جاۋاپتى حاتشى ينستيتۋتى جويىلادى
ۇكىمەتى تۋرالى زاڭ جوباسىنىڭ نەگىزگى ماقساتى – مەملەكەتتىك قىزمەت جانە مەملەكەتتىك باسقارۋ سالاسىنداعى زاڭنامانى ودان ءارى جەتىلدىرۋ. زاڭ جوباسىندا جاۋاپتى حاتشىلار ينستيتۋتى جويىلادى. جاۋاپتى حاتشىلار ينستيتۋتى جويىلعان كەزدە ولاردىڭ مىندەتتەرى مينيسترلىكتەر اپپاراتتارىنىڭ باسشىلارىنا جۇكتەلەدى. زاڭ جوبالارىن دەپۋتاتتارعا مەملەكەتتىك قىزمەت ىستەرى اگەنتتىگىنىڭ توراعاسى انار جايىلعانوۆا تانىستىردى.
«جولداۋدا مەملەكەت باسشىسى مينيسترلىكتەر اپپاراتتارىنىڭ باسشىلارىنا مىندەتتەرىن جۇكتەي وتىرىپ, جاۋاپتى حاتشىلار ينستيتۋتىن جويۋعا ناقتى تاپسىرما بەردى. وسى تاپسىرمانى ىسكە اسىرۋ ماقساتىندا اپپارات باسشىسى مەن مينيستر اراسىنداعى لاۋازىمدىق وكىلەتتىكتەر مەن جاۋاپكەرشىلىكتىڭ اراجىگىن اجىراتۋ بويىنشا ءتيىستى زاڭنامالىق تۇزەتۋلەر ەنگىزىلەدى. بۇدان باسقا, اپپارات باسشىسىنىڭ مارتەبەسى مەن وكىلەتتىكتەرىن رەتتەيتىن نورمالاردى قايتا قاراۋ, سونداي-اق ونىڭ تىكەلەي مەملەكەتتىك ورگان باسشىسىنا باعىنۋىن بەلگىلەۋ ۇسىنىلادى», دەدى ا.جايىلعانوۆا.
سونداي-اق زاڭ جوباسىندا سۇيىتىلعان مۇناي گازى ساۋدا-ساتتىعىنىڭ كولەمىن كەزەڭ-كەزەڭىمەن ۇلعايتۋ قاراستىرىلعان. ەنەرگەتيكا مينيسترلىگى كوروناۆيرۋس پاندەمياسىنىڭ سالدارىنان تۋىنداعان جاعدايدى ەسكەرىپ, سۇيىتىلعان مۇناي گازىن ساتۋدى 2021 جىلعى 1 قاڭتارعا دەيىن ەلەكتروندى ساۋدا الاڭدارىنا اۋىستىرۋدى كوزدەپ وتىر.
ا.جايىلعانوۆانىڭ ايتۋىنشا, ۇسىنىلعان تۇزەتۋلەردە سۇيىتىلعان گازدى وسى ساۋدا الاڭدارى ارقىلى وتكىزۋگە تولىق شىعۋ مەرزىمىن قولدانىستاعى زاڭنامادا كوزدەلگەن 2020 جىلدىڭ ورنىنا 2023 جىلدىڭ سوڭىنا دەيىن ۇزارتۋ بولجانىپ وتىر. سەبەبى نارىقتىق باعالار بويىنشا ساۋدا-ساتتىققا بىردەن كوشۋ تۇپكى تۇتىنۋشىلار ءۇشىن سۇيىتىلعان گاز باعاسىنىڭ ايتارلىقتاي وسۋىنە اكەلۋى مۇمكىن.
سونىمەن قاتار زاڭ جوباسىندا كامەلەتكە تولماعاندارعا قاتىستى سەكسۋالدىق سيپاتتاعى قىلمىستار ءۇشىن جازانى قاتاڭداتۋ, ولاردى قاۋىپسىزدىگى بارىنشا جوعارى مەكەمەلەردە ۇستاۋدى, تاعايىندالعان مەرزىمدى كەشىرىم جاساۋ جانە مەرزىمىنەن بۇرىن بوساتۋ قۇقىعىنسىز وتەۋ قاراستىرىلعان.
