ەلىمىزدەگى ەلەۋلى ىستەردىڭ ءبىرى – مەملەكەتتىك قىزمەتتەر كورسەتۋدى وڭتايلاندىرۋ, ونى باسقا باعىتقا سالا وتىرىپ, دامىتۋ. بۇگىندە حالىقارالىق تاجىريبەگە سۇيەنە وتىرىپ مەملەكەتتىڭ بىرقاتار فۋنكتسيالارى جەكە سالالارعا بەرىلۋدە. وسىعان وراي, قۇقىق قورعاۋ سالاسىندا دا بىرقاتار وزگەرىستەر ورىن الىپ جاتقانى بەلگىلى. بۇل رەتتە «ANTIKOR LIVE» جوباسى اياسىندا «شىعىس – ادالدىق الاڭى» جوبالىق كەڭسەسىنىڭ ۇيىمداستىرۋىمەن شىعىس قازاقستان وبلىسى ادىلەت دەپارتامەنتى باسشىسىنىڭ ورىنباسارى ەرمەك قوراباەۆ قاتىسقان «الەۋمەتتىك ماڭىزى بار ماسەلەلەر: اليمەنتتەر مەن ەڭبەكاقىنى ءوندىرۋ» تاقىرىبىندا تىكەلەي ەفير ءوتتى.
«اليمەنت – «نەكە جانە وتباسى» كودەكسىنە سايكەس, ءبىر ادامنىڭ ونى الۋعا قۇقىعى بار باسقا ادامعا ۇسىنىلاتىن مىندەتتى اقشالاي نەمەسە ماتەريالدىق اسىراۋ قاراجاتى. بۇل – زاڭ جۇزىندە بەكىتىلگەن تولەم. اتا-انالار مەن بالالاردىڭ اراسىندا تۋىندايتىن ەڭ وتكىر سۇراقتاردىڭ ءبىرى – وسى اليمەنت تولەۋ. «اليمەنت» دەپ ءبىز كوپ جاعدايدا تەك اجىراسقان اكەنىڭ ءوز بالاسىنا تولەۋگە مىندەتتى اقىسىن ايتامىز. الايدا – بۇل تولەم تەك اكەگە عانا ەمەس, سونىمەن قاتار اناعا دا جۇكتەلەتىن مىندەت. بالانى اسىراۋ – اتا-اناسىنىڭ زاڭمەن بەكىتىلگەن مىندەتى. ال اليمەنت وندىرۋگە كەلگەندە اتا-اناسىنىڭ نەكەدە بولۋى, ازاماتتىق نەكەدە نەمەسە اجىراسقان بولۋى مۇلدە ماڭىزدى ەمەس», دەيدى دەپارتامەنت باسشىسىنىڭ ورىنباسارى.
ونىڭ ايتۋىنشا, قامقورلىقتاعى نەمەسە پاتروناتتىق تاربيەدەگى بالالارمەن قاتار اسىراپ الىنعان بالالار دا اليمەنتكە قۇقىلى. اجىراسۋ بارىسىندا ەرلى-زايىپتىلار بالانى اسىراۋ ماسەلەسىن وزدەرى كەلىسۋى كەرەك. اليمەنتتەر سول كەلىسىم بويىنشا تولەنەدى. ەگەر ونداي كەلىسىم بولماسا, وندا قىلمىستىق كودەكستىڭ 139-بابىنا سايكەس كامەلەتكە تولماعان بالالارعا اليمەنتتى اتا-اناسى سوتپەن تولەتەدى.
«اليمەنتتەر اي سايىن اتا-اناسىنىڭ ەڭبەكاقىسىنان نەمەسە وزگە تابىسىنان زاڭمەن بەلگىلەنگەن مولشەردە تولەنۋى ءتيىس. اتاپ ايتقاندا, 1 بالاعا – تابىسىنىڭ تورتتەن ءبىر بولىگى, 2 بالاعا – تابىسىنىڭ ۇشتەن ءبىر بولىگى, 3 جانە ودان دا كوپ بالالارعا – تابىسىنىڭ تەڭ جارتىسى تولەنەدى. جۇمىس ىستەمەيتىن بورىشكەردىڭ تولەۋگە مىندەتتى اليمەنت مولشەرى قازاقستانداعى ورتا جالاقى مولشەرىمەن ەسەپتەلەدى», دەدى ە.قوراباەۆ. سونىمەن قاتار تىكەلەي ەفير بارىسىندا دەپارتامەنت باسشىسىنىڭ ورىنباسارى ەڭبەكاقىنى ءوندىرۋ ماسەلەلەرىنە توقتالىپ, زاڭدا كورسەتىلگەن تالاپتاردى اتاپ ءوتتى.
