتتەرگە تاپ بولساڭىز, مىنا تەلەفون ءنومىرى بويىنشا حابارلاۋىڭىزدى سۇرايمىز: 115 - باس پروكۋراتۋرانىڭ call-ورتالىعىنىڭ بىرىڭعاي ءنومىرى, ول بويىنشا اقپارات الۋعا جانە تەكسەرۋشىلەردىڭ ارەكەتتەرىنە شاعىمدانۋعا بولادى.
سونىمەن قاتار, تەكسەرۋ تاعايىندالعان كەز كەلگەن كاسىپكەر www.qamqor.gov.kz اقپاراتتىق سەرۆيسىندە ءتيىستى جولعا اكت ءنومىرىن ەنگىزۋ ارقىلى تەكسەرۋدىڭ زاڭدىلىعىن تەكسەرە الادى. سول جەردە ورگاننىڭ اتاۋى, تەكسەرۋ كەزەڭى, تەكسەرۋشى تۇلعا تۋرالى دەرەكتەر شىعادى. ەگەر اقپارات بولماسا, وندا تەكسەرۋ پروكۋراتۋرا ورگاندارىندا تىركەلمەگەن, ياعني ول – زاڭسىز.