«كامەلەتكە تولماعاندارعا قاتىستى سەكسۋالدىق سيپاتتاعى قىلمىستار ءۇشىن جازانى قاتاڭداتۋ قاراستىرىلعان. وسى تارماق بويىنشا قىلمىستىق جانە قىلمىستىق-پروتسەستىك كودەكستەرگە, «باس بوستاندىعىنان ايىرۋ ورىندارىنان بوساتىلعان ادامداردى اكىمشىلىك قاداعالاۋ تۋرالى» زاڭىنا زاڭنامالىق تۇزەتۋلەردىڭ كەشەنى ازىرلەندى.
تۇزەتۋلەر كەلەسى تاپسىرمالاردى ىسكە اسىرۋعا باعىتتالعان. كامەلەتكە تولماعاندارعا قاتىستى سەكسۋالدىق سيپاتتاعى قىلمىستار ءۇشىن جازانى قاتاڭداتۋ, پەدوفيلدەردى قىلمىستىق-اتقارۋ جۇيەسىنىڭ قاۋىپسىزدىگى بارىنشا جوعارى مەكەمەلەرىندە ۇستاۋدى بەلگىلەۋ, ولارعا راقىمشىلىق جاساۋدى جانە مەرزىمىنەن بۇرىن بوساتۋدى بولدىرماۋعا باعىتتالادى.
ازىرلەنگەن تۇزەتۋلەر مىناداي ەرەجەلەردەن تۇرادى. بىرىنشىدەن, كامەلەتكە تولماعاندارعا قاتىستى جىنىستىق قىلمىستاردى جاساعاندارعا سانكتسيالار كۇشەيتىلدى. ەكىنشىدەن, كامەلەتكە تولماعاندارعا جىنىستىق قىسىم كورسەتۋگە جاتاتىن قىلمىستاردىڭ شەڭبەرى كەڭەيتىلدى», دەدى ا.جايىلعانوۆا.
سونىمەن قاتار كامەلەتكە تولماعاندارعا جىنىستىق قىسىم كورسەتكەندەرگە بالالارمەن جۇمىس ىستەۋگە, پەدوگوگيكالىق قىزمەت اتقارۋعا ءومىر بويىنا تىيىم سالىنباق.
«ۇشىنشىدەن, كامەلەتكە تولماعان جاستا قىلمىس جاساعان ادامداردى قوسپاعاندا, كامەلەتكە تولماعانداردىڭ جىنىستىق تيىسپەۋشىلىگىنە قارسى قىلمىستار ءۇشىن باس بوستاندىعىنان ايىرۋعا سوتتالعان ادامداردى مەرزىمىن قىلمىستىق-اتقارۋ جۇيەسىنىڭ قاۋىپسىزدىگى ورتاشا قاۋىپسىز مەكەمەلەرىندە وتەۋدى تاعايىنداۋعا تىكەلەي تىيىم سالىندى جانە قىلمىستار سۋبەكتىلەرىنىڭ باس بوستاندىعىنان ايىرۋ جازاسىن قاۋىپسىزدىگى بارىنشا جوعارى مەكەمەلەردە وتەۋدى تاعايىنداۋ تۋرالى تالاپ كوزدەلگەن.
تورتىنشىدەن, كامەلەتكە تولماعانداردىڭ جىنىستىق تيىسپەۋشىلىگىنە قارسى قىلمىستىق تۋرالى ىستەر بويىنشا قىلمىستىق قۇقىقبۇزۋشىلىق ءۇشىن كوزدەلگەن جازادان گورى نەعۇرلىم جەڭiل جازا تاعايىنداۋعا, جازانىڭ وتەلمەگەن بولiگiن قىسقارتۋعا, راقىمشىلىق جاساۋ تۋرالى اكتىنى قولدانۋعا تىيىم سالىندى.
