وسىدان بىرنەشە جىل بۇرىن «بولاشاق» ستيپەندياسىن جەڭىپ الىپ, انگليادا ەكى جىل ءبىلىم الۋعا مۇمكىندىك تۋعان ەدى. سول كەزدە اعىلشىنداردىڭ كۇندەلىكتى تۇرمىس-تىرشىلىگىن ءتۇسىنىپ, بىلايعى ۋاقىتتا اڭعارا بەرمەيتىن ءومىر سالتىنان ازداپ حاباردار بولعانىمىز بار.
لوندون قالاسىنىڭ ورتالىعىنا بارا قالساڭىز, قالىڭ بازارعا ءتۇسىپ كەتكەندەي اسەردە قالاسىز. ىعى-جىعى ادام كوپ. قالادا قاس قارايا كوشەدە توپىرلاپ جۇرەتىن ءنوپىردىڭ اياعى باسىلادى. ساعات ءتىلى تۇنگى 12-ءنى كورسەتەر تۇستا ىلۋدە بىرەۋ عانا كەزدەسەدى. ءتىپتى, ىردۋ-دىردۋدىڭ ناعىز ورتاسى سانالاتىن سوحو اۋدانىندا دا بەيمەزگىل كوشە كەزگەندەردى بايقامايسىڭ. وتە كەش جابىلاتىن پابتاردىڭ وزىندە بىرەن-ساران قوناق قانا سۋسىنىن ۇرتتاپ قويىپ مۇلگىپ وتىرادى. تۇنىمەن ۋ-شۋ كوڭىل كوتەرۋ, ءسويتىپ ەرتەسىنە جۇمىسقا كەشىگۋ دەگەن اتىمەن جوق.
تۇماندى البيونعا بارعانداعى باستى مىندەتىمىز ءبىلىم الۋ ەدى, «مارشرۋتىمىز» ۋنيۆەرسيتەت پەن ءۇيدىڭ اراسىنان الشاق كەتپەيدى. سول سەبەپتى اعىلشىنداردىڭ ەرتە ۇيىقتايتىنىن انگلياعا تابان تىرەگەننەن كەيىن ءۇش ايدان سوڭ, 31 جەلتوقساندا ءبىر-اق اڭعاردىم. جالپى, اعىلشىندار جاڭا جىلدى دۇركىرەتىپ تويلاي بەرمەيدى. جەر-جەردەن جاسىل شىرشالاردىڭ بوي كوتەرىپ, كوشەلەردەن قالىڭ قاربالاستى بايقاۋ قيىن. ايتسە دە, ءداستۇرلى تۇردە 31 جەلتوقساندا ۇلىبريتانيا پاتشايىمى ەليزاۆەتا II-ءنىڭ قاتىسۋىمەن بيگ بەننىڭ تۇسىندا, «لوندون كوزىنەن» فەيەرۆەرك اتىلادى.
وسى وتشاشۋدى تاماشالاۋعا تەمزانىڭ جاعالاۋىنا قاراي تارتتىق. قالىڭ نوپىرمەن بىرگە ءبىز دە وتشاشۋدى ساعات ءتىلى تۇنگى 12-ءنى كورسەتكەنگە دەيىن كۇتتىك. بىراق مەرەكەلىك سالتانات اياقتالعاننان سوڭ, كوپ ۇزاماي الگى ماڭدا ادام قاراسى ازايىپ قالدى. ءۇي الگى تۇسقا جاقىن بولعاندىقتان, تۇنگى لوندوندى سەرۋەندەپ قايتۋدى ءجون كورگەن ەدىك. قالانىڭ قاق جۇرەگى سانالاتىن حولبورن, كينگس كروسس اۋداندارى تىپ-تىنىش. مۇلدەم ەشكىم جوق. ءتىپتى, جاڭا جىلدى تويلاپ جاتقانداردىڭ دا قاراسى كورىنبەيدى. الدا-جالدا, قاي كۇن ەكەنىن بىلمەيتىن ادام سول ساتتە لوندونعا كەلە قالعاندا جاڭا جىلدىڭ ەسىك قاققانىن ايتىپ سەندىرە الماس ەدىك.
