قازاقستان جاعىنان كوميسسيانىڭ تەڭ توراعاسى - قر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ, كورەيا تاراپىنان وسى ەلدىڭ ساۋدا, يندۋستريا جانە ەنەرگەتيكا ءمينيسترى سون يۋن مو.
ۇكىمەتارالىق كوميسسيا وتىرىسىنىڭ كۇن تارتىبىندە قازاقستان-كورەيا سەرىكتەستىگىنىڭ بارلىق نەگىزگى سالالارى: ساۋدا جانە ەكونوميكا, ينۆەستيتسيالىق ىنتىماقتاستىق, ونەركاسىپ جانە ەنەرگەتيكا, كولىك جانە لوگيستيكا, اۋىل شارۋاشىلىعى, مادەنيەت جانە تۋريزم ماسەلەلەرى قامتىلدى.
ەكى ەل اراسىنداعى ساۋدا-ەكونوميكالىق جانە عىلىمي-تەحنيكالىق ىنتىماقتاستىق جونىندەگى ۇكىمەتارالىق كوميسسيا وتىرىسىن اشقان قر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ قازاقستان كورەيا رەسپۋبليكاسىنىڭ ورتالىق ازياداعى ءىرى ساۋدا سەرىكتەسى ەكەنىن اتاپ كورسەتتى. ەلىمىزدە قازىرگى ۋاقىتتا كورەيا كاپيتالىنىڭ قاتىسۋىمەن 400-دەن استام بىرلەسكەن كاسىپورىن جۇمىس ىستەيدى. سوڭعى 15 جىلدا كورەيادان قازاقستانعا 12 ملرد. اقش دوللارىنا جۋىق تىكەلەي ينۆەستيا سالىنعان.
مينيستر سون يۋن مو اتقارىلىپ جاتقان جۇمىستارعا قاناعاتتانارلىق ءبىلدىرىپ, «سامال جەل» بىرلەسكەن ەكونوميكالىق باعدارلاماسى اياسىندا ەلدەرىمىز اراسىندا 58 ءتۇرلى باعىت بويىنشا ىنتىماقتاستىق ورناتىلعانىنا توقتالدى.
وتىرىسقا قاتىسۋشىلار ەكى جاقتى ساۋدانىڭ قازىرگى جاعدايى مەن كولەمىن قاراستىرىپ, قازاقستان مەن كورەيا اراسىنداعى تاۋار اينالىمىن ءارى قاراي ارتتىرۋ مۇمكىندىكتەرىن تالقىلادى. سونداي-اق, كورەيا رەسپۋبليكاسىنىڭ پرەزيدەنتى مۋن چجە ءينننىڭ وتكەن جىلدىڭ ءساۋىر ايىندا قازاقستانعا جاساعان مەملەكەتتىك ساپارى ەكى ەل اراسىنداعى ءوزارا ىنتىماقتاستىقتى تەرەڭدەتۋگە ەلەۋلى ۇلەس قوسقانىن اتاپ ءوتتى.
سونىمەن قاتار تاراپتار Hyundai Motor Company جانە Astana Motors كومپانيالارىنىڭ الماتى قالاسىندا اۆتوموبيل قۇراستىرۋ زاۋىتىن ءساتتى ىسكە قوسقانىنا توقتالىپ, ەلىمىزدە اۆتوموبيلگە ارنالعان قۇراستىرۋشى بولشەكتەر ءوندىرىسىن ارتتىرۋعا مۇددەلىلىك تانىتتى.
لوگيستيكا, ترانزيت جانە كونتەينەرلىك جۇك تاسىمالدارى, جەر قويناۋىن پايدالانۋ, ساندىق تەحنولوگيالار جانە مەملەكەتتىك-جەكەمەنشىك سەرىكتەستىك نەگىزىندە ينفراقۇرىلىمدىق جوبالاردى دامىتۋ پەرسپەكتيۆالارى تالقىلاندى. اتاپ ايتقاندا, قالالار مەن نەگىزگى اۆتوماگيسترالداردا كريو جانار-جاعارماي ستانسالارىن سالۋدى جالعاستىرۋعا, وڭتۇستىك كورەيالىق تەحنولوگيامەن قازاقستاندا ەنەرگيا ۇنەمدەگىش شامدار ءوندىرىسىن جولعا قويۋعا قىزىعۋشىلىق ءبىلدىردى.
قازاقستان دەلەگاتسياسى ەكسپورتتىق الەۋەتى زور قازاقستاندىق تاۋارلار تىزىمىمەن كورەيانىڭ يمپورتەر كومپانيالارىن تانىستىرۋعا ۇسىنىس جاساپ, اۋىل شارۋاشىلىعى سالاسىندا «ناقتى ەگىنشىلىك» جانە «اقىلدى فەرمەرلىك», قۇرىلىس سالاسىندا ءۆىم-تەحنولوگيالارىن ەنگىزۋگە مۇددەلىلىك تانىتتى.
كورەيا تاراپىنان وتىرىسقا قاتىسۋشىلار قازاقستاننىڭ سپۋتنيكتىك باعدارلامالارىنا قاتىسۋعا قىزىعۋشىلىق ءبىلدىردى.
جيىن قورىتىندىسىندا ەكى ەلدىڭ مينيسترلەرى كوميسسيا جۇمىسى بارىسىندا ەكى جاقتى ىنتىماقتاستىقتىڭ وزەكتى ماسەلەلەرىن تالقىلاۋ مەن شەشۋدە پارمەندى مەحانيزم جانە قولايلى الاڭ رەتىندە كورسەتكەنىن اتاپ ءوتتى.
قازاقستان مەن كورەيا اراسىنداعى ساۋدا-ەكونوميكالىق جانە عىلىمي-تەحنيكالىق ىنتىماقتاستىق جونىندەگى ۇكىمەتارالىق كوميسسيانىڭ 9-وتىرىسىنىڭ قورىتىندىسىندا ءتيىستى حاتتاماعا قول قويىلدى.