بەسىنشىدەن, سوتتىڭ مەديتسينالىق سيپاتتاعى ماجبۇرلەۋ شارالارىن ايقىنداۋ كەزىندە حيميالىق كاستراتسيالاۋمەن قاتار سەكسۋالدىق زورلىق-زومبىلىققا بەيىمدىلىكتى جانە سەكسۋالدىق ۇناتۋدىڭ بۇزۋشىلىقتارىن ەمدەۋدى تاعايىنداۋ قۇقىعى كوزدەلگەن. تۇزەتۋ پەدوفيلدەرگە قاتىستى ءتان جانە پسيحيكا تۇرعىسىنان مەديتسينالىق ىقپال ەتۋدىڭ كەشەندى تاسىلدەرىنىڭ مۇمكىندىكتەرىن قامتاماسىز ەتۋگە باعىتتالعان.
قىلمىستىق-پروتسەستىك كودەكستەن القابيلەردىڭ قاتىسۋىمەن وتەتىن سوتتىڭ قۇزىرەتىنەن كامەلەتكە تولماعانداردىڭ جىنىستىق تيىسپەۋشىلىگىنە قارسى اسا اۋىر قىلمىستار تۋرالى ىستەردى قاراۋ الىپ تاستالدى.
تۇزەتۋ القابيلەردىڭ ەموتسيالىق فاكتورعا نەگىزدەلگەن شەشىم شىعاراتىنىنا بايلانىستى بالالارعا قاتىستى اسا اۋىر قىلمىس جاساعان ادامدارعا جاۋاپكەرشىلىكتى نەگىزسىز جەڭىلدەتۋگە مۇمكىندىك بەرەتىن سوت پراكتيكاسىنىڭ پرەتسەدەنتتەرىن بولدىرماۋعا باعىتتالعان», دەپ ءتۇسىندىردى ا.جايىلعانوۆا.
بۇدان بولەك, زاڭ جوباسىندا سىبايلاس جەمقورلىق قىلمىستارىنا جول بەرگەن ادامدارعا قاتىستى كۆازيمەملەكەتتىك سەكتوردا جۇمىس ىستەۋىنە ءومىر بويى تىيىم سالۋدى ەنگىزۋ جانە قوس ازاماتتىعى بار مەملەكەتتىك قىزمەتشىلەردى نەمەسە كۆازيمەملەكەتتىك ۇيىمداردىڭ باسشىلارىن جۇمىستان شىعارۋ قاراستىرىلعان.
ءتۋريزمدى دامىتۋ مۇمكىندىگى
جالپى وتىرىستا تۋريستىك قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسى ءبىرىنشى وقىلىمدا ماقۇلداندى. اتالعان ماسەلە جونىندە مادەنيەت جانە سپورت ءمينيسترى اقتوتى رايىمقۇلوۆا بايانداما جاسادى. ۆەدموستۆو باسشىسىنىڭ ايتۋىنشا, زاڭ جوباسى ەلدىڭ قابىلدانعان ستراتەگيالىق قۇجاتتارىنا سايكەس تۋريستىك سالانى مەملەكەتتىك رەتتەۋدى جەتىلدىرۋگە, سونداي-اق ۇزاق مەرزىمدى كەزەڭگە ارنالعان قازاقستاننىڭ ەكونوميكالىق دامۋ باسىمدىقتارىنىڭ ءبىرى رەتىندە تۋريزم سالاسىن دامىتۋ ءۇشىن قاجەتتى قۇقىقتىق بازا قۇرۋعا باعىتتالعان.
«مەملەكەتتىك رەتتەۋ, اتاۋلى مەملەكەتتىك قولداۋدى جۇزەگە اسىرۋ تۇرعىسىنان ماڭىزدى ماسەلەلەردىڭ ءبىرى – تۋريستىك قىزمەتتىڭ قازىرگى تۇرلەرى مەن باعىتتارىن ناقتى جىكتەۋ جوق. وسىعان بايلانىستى تۋريستىك كلاستەرلەردى دامىتۋدىڭ ستراتەگيالىق جوسپارلارىن, سونداي-اق تۋريستىك قىزمەتتىڭ جەكەلەگەن باعىتتارىن ىسكە اسىرۋ ماقساتىندا زاڭ جوباسىندا ءتۋريزمدى جىكتەۋ كوزدەلگەن.
