«تاۋارلاردىڭ كولەڭكەلى اينالىمىن قىسقارتۋ, سونداي-اق اينالىمدى باقىلاۋ ءۇشىن بيزنەس پروتسەستەردى جولعا قويۋ ارقىلى كاسىبىن ادال جۇرگىزەتىن كاسىپكەرلەرگە تەڭ جاعداي جاساۋعا جول اشادى», دەدى ا.مىرزاحمەتوۆ.
مەملەكەتتىك ورگانداردىڭ قولداۋىمەن ۇلتتىق پالاتا ەاەو اكتىلەرى مەن تاڭبالاۋ ماسەلەلەرى بويىنشا ۇلتتىق زاڭناماعا نەگىزگى نورمالاردى ەنگىزدى. اتاپ ايتقاندا, ءار مەملەكەت تاڭبالاۋدى ەنگىزۋدىڭ كۇنىن وزدەرى بەلگىلەپ, قاناتقاقتى جوبالاردى مىندەتتى جۇرگىزۋگە, تاڭبالاۋعا جاتاتىن تاۋارلار ءتىزىمىن, سونداي-اق تاڭبالاۋعا جاتاتىن كودتىڭ قۇنىن پالاتا جانە بيزنەس قاۋىمداستىقپەن كەلىسىپ بەلگىلەۋگە مۇمكىندىك الدى.
باسقارما باسشىسى تاڭبالاۋعا جاتاتىن تاۋارلاردى انىقتاۋدا بيزنەسكە ارتىق جۇكتەمە تۇسىرمەيتىن ەكونوميكالىق تۇرعىدا نەگىزدەلگەن ماقساتتى تىزىمگە كوڭىل ءبولۋ كەرەكتىگىن ايتادى.
ءسۇت ونىمدەرىن تاڭبالاۋدا ۇلتتىق پالاتا ەكسپورتتالاتىن ونىمدەرگە باسىمدىق بەرىلۋ كەرەك دەگەن ۇستانىمدا. بۇل امال ەاەو نارىعىن ساقتاۋ ءۇشىن قولعا الىنىپ وتىر دەپ سەندىردى باسقارما توراعاسى. ىشكى نارىقتا مۇنداي مىندەت قاجەت ەمەس.
«كاسىپكەرلەر ءۇشىن بۇل پروتسەدۋرانىڭ شىعىنى كوپ. سوندىقتان مەملەكەتتەن قولداۋ كورسەتۋىن سۇرايمىز. بۇل جاعدايدا تاڭبالاۋدى ەنگىزۋدىڭ شىعىندارىن ازايتۋ ءۇشىن قولداۋ قۇرالدارى مەن بيزنەستى ىنتالاندىرۋ قاجەت. بيزنەستە تاڭبالاۋدى ەنگىزۋ بويىنشا الدىن الا ەسەپ جۇرگىزىلىپ, فارماتسەۆتيكاعا 13 ملرد تەڭگە, اياق كيىم سەكتورىنا 1,6 ملرد تەڭگە جانە ءسۇت ءوندىرىسى سالاسىنا 9,7 ملرد تەڭگە قاجەت ەكەنى انىقتالدى», دەدى ا.مىرزاحمەتوۆ.
ونىڭ ايتۋىنشا, ەاەو ەلدەرىنەن تاڭبالانباي كەلەتىن تاۋارلاردان ىشكى نارىقتى قورعاۋ ءۇشىن قازىر تەحنيكالىق رەتتەۋ, ۆەتەرينارلىق سەرتيفيكاتتار, ەلەكتروندى شوت-فاكتۋرالار سەكىلدى تەتىكتەر قاراستىرىلعان.
