ايتىستى اشىپ بەرگەن اباي اتىنداعى قازۇپۋ رەكتورى, ايتىس جاناشىرى تاكير بالىقباەۆ ورازالىنىڭ شىعارماشىلىعىن ناسيحاتتاۋ ماقساتىندا ۇيىمداستىرىلعان بارلىق شاراعا قولداۋ كورسەتەتىن جانە الداعى جىلى جىر الىبى جامبىل جاباەۆتىڭ 175 جىلدىعىنا وراي حالىقارالىق ستۋدەنتتەر ايتىسىن وتكىزۋدى جوسپارلاپ وتىرعانىن ايتتى.
شارانىڭ باسىندا ءسوز العان قازاقستاننىڭ ەڭبەك سىڭىرگەن قايراتكەرى, اقىن ءجۇرسىن ەرمان ءتول ونەرىمىزگە قولداۋ كورسەتىپ وتىرعان ۋنيۆەرسيتەت رەكتورى باستاعان ۇجىمعا العىسىن ايتىپ, جاس شايىرلارعا باتاسىن بەردى. ونلاين ايتىستىڭ بارىسىندا اتالعان وقۋ ورداسىنىڭ باسپاسىنان شىققان ۋنيۆەرسيتەت جاستارىنىڭ «كوكتەم عۇمىر» اتتى جىر-جيناعىنىڭ تۇساۋى كەسىلدى. ايتىستىڭ العاشقى جۇبى بولىپ ايتىسقان قاينار اكادەمياسىنىڭ ستۋدەنتى راسۋل ساۋىتبەك پەن اباي اتىنداعى قازۇپۋ-دىڭ ءبىرىنشى كۋرس ستۋدەنتى التىناي قاناپيا زالعا كەلىپ قىز بەن جىگىت ايتىسىنىڭ تاماشا ۇلگىسىن كورسەتتى. قالعان ءتورت جۇپ ونلاين رەجىمىندە ءسوز قاعىستىردى.
جاس ايتىسكەرلەرگە «ايتىس اقىندارى مەن جىرشى-تەرمەشىلەر حالىقارالىق وداعى» رقب باسقارما توراعاسى اقىن ءجۇرسىن ەرمان, «انا ءتىلى» گازەتىنىڭ باس رەداكتورى اقىن جاناربەك ءاشىمجان, «بالدىرعان» جۋرنالىنىڭ باس رەداكتورى دۇيسەن ءمۇسىرالى, حالىقارالىق, رەسپۋبليكالىق ايتىستاردىڭ جۇلدەگەرى اقىن سەرىك قاليەۆ, اباي اتىنداعى قازۇپۋ پروفەسسورى, فيلولوگيا عىلىمدارىنىڭ دوكتورى تەمىرحان تەبەگەنوۆ قاتارلى ءسوز ۇستالارى قازىلىق ەتتى.
جىر بايگەسىندە دارالانىپ العا شىققان ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتى نۇربول جاۋىنباەۆ باس جۇلدەنى جەڭىپ الدى. (100 000 تەڭگە). قىز بەن جىگىت ايتىسىنىڭ تاماشا ۇلگىسىن كورسەتكەن اباي اتىنداعى قازۇپۋ ستۋدەنتى التىناي قاناپيا ءبىرىنشى ورىن يەلەنسە (80 000 تەڭگە), قاينار اكادەمياسىڭ ستۋدەنتى راسۋل ساۋىتبەككە ەكىنشى ورىن (60 000 تەڭگە), ت.جۇرگەنوۆ اتىنداعى ونەر اكادەمياسىنىڭ ستۋدەنتى جانارىس تىلەۋبەككە جانە اباي اتىنداعى قازۇپۋ ستۋدەنتى دانيار نىسانعاليەۆكە ءۇشىنشى ورىن جۇلدەسى بەرىلدى. سونداي-اق ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتى تالانتتى اقىن بەكجان بازاربەككە ارنايى جۇلدە تابىستالدى. ايتىسقا قاتىسقان بارلىق اقىن رەكتوردىڭ العىسحاتىمەن جانە اقشالاي سىياقىمەن ماراپاتتالدى.
شارانى ۇيىمداستىرۋشىلار ايتىسقا اقپاراتتىق قولداۋ كورسەتكەن «قازاق راديولارى» جشس الماتى ستۋدياسىنىڭ جەتەكشىسى باقىت جاعىپاروۆقا جانە «انا ءتىلى» گازەتىنىڭ باس رەداكتورى جاناربەك اشىمجانعا العىسىن ءبىلدىردى.