باسىم تۋريستىك اۋماق ۇعىمىن ەنگىزۋ – زاڭ جوباسىنىڭ نەگىزگى نوۆەللاسى. ونى قۇرۋ ماقساتى – سينەرگەتيكالىق اسەر ەسەبىنەن تۋريستىك نارىقتا اۋماقتىڭ باسەكەگە قابىلەتىن, تۋريستىك كلاستەرگە كىرەتىن تۋريستىك ۇيىمدار جۇمىسىنىڭ تيىمدىلىگىن ارتتىرۋ, رەسۋرستاردى (ماتەريالدىق, زياتكەرلىك) ءتۋريزمدى دامىتۋدىڭ نەعۇرلىم پەرسپەكتيۆالى نۇكتەلەرىنە شوعىرلاندىرۋ.
باسىم تۋريستىك اۋماق – تۋريستىك سالاعا ينۆەستيتسيالار مەن حالىقارالىق ستاندارتتاردى ەنگىزۋدى كوزدەيتىن ءىس-شارالار كەشەنى. اۋماقتى (گەوگرافيالىق شەكارالاردى) ۇكىمەت ايقىندايدى.
زاڭ جوباسىندا بۇل ارتىقشىلىقتار قولدانىستاعى زاڭنامادا بەلگىلەنگەن
2 ملن ايلىق ەسەپتىك كورسەتكىشكە قارسى ەڭ تومەنگى ينۆەستيتسيالىق شەگى بار 200 مىڭ ايلىق ەسەپتىك كورسەتكىشتى قۇرعان باسىم تۋريستىك اۋماقتاردى ىسكە اسىرۋ ءۇشىن ۇسىنىلادى», دەدى مينيستر.
سونىمەن قاتار زاڭ جوباسىندا تۋريزم سالاسىنداعى سۋبەكتىلەردىڭ تىزبەسى كەڭەيتىلمەك. سوعان سايكەس تۋريستىك قىزمەت سۋبەكتىلەرىنىڭ نەگىزگى ەرەكشەلىكتەرى مەن سيپاتتامالارى, ولاردىڭ تۋريستىك قىزمەتتەردى كورسەتۋگە جانە تۋريستىك ونىمدەردى قالىپتاستىرۋعا قاتىسۋى ايقىندالادى. زاڭ جوباسىندا تۋريستىك وپەراتور مەن تۋريستىك اگەنت, سونداي-اق گيد, ەكسكۋرسوۆود, تۋريزم نۇسقاۋشىلارى تەرميندەرىنە انىقتاما بەرىلگەن. بۇدان بولەك تۋريزم سالاسىنداعى ۇلتتىق كومپانيانىڭ فۋنكتسيالارى بەكىتىلمەك.
«ۇلتتىق كومپانيانىڭ مارتەبەسىن, قىزمەتىنىڭ باعىتتارى مەن وكىلەتتىكتەرىن زاڭنامالىق دەڭگەيدە بەلگىلەۋ ورىندى بولىپ تابىلادى جانە ونىڭ ءتيىمدى جۇمىس ىستەۋىن قامتاماسىز ەتەدى.
ازاماتتاردىڭ قۇقىقتارىنا كەپىلدىك بەرۋ جۇيەسىنىڭ تەتىگى جانە زاڭنامانى بۇزعانى ءۇشىن جاۋاپكەرشىلىك جونىندە. شىعۋ تۋريزمىندە تۋريستەردى قورعاۋ دەڭگەيىن ارتتىرۋ بويىنشا شارالار كەشەنىن قابىلداۋ, تۋروپەراتورلار ۇيىمداستىرعان شىعۋ ءتۋريزمى شەڭبەرىندە قازاقستان رەسپۋبليكاسىنىڭ ازاماتتارىنا تۋريستىك كود بەرۋ تەتىگىن ەنگىزۋ, سونداي-اق كەپىلدىك بەرۋ سومالارىن جيناۋ جانە قايتارۋ ءتارتىبىن رەگلامەنتتەۋ ەنگىزۋ جوسپارلانىپ وتىر.
