سۋرەتتەردە: دروننان باقىلاعانداعى كورىنىس
ءبىرىنشى كەزەكتە اكىمشىلىك كودەكستىڭ 425-بابى نەگىزىندە تاۋلىكتىك جانە كۇندەلىكتى قولداناتىن شارالاردىڭ ارناسى كەڭەيە تۇسۋدە. مۇنىڭ ءوزى – رەيدتىك جانە جوسپاردان تىس تەكسەرۋلەر, سالىنعان ايىپپۇلدار مەن كەرى قايتارىلعان ماتەريالدار. ارينە, شەكتەۋ ءتارتىبى مەن نورمالارىن ساقتاماعان جەكە جانە زاڭدى تۇلعالارعا اكىمشىلىك شارالار قولدانۋ – باستى جانە جالاڭ ماقسات بولىپ قالماۋعا ءتيىس. ساقتانۋ جولدارى مەن ماسەلەلەرى ءار تۇرعىننىڭ سانا سەزىمىنەن بەرىك ورىن الماسا, بىردە-ءبىر اكىمشىلىك شارا نەمەسە وتباسىلىق باسقوسۋلار وتكىزگەنى ءۇشىن سالىنعان ايىپپۇل ويداعىداي ناتيجە بەرە قويۋى ەكىتالاي. بۇل تۋرالى ءوز وي-پىكىرىن قوبدا اۋدانىنىڭ اكىمى بولات كۋلوۆ بىلايشا جەتكىزدى.
– اۋدان ورتالىعىندا بىرنەشە مەيرامحانا بار. قازىر ونىڭ ءبارى دە جابىق تۇر. ارينە, ەل بولعان سوڭ ءوز ءۇيىنىڭ اۋلاسىندا كيىز ءۇي تىگىپ, شاعىن توي جاساعاندار كەزدەستى. ايتسە دە ولاردىڭ سانى ساۋساقپەن ساناپ الۋعا دا جەتپەيدى. دۇنيەدە كەز كەلگەن قۇبىلىستىڭ قادىر-قاسيەتى سالىستىرمالى تۇردە ايقىندالادى ەمەس پە؟ بۇل تۇرعىدا اۋدانىمىزدىڭ تۇرعىندارى بەلگىلەنگەن زاڭ مەن ءتارتىپتى ساقتاپ, وعان قۇلاق اسا الاتىندىعىمەن ەرەكشەلەنىپ وتىرعانىن ايتقىم كەلەدى. مىسالى, قازىرگى كۇنى سانيتارلىق دارىگەرلەردىڭ قويعان تالاپتارىن ورىنداۋ جونىنەن وبلىستا ەڭ الدىڭعى قاتاردا كەلە جاتقانىمىز – وسى وي-پىكىرىمنىڭ ايقىن دالەلى. ايتسە دە بۇل جايت بىزگە پروفيلاكتيكالىق شارالاردى ۇدايى جۇرگىزۋ ىسىنەن اجىراتا المايدى, – دەيدى ول.
بۇدان ءارى اۋدان باسشىسى اتالعان جاعىمدى جايت قوبدا وڭىرىندە بەلگىلەنگەن سانيتارلىق-ەپيدەميالىق تالاپتاردى بۇزۋ كورىنىسى جوق ەكەنىن بىلدىرمەيتىنىن اتاپ ءوتتى. قازىرگى ءىس-قيمىل سونى جويۋعا باعىتتالىپ وتىرعانىن جەتكىزدى. وسى ورايدا جاعدايدى جوعارىدان باقىلاۋعا باعىتتالعان دروندار ساتىپ الىنىپتى. وسىنى وزدىگىنەن باسقارىلاتىن اپپاراتتار جۇما, سەنبى جانە جەكسەنبى كۇندەرى اۋىل ىشىنە جەتكىزىلەدى ەكەن. مىنە, وبلىستىڭ وڭتۇستىك-باتىس بولىگىندە ورنالاسقان اۋداندا ىندەتتى اۋىزدىقتاۋ ءىسى وسىلايشا كۇننەن-كۇنگە بەلەڭ الىپ كەلەدى.
اقتوبە وبلىسى,
قوبدا اۋدانى
