اتىراۋدا NCOC كومپانياسىنىڭ دەمەۋشىلىگىمەن ءمودۋلدى تيپتەگى ينفەكتسيالىق اۋرۋحانا پايدالانۋعا بەرىلدى. جاڭا اۋرۋحانادا 8 بلوك پەن 10 قوسالقى نىسان بار. مۇنىڭ ءبارى گەرمانيانىڭ «Modex» زاۋىتىندا شىعارىلعان مودۋلدىك تەمىربەتون بلوكتاردان قۇراستىرىلدى. مۇنداي ەكولوگيالىق تازا ماتەريال قىستا سىرتتاعى سالقىندى وتكىزبەي, ىشتەگى جىلۋدى ساقتايدى. ال جازداعى اپتاپ ىستىقتا دا اۋرۋحانا ءىشى قوڭىرسالقىن بولىپ تۇرادى. اۋرۋحانا عيماراتىنىڭ جالپى اۋدانى – 6764 شارشى مەتر.
وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆتىڭ ايتۋىنشا, جوعارى تەحنولوگيالىق مەديتسينالىق جابدىقتاردى قوسپاعاندا, جوبانى ىسكە اسىرۋ كەزىندە وتاندىق ماتەريالدار مەن تاۋارلاردى پايدالانۋعا باسىمدىق بەرىلىپتى. اۋرۋحانا 200 توسەككە ەسەپتەلىپ وتىر. ونىڭ ىشىندە 20 ورىن جانساقتاۋ جانە قارقىندى تەراپيا بولىمشەسىنە ارنالىپتى.
بۇل اۋرۋحانانى وسى زاماننىڭ تالابىنا ساي مەديتسينالىق ەمدەۋ ورنى دەۋگە ابدەن بولادى. وعان بىرنەشە سەبەپ بار. بىرىنشىدەن, مۇندا پاتسيەنتتەردى ەمدەۋ مەن دياگنوستيكالاۋعا قاجەتتى قۇرال-جابدىقتاردىڭ بارىمەن قامتىلىپ وتىر. وسىعان وراي پتر زەرتحاناسى, رەنتگەن مەن كومپيۋتەرلىك توموگرافيا كابينەتتەرى اشىلدى. ەكىنشىدەن, اۋرۋحانا دالىزىنە قاۋىپتى ينفەكتسيا تارالمايدى. وسى ماقساتتا پالاتالاردىڭ ىشىندە تەرىس قىسىم جاسايتىن ارنايى سورۋ-سىرتقا تاراتۋ جەلدەتكىشىمەن جابدىقتالدى. ۇشىنشىدەن, «لاس» جانە «تازا» ايماقتارعا بولىنگەن. تورتىنشىدەن, مۇنداعى اۋانى تازارتۋدىڭ وزگەشە ءادىسى قولدانىلادى. بۇعان اۋا تەرەڭ تازارتاتىن ORIT سۇزگى قوراپتارى ورناتىلعانى دالەل بولا الادى.
– وسىنىڭ ءبارى پاتسيەنتتەرگە, ەڭ الدىمەن دارىگەرلەرگە تونەتىن قاۋىپ-قاتەردى ايتارلىقتاي ازايتۋعا مۇمكىندىك بەرەدى. اعىندى سۋلاردىڭ قورشاعان ورتانى لاستاماۋىنا دا باسا ءمان بەرىلەدى. سوندىقتان اعىندى سۋ تولىق تازارتۋ كەزەڭىنەن وتەدى. ال جەدەل جاردەم كولىكتەرى دەزينفەكتسيالاۋ پۋنكتىنە وڭدەۋدەن وتكىزىلەدى. سونداي-اق مەديتسينالىق قالدىقتاردى زارارسىزداندىرۋ ستانساسى ىسكە قوسىلدى. رەانيماتسيا مەن قارقىندى تەراپيا بولىمشەلەرى مەمبرانا ارقىلى وتكەن تازا سۋ ءوندىرۋ جانە بۇيرەك جەتكىلىكسىزدىگى بار پاتسيەنتتەرگە ارنالعان دياليز اپپاراتتارىمەن جابدىقتالدى. پالاتاداعى ءاربىر توسەك مەديتسينالىق گازدار مەن وتتەگى جەلىسىنە قوسىلعان, دەيدى باسقارما باسشىسى.