ولجالىق اڭ اۋلاۋدى دامىتۋ, فەرمەرلىك اڭشىلىق شارۋاشىلىعىنىڭ كاسىپكەرلىگىن قولداۋ قاراستىرىلعان. الەمدىك تاجىريبە كارى جانۋارلاردى جويۋدىڭ عىلىمي نەگىزدەلگەن ءليميتى پوپۋلياتسياعا دەپرەسسيالىق اسەر ەتپەيتىنىن, ال كەيبىر جاعدايلاردا ونىڭ ونىمدىلىگىن ارتتىراتىندىعىن دالەلدەدى.
قازاقستاندا كوپتەگەن سيرەك كەزدەسەتىن تۇرلەر پوپۋلياتسياسىنىڭ قازىرگى جاعدايى تۇراقتاندى جانە اڭ اۋلاۋ ماقساتىندا كارى داراقتار تۇراقتى پايدالانىلادى.
تۋريزم سالاسىنداعى رەتتەۋ ساياساتىن جەتىلدىرۋ جونىندە. وسى ۋاقىتقا دەيىن تۋروپەراتورلىق قىزمەتكە ليتسەنزيا قىزمەت باعىتتارىنا قاراماستان بەرىلدى. قىزمەتتى جۇرگىزۋدى وڭايلاتۋ جانە اكىمشىلىك كەدەرگىلەردى ازايتۋ ماقساتىندا زاڭ جوباسىمەن مىناداي شارالار ۇسىنىلادى. ولار: كەلۋ جانە ىشكى تۋريزم سالاسىنداعى تۋروپەراتورلىق قىزمەتتى ليتسەنزيالاۋدى حابارلاما جاساۋ تارتىبىنە اۋىستىرۋ, جانۋارلاردىڭ ءوسىمىن مولايتۋ جانە مال شارۋاشىلىعىن دامىتۋ ماقساتىندا جانۋارلار دۇنيەسىن قورعاۋ تۋرالى زاڭناما شەڭبەرىندە رۇقسات بەرۋ راسىمدەرىن وڭتايلاندىرۋ, پروفيلاكتيكالىق باقىلاۋدى رەگلامەنتتەۋ», دەدى ا.رايىمقۇلوۆا.
ۆەدومستۆو باسشىسىنىڭ ايتۋىنشا, زاڭ جوباسىندا ۇكىمەتكە, تۋريزم سالاسىنداعى ۋاكىلەتتى ورگانعا جانە وزگە دە مەملەكەتتىك ورگاندارعا ءتيىستى قۇزىرەتتىلىكتەردى ءبولۋ كوزدەلگەن.
زاڭ جوباسى تۋرالى پىكىر بىلدىرگەن ءماجىلىس توراعاسى نۇرلان نىعماتۋلين ءتۋريزمدى دامىتۋ ءۇشىن قولايلى جاعداي جاساۋ, ونىڭ ىشىندە زاڭنامالىق دەڭگەيدە ەلدىڭ تۋريستىك الەۋەتىن اشۋعا جانە وسى سالانى نىعايتۋعا ىقپال ەتەتىنىنە سەنىم ءبىلدىردى.
