اقتوتى رايىمقۇلوۆا ايتۋىنشا, زاڭ جوباسى ەلدىڭ قابىلدانعان ستراتەگيالىق قۇجاتتارىنا سايكەس, تۋريستىك سالانى مەملەكەتتىك رەتتەۋدى جەتىلدىرۋگە, سونداي-اق ۇزاق مەرزىمدى كەزەڭگە ارنالعان قازاقستاننىڭ ەكونوميكالىق دامۋ باسىمدىقتارىنىڭ ءبىرى رەتىندە تۋريزم سالاسىن دامىتۋ ءۇشىن قاجەتتى قۇقىقتىق بازا قۇرۋعا باعىتتالعان.
"زاڭ جوباسىمەن قولدانىستاعى زاڭنامالارعا بىرقاتار باعىت بويىنشا تۇزەتۋ ەنگىزۋ جوسپارلانىپ وتىر. اتاپ ايتقاندا ۇعىمدىق اپپاراتتى جەتىلدىرۋ, ءتۋريزمدى جىكتەۋ, سالانى مەملەكەتتىك قولداۋدى قۇقىقتىق رەتتەۋمەن بايلانىستى نورمالاردى قايتا قاراۋ كوزدەلگەن. مەملەكەتتىك رەتتەۋ, اتاۋلى مەملەكەتتىك قولداۋدى جۇزەگە اسىرۋ تۇرعىسىنان ماڭىزدى ماسەلەنىڭ ءبىرى − تۋريستىك قىزمەتتىڭ قازىرگى تۇرلەرى مەن باعىتتارىن ناقتى جىكتەۋدىڭ جوقتىعى. وسىعان بايلانىستى تۋريستىك كلاستەردى دامىتۋدىڭ ستراتەگيالىق جوسپارىن, سونداي-اق تۋريستىك قىزمەتتىڭ جەكەلەگەن باعىتتارىن ىسكە اسىرۋ ماقساتىندا زاڭ جوباسىندا ءتۋريزمدى جىكتەۋ كوزدەلگەن", دەدى مينيستر.
سونداي-اق مينيستر باسىم تۋريستىك اۋماق (بتا) ۇعىمىن ەنگىزۋدى ۇسىندى.
"باسىم تۋريستىك اۋماقتى ەنگىزۋ – زاڭ جوباسىنىڭ نەگىزگى نوۆەللاسى. باسىم تۋريستىك اۋماق قۇرۋ ماقساتتارى: سينەرگەتيكالىق اسەر ەسەبىنەن تۋريستىك نارىقتا اۋماقتىڭ باسەكەگە قابىلەتىن ارتتىرۋ, تۋريستىك كلاستەرگە كىرەتىن تۋريستىك ۇيىمدار جۇمىسىنىڭ تيىمدىلىگىن ارتتىرۋ, رەسۋرستاردى (ماتەريالدىق, زياتكەرلىك) ءتۋريزمدى دامىتۋدىڭ نەعۇرلىم پەرسپەكتيۆالى نۇكتەلەرىنە شوعىرلاندىرۋ. باسىم تۋريستىك اۋماق – تۋريستىك سالاعا ينۆەستيتسيا مەن حالىقارالىق ستاندارتتاردى ەنگىزۋدى كوزدەيتىن ءىس-شارالار كەشەنى. اۋماقتى (گەوگرافيالىق شەكارالاردى) قر ۇكىمەتى ايقىندايدى", دەدى اقتوتى رايىمقۇلوۆا.