بۇل اۋرۋحانانى بۇرىنعى ەمدەۋ ورىندارىنان ەرەكشەلەيتىن تاعى ءبىر تۇسى بار. بۇل – ەمدەلۋشىلەردىڭ دەنساۋلىق جاعدايىنا قاشىقتان مونيتورينگ جۇرگىزۋ. وسىعان بايلانىستى اۆتوماتتاندىرىلعان مونيتورينگ ورتالىعى جاساقتالعان. مەديتسينا قىزمەتكەرلەرى ەمدەلۋشىلەردىڭ اۋرۋ تاريحىن بۇرىنعىداي قالىڭ داپتەرگە قالاممەن جازىپ وتىرمايدى. ويتكەنى ولار ساراپتامالاردى پلانشەتتەر ارقىلى الماسادى. اقىلدى تەحنولوگيامەن اۆتوماتتى تۇردە شىعارىلاتىن دەرەكتەرگە ۋاقىتىلى وزگەرىس ەنگىزە الادى. وسىنداي سان الۋان ەرەكشەلىگى بار ينفەكتسيالىق اۋرۋحانانىڭ جوباسىن «Aqmol Project» جشس دايىنداپتى. ال قۇرىلىسىن «BI-Industrial» جشس ەكى ايعا جەتەر-جەتپەس مەزگىلدە, ياعني, 18 تامىز-15 قازان ارالىعىندا جۇرگىزدى.
وبلىستىق كارديولوگيالىق ورتالىق جانىنان قوسىمشا 50 ورىندىق عيمارات بوي كوتەردى. ءۇش قاباتتى جاپسارجايدىڭ قۇرىلىسى دا NCOC كومپانياسىنىڭ دەمەۋشىلىگىمەن سالىندى. مۇندا جۇرەك-قان تامىرلارى اۋرۋلارى بار ناۋقاستارعا مەديتسينالىق كومەك كورسەتۋ ءۇشىن ەكى وپەراتسيالىق پالاتا, التى توسەكتىك رەانيماتسيالىق بولمە, «فيليپس پروديۆا» فيرماسىنىڭ مرت اپپاراتىمەن, زەرتحانا, وتتەگىمەن قامتۋ جەلىسى بار. اۆتوماتتى جەلدەتۋ جانە اۋا باپتاۋ جۇيەسىمەن جابدىقتالىپ وتىر.
وبلىس اكىمى ماحامبەت دوسمۇحامبەتوۆتىڭ ايتۋىنشا, كارديوورتالىقتى كەڭەيتۋ جۇرەك-قان اۋرۋلارىنان بولاتىن ءولىم-ءجىتىمنىڭ الدىن الۋ ءۇشىن قولعا الىنىپ وتىر. ويتكەنى سوڭعى ۋاقىتتا بۇل ورتالىقتىڭ دارىگەرلەرىنە جۇگىنەتىن ناۋقاستار كوبەيىپ بارادى. مۇنى جىل باسىنان بەرى جۇرەككە 1000 وتا جاسالعانىنان بايقاۋ قيىن ەمەس.
– كارديولوگيالىق ورتالىقتىڭ قوسىمشا كورپۋسى وسى زامانعى مەديتسينالىق قۇرال-جابدىقتارمەن قامتىلدى. جاپسارجاي قۇرىلىسى جوسپارلانعان مەرزىمنەن ءبىر اي بۇرىن اياقتالدى. ءبىزدىڭ دەمەۋشىلىگىمىزبەن ىسكە اسىرىلعان جوبانىڭ قۇنى 5,2 ملرد تەڭگەنى قۇرايدى, دەيدى NCOC كومپانياسىنىڭ باسقارۋشى ديرەكتورى ريچارد حوۋۆ.
ال ورتالىقتىڭ باس دارىگەرى مارات قونىسوۆتىڭ مالىمەتىنشە, قوسىمشا عيماراتتىڭ اشىلۋى ونكولوگيادا بىرلەسكەن ادىستەردى جۇرگىزۋگە مۇمكىندىك بەرەدى. ەندى كارديوورتالىقتاعى توسەك سانى 150-گە جەتتى. بولاشاقتا بالالار كارديولوگياسىن دامىتۋ كوزدەلىپ وتىر.
– ءبىزدىڭ ورتالىقتا كارديولوگيادا قولدانىلاتىن زاماناۋي تەحنولوگيالاردى جەتىك مەڭگەرگەن ماماندارىمىز كوپ. پروتسەدۋرالار وتە قىمبات, بىراق پاتسيەنتتەر ءۇشىن ءبارى مەملەكەت ەسەبىنەن جۇرگىزىلەدى. مامانداردىڭ ورتاشا جاسى – 27-32-دە. جىل باسىنان بەرى ورتالىقتا 1000 وتا جاسالدى, دەيدى م.قونىسوۆ.
اتىراۋ وبلىسى