«تۋريزم – ەلىمىزدىڭ الەۋمەتتىك-ەكونوميكالىق دامۋىندا ەرەكشە ورنى بار سالالاردىڭ ءبىرى. ءبىزدىڭ ەلىمىزدە ءتۋريزمدى دامىتۋدىڭ مۇمكىندىگى وتە زور. ەڭ الدىمەن, كەڭ-بايتاق قازاقستانىمىزدىڭ تابيعاتى كەرەمەت. ءبىز, وسى زالدا وتىرعان ءار دەپۋتات ءوزىنىڭ تۋعان جەرىن ەسكە السا, نە بولماسا استانامىزدىڭ, قازىرگى نۇر-سۇلتان قالاسىنىڭ توڭىرەگىندە, بۋرابايدى, وڭتۇستىك ءوڭىردى الساق ەشقانداي شەتەلدىڭ كەرەگى جوق. ەڭ الدىمەن, حالقىمىزدىڭ باۋىرمال, قوناقجاي ءداستۇرى دە ەرەكشە. ول دا ءبىزدىڭ تۋريزمگە جول اشادى. ۇلى دالامىزدا شەتەلدىكتەر قىزىعاتىن تاريحي-مادەني مۇرالار دا كوپ. سول ءۇشىن ەلىمىزدە ءتۋريزمدى دامىتۋعا باسا كوڭىل ءبولىنىپ, ناقتى شارالار قولعا الىندى. باستى ماقسات – 2023 جىلعا دەيىن تۋريزم سالاسى ەكونوميكانىڭ 8 پايىزىن قۇراۋعا ءتيىس. بۇل ەلىمىزدىڭ تۇراقتى دامۋىن قامتاماسىز ەتۋگە ارنالعان ماڭىزدى قادامداردىڭ ءبىرى. ول بۇگىن زاڭ جاعىنان قولداۋ تاۋىپ وتىر», دەدى.
جالپى, زاڭ جوباسى تۋريستىك قىزمەت سالاسىنداعى زاڭنامانى جەتىلدىرۋ ماقساتىندا ازىرلەندى جانە باسىم تۋريستىك اۋماقتار ۇعىمىن بەكىتۋدى كوزدەيدى. اۋماقتاردا تۋريستىك قىزمەت وبەكتىلەرىن قۇرۋ كەزىندە ينۆەستيتسيالىق پرەفەرەنتسيالار بەرۋدى, تۋروپەراتورلىق قىزمەتتى شىعۋ, كەلۋ جانە ىشكى تۋريزم سالالارىنا ءبولۋدى قاراستىرادى. سونداي-اق شىعۋ ءتۋريزمى سالاسىندا ازاماتتاردىڭ قۇقىقتارىنا كەپىلدىك بەرۋ جۇيەسىن جەتىلدىرۋدى «تروفەيلىك اڭ اۋلاۋ» ۇعىمىن ەنگىزۋ ۇسىنىلعان.
قوعامدىق كەڭەستىڭ قۇزىرەتى ارتادى
سونىمەن قاتار پالاتا ءبىرىنشى وقىلىمدا نورماشىعارماشىلىقتى جەتىلدىرۋ ماسەلەلەرى بويىنشا تۇزەتۋلەر جانە ادۆوكاتتىق قىزمەت پەن زاڭ كومەگىنە قاتىستى دەپۋتاتتىق زاڭ جوبالارىن ماقۇلدادى.
بۇل زاڭ جوباسىنىڭ نەگىزگى ەرەجەلەرىنىڭ ءبىرى – زاڭناما الدىنداعى تالداۋ نىسانى رەتىندە زاڭ جوباسىنىڭ تۇجىرىمداماسى ماسەلەسىن شەشۋ. زاڭ جوباسىن ازىرلەۋشى مەملەكەتتىك ورگاننىڭ كونسۋلتاتيۆتىك قۇجاتتى وعان ءتيىستى تالدامالىق ماتەريالداردى قوسا بەرە وتىرىپ قالىپتاستىرۋ جانە ونى جۇرتشىلىقپەن تالقىلاۋ مىندەتى بەلگىلەنەدى. تالقىلاۋ قورىتىندىسى بويىنشا مەملەكەتتىك ورگاندار پروبلەمالاردى جانە ولاردى شەشۋ جولدارىن پىسىقتايدى.
