پارلامەنت • 19 قاراشا، 2020

قاراجاتتىڭ جارتىسىنان استامى الەۋمەتتىك سالاعا جۇمسالادى

31 رەت كورسەتىلدى

سەنات سپيكەرى ماۋلەن اشىمباەۆتىڭ توراعالىعىمەن پالاتا وتىرىسى ءوتتى. وندا سەناتورلار "2021-2023 جىلدارعا ارنالعان رەسپۋبليكالىق بيۋدجەت تۋرالى" زاڭ جوباسىن قارادى. الداعى ءۇش جىلدىق بيۋدجەت ستراتەگيالىق باعدارلامالاردى جانە پرەزيدەنتتىڭ بيىلعى جولداۋىندا كورسەتىلگەن ماڭىزدى الەۋمەتتىك-ەكونوميكالىق ماقساتتاردى ىسكە اسىرۋعا ارنالعان، دەپ حابارلايدى Egemen.kz پارلامەنت سەناتىنىڭ ءباسپاسوز قىزمەتىنە سىلتەمە جاساپ.

"سىرتقى نارىقتاعى كۇردەلى جاعدايعا بايلانىستى داعدارىسقا قارسى كەشەندى ءىس-شارالاردى قارجىلاندىرۋ جالعاسا بەرەدى. بيۋدجەتتى قاراۋ بارىسىندا الداعى ءۇش جىلدا ازاماتتاردىڭ الەۋمەتتىك ماسەلەلەرىن شەشۋگە باسىمدىق بەرىلدى. سوعان سايكەس 2021 جىلى بيۋدجەت شىعىندارىنىڭ 50 پايىزدان استامى الەۋمەتتىك سالاعا جۇمسالادى"، دەدى ماۋلەن اشىمباەۆ.

سونداي-اق، سەنات توراعاسى ەكونوميكاداعى قيىندىقتارعا قاراماستان، پرەزيدەنتتىڭ تاپسىرماسى بويىنشا بيۋدجەتتە بارلىق الەۋمەتتىك مىندەتتەردى ورىنداۋعا كەرەكتى قارجى قاراستىرىلعانىن اتاپ ءوتتى. بۇل قاراجات الەۋمەتتىك تولەمدەردى يندەكساتسيالاۋعا، مۇعالىمدەر مەن دارىگەرلەردىڭ جالاقىلارىن كوبەيتۋگە جانە حالىققا مەديتسينالىق قىزمەت كورسەتۋگە باعىتتالادى.

ستراتەگيالىق باعىتتاردىڭ قاتارىندا وڭىرلەردى دامىتۋ ماسەلەسى دە وزەكتى ەكەنى بەلگىلى.

"ەلىمىز ءۇشىن اسا ماڭىزدى بولىپ سانالاتىن – ينفراقۇرىلىمدى دامىتۋ، ورتالىق جانە سولتۇستىك وڭىرلەردى گازداندىرۋ، اۋىز سۋمەن قامتاماسىز ەتۋ ماسەلەلەرى دە نازاردان تىس قالعان جوق. مەملەكەت باسشىسىنىڭ تاپسىرماسىنا سايكەس، ايتارلىقتاي قارجى شاعىن جانە ورتا بيزنەستى قولداۋعا جانە الەۋمەتتىك از قامتىلعان ازاماتتارعا ارنالعان باسپانا قۇرىلىسىنا بولىنەدى"، دەدى سەنات توراعاسى.

كەلەسى 2021 جىلى ينفراقۇرىلىمدى دامىتۋ، گازداندىرۋ جانە اۋىز سۋمەن قامتۋ جۇمىستارىنا بيۋدجەتتەن 1،6 ترلن. تەڭگە ءبولۋ جوسپارلانىپ وتىر.

سونىمەن قاتار سەناتور نۇرلان قىلىشباەۆ مەملەكەتتىڭ الەۋمەتتىك مىندەتتەمەلەرىن ورىنداۋ جانە پاندەميامەن كۇرەس شارالارىنا بايلانىستى رەسپۋبليكالىق بيۋدجەت قاراجاتىن جۇمساۋ تاسىلدەرىن قايتا قاراۋ كەرەكتىگىن ايتتى.

