قالا اكىمى مۇرات ايتەنوۆ شاھارداعى ءتيىستى مەكەمەلەردىڭ قىس مەزگىلىنە دايىندىعىمەن تانىستى. اپاتتىق قۇتقارۋ جانە كوممۋنالدىق-تەحنيكالىق قامتاماسىز ەتۋ قىزمەتتەرىنىڭ قاز-قاتار ساپ تۇزەگەن ارنايى تەحنيكالارى قالانى قاردان تازالاپ, كوك تايعاق كەزەڭدە قاجەتتى ينەرتتى ماتەريالدار سەبۋگە ساقاداي ساي.
– الدىمىزدا قىس. تەحنيكانىڭ باسىم بولىگى جاڭارعانىن ءوزىم كورىپ شىقتىم. جاعدايدىڭ ءبارى باقىلاۋدا بولۋعا ءتيىس, – دەدى.
قالالىق توتەنشە جاعدايلار دەپارتامەنتىنىڭ حابارلاۋىنشا, بيىل ءۇشىنشى مەگاپوليستىڭ كوشەلەرىن قاردان تازالاۋعا, قۇم سەبۋ جۇمىستارىنا 182 تەحنيكا, 670 جەكە قۇرام ساقاداي ساي. كوكتايعاققا قارسى 17 مىڭ تەكشە قۇم مەن 5 مىڭ توننا تۇز سىندى ينەرتتى ماتەريالدار قورى جاسالعان.
قالالىق توتەنشە جاعدايلار دەپارتامەنتى باستىعىنىڭ ورىنباسارى جانىبەك كارىمباەۆ:
– قىس مەزگىلىندە 32 باعىتتا ۇزىندىعى 1 مىڭنان استام شاقىرىمدى الىپ جاتقان 299 كوشەدە جۇمىستار جۇرگىزىلەدى, – دەيدى.
قالاعا جىلۋ بەرەتىن مەكەمەلەر دە جىلۋدان كىنارات بولمايدى, حالىق توڭبايدى دەپ سەندىردى. ايتۋلارىنا قاراعاندا, ورتالىقتاندىرىلعان جىلۋ جۇيەسىنە قوسىلعان كوپ قاباتتى ۇيلەر, بيۋدجەتتىك جانە كوممەرتسيالىق نىسانداردا تەكسەرۋ جۇرگىزىلدى, ولارعا جىلۋ بەرىلدى.
«قازيگدرومەت» سينوپتيكتەرىنىڭ بولجاۋىنشا, 17-19 قاراشا كۇندەرى ەلىمىزدىڭ بىرقاتار ايماعىندا كۇن سۋىتىپ, كەيبىر وڭىرلەردە 18-26 گرادۋس اياز بولادى. شىمكەنتە دە الداعى كۇندەرى كۇننىڭ كۇرت سۋىتۋى بولجانۋدا. وسى اپتانىڭ سوڭىنا قاراي قار جاۋى مۇمكىن.
شىمكەنت