ال ادۆوكاتتىق قىزمەت پەن زاڭ كومەگىنە قاتىستى دەپۋتاتتىق زاڭ جوبالارى قولدانىستاعى زاڭناما مەن قۇقىق قولدانۋ پراكتيكاسىنىڭ مونيتورينگى, سونداي-اق دەپۋتاتتاردىڭ ادۆوكاتتارمەن, زاڭگەرلەرمەن, سۋديالارمەن جانە قۇقىق قورعاۋ ورگاندارىنىڭ وكىلدەرىمەن كەزدەسۋلەر كەزىندە كەلىپ تۇسكەن ۇسىنىستار نەگىزىندە ازىرلەندى.
«تسيفرلى قازاقستان» مەملەكەتتىك باعدارلاماسىن ىسكە اسىرۋ ماقساتىندا قىلمىستىق, ازاماتتىق ىستەر جانە اكىمشىلىك قۇقىق بۇزۋشىلىق تۋرالى ىستەر بويىنشا مەملەكەت كەپىلدىك بەرگەن زاڭ كومەگىن كورسەتۋ شەڭبەرىندە ادۆوكاتتاردى تاعايىنداۋ ءتارتىبىن اۆتوماتتاندىرۋ ۇسىنىلىپ وتىر.
بۇل رەتتە قورعالۋعا كونستيتۋتسيالىق قۇقىقتىڭ بۇزىلۋىنا جول بەرمەۋ ماقساتىندا اۆتوماتتاندىرۋمەن قاتار ادۆوكاتتاردى تاعايىنداۋدىڭ قولدانىستاعى ءتارتىبى ساقتالادى.
جالپى وتىرىستا ورتالىق جانە جەرگىلىكتى مەملەكەتتىك ورگاندار اراسىندا اۋىز سۋمەن جابدىقتاۋدى سۋبسيديالاۋ جونىندەگى وكىلەتتىكتەردىڭ اراجىگىن اجىراتۋ ماسەلەلەرى بويىنشا دەپۋتاتتىق زاڭ جوباسى ءبىرىنشى وقىلىمدا ماقۇلداندى.
زاڭ جوباسىندا بالاماسىز سۋمەن جابدىقتاۋ كوزدەرى بولىپ سانالاتىن اسا ماڭىزدى جەرگىلىكتى سۋمەن جابدىقتاۋ جۇيەلەرىنىڭ تىزبەسىن ازىرلەۋ جانە بەكىتۋ جونىندەگى فۋنكتسيالاردى ۋاكىلەتتى ورگاننان جەرگىلىكتى اتقارۋشى ورگاندارعا بەرۋ كوزدەلەدى. بۇل رەتتە جاڭادان سالىنعان جەرگىلىكتى سۋمەن جابدىقتاۋ جۇيەلەرىنىڭ تىزبەسىنە ەنگىزۋ ءراسىمى جەرگىلىكتى دەڭگەيدە جۇرگىزىلەتىن بولادى, بۇل وڭىرلەردىڭ اۋىز سۋمەن جابدىقتاۋعا سۋبسيديالار الۋىن جىلدامداتادى.
سونىمەن قاتار ءماجىلىس دەپۋتاتتارى ەكىنشى وقىلىمدا بىرقاتار ەكولوگيالىق جانە وعان ىلەسپە زاڭ جوبالارىن ماقۇلدادى. ەكولوگيا كودەكستىڭ جوباسى بويىنشا ەكىنشى وقىلىمعا دايىندىق بارىسىندا جۇمىس توبى ەڭ ۇزدىك قولجەتىمدى تەحنيكالاردىڭ نەعۇرلىم قاتاڭ انىقتامالىقتارىن قابىلداۋ كەزىندە بۇرىن بەرىلگەن كەشەندى ەكولوگيالىق رۇقساتتاردى قايتا قاراۋدى پىسىقتادى. سونداي-اق ازىرلەۋ ءتارتىبىن ەندى ۇلتتىق ستاندارتتار تۇرىندە ەمەس, قازاقستان رەسپۋبليكاسىنىڭ ۇكىمەتى ايقىندايتىن ەڭ ۇزدىك قولجەتىمدى تەحنيكالار جونىندەگى انىقتامالىقتاردى بەكىتۋدى جانە ەميسسيالار مونيتورينگتىڭ اۆتوماتتاندىرىلعان جۇيەسىن ەنگىزۋ مەرزىمدەرى ماسەلەلەرى بويىنشا تۇزەتۋلەردى قارادى.