"بيىل بيۋدجەت قاراجاتى ءتيىمسىز جۇمسالعان جايتتار انىقتالدى. ۇكىمەت رەزەرۆىندەگى قارجى ەسەبىنەن وتاندىق وندىرۋشىلەردەن 1500 وكپەنى جاساندى جەلدەتۋ اپپاراتى ساتىپ الىندى. الايدا، 17 وڭىردەگى دەنساۋلىق ساقتاۋ مەكەمەلەرى سونىڭ 831-ءىن عانا قابىلداپ العان. ال قالعاندارى تولىق جابدىقتالماعان بولىپ شىقتى. مىسالى، جامبىل وبلىسىندا وسىنداي ولقىلىققا بايلانىستى 53 اپپاراتتىڭ بىردە بىرەۋى جۇمىس ىستەمەي تۇر. قازىرگىدەي كۇردەلى كەزەڭدە مۇنداي جاعدايلارعا جول بەرۋگە بولمايدى"، دەدى نۇرلان قىلىشباەۆ.

ودان بولەك، سەناتورلار بيزنەس پەن ازاماتتاردى الەۋمەتتىك قولداۋعا جانە وڭىرلەردى دامىتۋعا بولىنەتىن قاراجاتتى ۇلعايتۋعا بايلانىستى بيۋدجەت شىعىستارىنىڭ كەيبىر باعىتتارىن قايتا قاراۋدى ۇسىندى.

جان-جاقتى تالقىلاۋدان كەيىن سەنات دەپۋتاتتارى ەلىمىزدىڭ باستى قارجى قۇجاتىنا بىرقاتار تۇزەتۋلەر ەنگىزىپ، ماجىلىسكە قايتاردى.

بۇدان باسقا، سەناتورلار "قازاقستان رەسپۋبليكاسىنىڭ ۇلتتىق قورىنان 2021-2023 جىلدارعا ارنالعان كەپىلدەندىرىلگەن ترانسفەرت تۋرالى" زاڭ جوباسىن دا قارادى. سوعان سايكەس، ۇلتتىق قوردان رەسپۋبليكالىق بيۋدجەتكە ترانسفەرت كولەمى 2021 جىلعا – 3،7 ترلن.، 2022 جىلعا – 2،4 ترلن.، 2023 جىلعا 2،2 ترلن. تەڭگە بولىپ بەكىتىلدى.

سەنات وتىرىسىنا ەلىمىزدىڭ پرەمەر-ءمينيسترى اسقار مامين، ۇلتتىق بانك توراعاسى ەربولات دوساەۆ، ۇلتتىق ەكونوميكا ءمينيسترى رۋسلان دالەنوۆ، قارجى ءمينيسترى ەرۇلان جاماۋباەۆ جانە ۆيدەو-كونفەرەنتس بايلانىسى ارقىلى باسقا دا ۇكىمەت مۇشەلەرى قاتىستى.

سونداي-اق، وتىرىس بارىسىندا سەنات توراعاسىنىڭ ورىنباسارى اسقار شاكىروۆ پەن سەناتور نۇرتورە ءجۇسىپ ادام قۇقىقتارى مەن بوستاندىعىن قامتاماسىز ەتۋ ماسەلەسى بويىنشا ۇكىمەت باسشىسىنىڭ اتىنا دەپۋتاتتىق ساۋال جولدادى.

سوڭعى جاڭالىقتار

قيلى-قيلى تاعدىرلار

تاريح • كەشە

ءبىر شاڭىراقتان – ءۇش مايدانگەر

رۋحانيات • 08 مامىر، 2021

قازاق دەگەنىمىز – باۋىرجان...

رۋحانيات • 08 مامىر، 2021

505-ءشى تۇرمەنىڭ تۇتقىندارى

تاريح • 08 مامىر، 2021

اسكەري ينجەنەرلەر ۇستاحاناسى

وقيعا • 07 مامىر، 2021

ۇقساس جاڭالىقتار