تاعى بىردە قازاقستانعا قايتاتىن ءبىر گرۋپپالاسىمدى تۇندە اۋەجايعا باراتىن پويىزعا شىعارىپ سالدىم. پويىز كينگس كروسست ستانساسىنان جۇرەدى ەكەن. كينگس كروسس – لوندونداعى ۇلكەن ستانسانىڭ ءبىرى. كۇندىز اعىلعان جولاۋشىدان كوپ نارسە جوق. ءبىرى شابادانىن كوتەرىپ پويىزعا اسىعىپ بارا جاتسا, كەلەسىسى جۇكتەرىن كوتەرىپ ستانسادان شىعا جونەلەدى... مەجەلەگەن ۋاقىت جاقىنداعاندا كينگس كروسسقا بەت الدىق. اشەيىندە قۇمىرسقانىڭ يلەۋىندەي ىعى-جىعى ستانسا ماڭى جىم-جىرت. قىبىرلاعان تىرشىلىك يەسى كورىنبەيدى. اينالا قۇلاققا ۇرعان تاناداي تىم-تىرىس. كۇنى بويى قاۋىرت تىرلىكتىڭ ورتاسى سانالاتىن كينگس كروسستىڭ قاس قارايا سايابىرسۋى دا اعىلشىنداردىڭ باسىن ەرتە جاستىققا قويۋىمەن تىعىز بايلانىستى.
قاراڭعى تۇسە حالىقتىڭ ءبارى توسەككە قۇلايدى دەۋ ابەستىك بولار. بەيسەنبى-سەنبى ارالىعىندا تۇنگى كلۋبتار كەش جابىلادى. ونىڭ وزىندە, تاڭعا دەيىن تارسىلداتىپ بيلەيتىندەر ساناۋلى عانا. ماسايراعان جاستار ءتۇن ورتاسى اۋا ءۇيدى-ۇيىنە تاراپ كەتەدى. ايتسە دە, حالىقتىڭ باسىم بولىگى ۋاقىتىلى دەمالۋعا داعدىلانعان.
ءسوزىمىز دالەلدى بولۋ ءۇشىن كوزىمىزبەن كورگەنگە قوسىمشا, ستاتيستيكالىق دەرەكتەر كەلتىرەيىك. ايتپاقشى, ۇلىبريتانيادا حالىقتىڭ ۇيقىسىن زەرتتەيتىن Sleeptember دەيتىن ۇيىم بار. وسى ۇيىمنىڭ زەرتتەۋىنە سايكەس, بريتانيالىقتار ورتا ەسەپپەن تۇنگى 10:40-تا ۇيىقتاپ قالادى ەكەن. ەرتە جاتقان ادامنىڭ ەرتە تۇراتىنى بەلگىلى. اعىلشىندار تاڭعى 6-دا وياۋ جۇرەتىن كورىنەدى. ءبىر ايتا كەتەرلىگى, زەرتتەۋ ناتيجەسى ەرتە جاتىپ, ەرتە تۇراتىن اعىلشىنداردىڭ تابىسى دا مول ەكەنىن كورسەتىپتى. بۇل از دەسەڭىز, ۇيقىنىڭ قىر-سىرىن زەرتتەپ تاستاعان تۇماندى البيون عالىمدارى تۇندە ۋاقتىلى تىنىققان اعىلشىندار ۇلىبريتانيا ەكونوميكاسىنا 50 ميلليارد دوللارداي پايدا اكەلەتىنىن ايتىپ وتىر.
ەرتە جاتقاندىقتان, ەرتە تۇرۋ دا ولارعا قيىنشىلىق تۋعىزا قويمايدى. سونىڭ ناتيجەسى شىعار, حالىقتىڭ تىرلىگى وڭعا باسىپ, مەملەكەت دامىپ كەلەدى. جارتى الەمدى باعىندىرعان يمپەريا وسىنداي بىرىزدىلىك ۇستانباسا, سول جەتىستىگىنە جەتۋى نەعايبىل ەدى.
وسىندايدا «ەرتە تۇرعان ەركەكتىڭ ىرىسى ارتىق, ەرتە تۇرعان ايەلدىڭ ءبىر ءىسى ارتىق» دەگەن حالقىمىزدىڭ اتالى ءسوزى ەسكە تۇسەدى. اعىلشىنداردىڭ ارەكەتىنە قاراپ, اتالعان ماقالدى «ەرتە تۇرعان ەلدىڭ ىرىسى ارتىق» دەپ وزگەرتسەك قاتەلەسپەيمىز.