جالپى وتىرىستا پالاتا دەپۋتاتتارى ەكىنشى وقىلىمدا قارالاتىندار قاتارىندا قوعامدىق كەڭەستەردىڭ قىزمەتى تۋرالى زاڭ جوباسىن ماقۇلدادى. وسى زاڭ جوباسىنا قاتىستى ءماجىلىس توراعاسى نۇرلان نىعماتۋلين پىكىر ءبىلدىردى.
«قوعامدىق كەڭەستەر تۋرالى» العاشقى زاڭ وسىدان 5 جىل بۇرىن قابىلدانعان بولاتىن. بىراق قازىرگى ۋاقىت تالابىنا ساي, وسى زاڭ جوباسىنا بىرقاتار ماڭىزدى وزگەرىستەر ەنگىزىلىپ وتىر. مىسالى, ەندى مەملەكەتتىك ورگانداردا عانا ەمەس, كۆازيمەملەكەتتىك سەكتورلاردا دا وسى قوعامدىق كەڭەستەر قۇرىلادى. سونىمەن بىرگە قوعامدىق كەڭەس مۇشەلەرى مەملەكەتتىك ساتىپ الۋ جۇمىستارىنا قاتىسادى. وسى سياقتى باسقا دا كوپتەگەن كەرەكتى تۇزەتۋلەر ەنگىزىلدى. ونىڭ بارلىعى, بيلىك جانە قوعام اراسىنداعى بايلانىستى, ديالوگتى ودان ءارى كۇشەيتىپ, جۇمىس ساپاسىن ارتتىرۋعا ىقپال ەتەدى دەپ سەنەمىز», دەدى ن.نىعماتۋلين.
جالپى «قوعامدىق قىزمەت تۋرالى» زاڭ جوباسى بويىنشا دەپۋتاتتار قوعامدىق كەڭەستىڭ قىزمەتىن جەرگىلىكتى دەڭگەيدە ۇيىمداستىرۋ تۇرعىسىنان قامتاماسىز ەتۋ جونىندەگى فۋنكتسيانى اكىمدىكتەردىڭ قۇزىرەتىنەن الىپ تاستاۋدى جانە ونى ماسليحاتتارعا بەكىتىپ بەرۋدى ۇسىندى. وسىنى نەگىزگە الا وتىرىپ, ءماسليحات حاتشىسى ەڭبەك زاڭناماسىنا سايكەس ەڭبەك شارتى بويىنشا تارتىلاتىن قىزمەتكەردى دەربەس ايقىندايدى, ول قوعامدىق كەڭەس حاتشىسىنىڭ مىندەتتەرىن اتقارادى.
سونداي-اق جيىن بارىسىندا دەپۋتاتتار وزدەرى ازىرلەگەن كۇزەت قىزمەتى ماسەلەلەرى تۋرالى زاڭ جوبالارىن, ادامداردى قازاقستان شەگىنەن تىس جەرگە شىعارىپ جىبەرۋگە جانە بيۋدجەت زاڭناماسىن جەتىلدىرۋگە قاتىستى زاڭ جوبالارىن ماقۇلدادى. بۇدان بولەك, جالپى وتىرىستا پالاتا ديپلوماتيالىق قىزمەت تۋرالى زاڭ جوباسىن جۇمىسقا الدى.
وتىرىس سوڭىندا ءماجىلىس دەپۋتاتتارى زاعيپا باليەۆا, ازات پەرۋاشەۆ مەملەكەتتىك ورگاندار باسشىلارىنا دەپۋتاتتىق ساۋالدار جولدادى.
