استانالىق ۇجىم ءۇش تۋىندىنى تارتۋ ەتپەكشى: حورەوگراف اينۇر ابىلعازينانىڭ "تريۋمف" كلاسسيكالىق ديۆەرتيسمەنتءىنىڭپرەمەراسى, دجوردج ءبالانچيننىڭ "سەرەنادا" ءبىر اكتىلى بالەتى مەن ريكاردو امارانتەءنىڭ "Diversity" بالەتىنەن ءۇزىندى.
ونەرسۇيەر قاۋىم ديريجەر ارمان ورازعاليەۆتىڭ جەتەكشىلىگىندەگى سيمفونيالىق وركەستردىڭ ورىنداۋىندا پەتر چايكوۆسكي, انتونيو ۆيۆالدي, ليۋدۆيگ مينكۋس, الەكساندر گلازۋنوۆ, سەرگەي راحمانينوۆ, شارل گۋنو مەن كاميل سەن-سانستىڭ شىعارمالارىن تىڭداي الادى.
"مەنىڭ ويىمشا, جاس دارىندى حورەوگرافتارعا ساحناسىن ۇسىنا وتىرىپ, تەاتر ءوزىنىڭ شىعارماشىلىق قۋاتىن ايعاقتاپ وتىر. اينۇر ابىلعازينانىڭ "تريۋمف" ديۆەرتيسمەنتى چايكوۆسكيدىڭ مۋزىكاسىنا قويىلعان: وركەسترگە ارنالعان №3 سيۋيتا. بۇل تۋىندى العاشقى ەكەۋىمەن سالىستىرعاندا ەداۋىر اۋقىمدى, قارىمى كەڭ. اينۇر ابىلعازينا سيۋيتانىڭ تاقىرىپ پەن ۆارياتسيالار فورماسىندا جازىلعان سوڭعى ءبولىمىن العان. مۇندا سكريپكا سولوسى كەڭىنەن قولدانىلادى, وسىلايشا سوليستتەردىڭ دىبىستىق جانە تەحنيكالىق مۇمكىندىتەرىن تانۋعا بولادى. ءبىزدىڭ وركەستردە بۇل سولونى عالامات سكريپكاشى قالامقاس جۇماباەۆا ورىنداپ شىعادى", دەيدى ماەسترو ارمان ورازعاليەۆ.
"استانا بالەت" تەاترىنىڭ جەتەكشى ءسوليستى اينۇر ابىلعازينا بۇعان دەيىن جەكە بيلەردى قويعان بولاتىن. ال, "تريۋف" ونىڭ العاشقى كولەمدى جۇمىسى. وعان جيىرما شاقتى ءارتىس قاتىسادى. كلاسسيكالىق بي نەگىزدەرىنە سۇيەنگەن حورەوگراف اسەم, نازىك ءارى بيىك ونەر ۇلگىسىن ۇشتاستىرعان ديۆەرتيسمەنت جاساپ شىعاردى.
"بۇل تۋىندى – كلاسسيكالىق ونەرگە دەگەن تاعزىم. سەبەبى, كلاسسيكالىق بالەت بارلىق باعىتتار مەن ستيلدەردىڭ باستاۋ بۇلاعى عوي. ورىس بالەت مەكتەبىنىڭ نەگىزىن بىلگەندىكتەن, مەن, كىشكەنتايىمىزدان بويىمىزعا ءسىڭىرىپ وسكەن ونەرمەن, قازىرگى عاجايىپ جاي-كۇيىمىزبەن بولىسكىم كەلدى. ماعان سەنىم ارتىپ, حورەوگراف رەتىندە ءوزىمدى تانىتۋعا مۇمكىندىك بەرگەن تەاتر باسشىلىعىنا العىسىم شەكسىز. ءسوزسىز, ارتىستەرگە دە ءىلتيپاتىم ەرەكشە. ولار قۇرمەتىن تانىتىپ, ماعان قولداۋ ءبىلدىردى. قازىر مەن ءبارىن ەكشەپ جاتىرمىن. ارتىق كەتكەن تۇستارى بولسا الىپ تاستاپ, جەتىسپەي جاتقان بولسا كەيبىر ەلەمەنتتەردى قوسىپ جاتىرمىن. مەنىڭ باستى ماقساتىم وسى ءبيدى ءتيىستى دەيگەيدە كورسەتىپ شىعۋ. ال, ەموتسيالار كەيىنگە قالىپ وتىر", دەيدى حورەوگراف اينۇر ابىلعازينا.
پرەمەراعا دايىندىق قارقىن الىپ كەلەدى: رەپەتيتسيا زالىندا ارتىستەر جاڭا حورەوگرافيانى ۇيرەنىپ, كوستيۋمەرلەر رەپەرتۋارداعى سپەكتاكلدەردىڭ كوستيۋمدەرىن دايىنداپ, تىگىن تسەحى بولسا, بالەتتىڭ ەڭ جارقىن بەلگىلەرىنىڭ ءبىرى – كلاسسيكالىق پاچكانى دايىنداپ جاتىر.
تىگىن تسەحىنىڭ ىسمەرلەرىنىڭ ايتۋىنشا, ون قاباتتان تۇراتىن ءبىر بالەت پاچكاسىن دايىنداۋعا 14 - 16 مەتر ارنايى ماتا – قاتتى شىلتەر جۇمسالۋى مۇمكىن. ەر ادامدار بولسا, كلاسسيكالىق بالەت كانوندارىنا سايكەس تريكو مەن كولەت كيىپ شىعادى.
كلاسسيكالىق بالەت ونەرىنىڭ كەشى قر مادەنيەت جانە سپورت مينيسترلىگىنىڭ قولداۋىمەن جۇزەگە اسىرىلادى. باستالۋى 20-قاراشا, ساعات 19:30, 21-قاراشا, ساعات 18:00.
