قازاق ءانشىسى بالا كەزدە ارمانى قانداي بولعانىن, بوزبالا شاعىندا نەگە قىزىققانىن, العاشقى تابىسىن قاشان تاپقانىن ايتىپ بەردى, دەپ حابارلايدى قازاقپارات ءتىلشىسى.
"بالالىق شاقتى باقىتتى وتكىزدىم. كىشكەنە كەزدەن تاەكۆوندومەن اينالىسىپ, سۋعا ءجۇزدىم, ۆوكالىمدى كۇشەيتىپ, فورتەپيانودا وينادىم. قاراپايىم كوپ بالانىڭ ءبىرى بولدىم. مۋزىكا مەكتەبىنە بارىپ, سپورتتىق ۇيىرمەلەردەن قالمايتىنمىن", دەيدى ديماش قۇدايبەرگەن.
ونىڭ ايتۋىنشا, باسقا بالالار 2-3 جاسىنان باستاپ كولىكتىڭ سۋرەتىن سالسا, ديماش ستۋديانىڭ, كومپيۋتەردىڭ, دىبىس كۇشەيتكىشتەر مەن ميكروفونداردىڭ, ساحنانىڭ سۋرەتىن سالادى ەكەن.
"مەن سول كەزدە ءوزىمنىڭ ارماندارىم مەن جوسپارلارىمدى "عارىشقا جولدادىم". قازىر سول ارماندارىمنىڭ ءبارى دە ورىندالىپ جاتىر. ءۇش جاستا بولسام دا ۇلكەن ساحنانى ارماندايتىن ەدىم. باسقاشا ءومىردى ارمانداعان ەمەسپىن. ءاردايىم ءانشى, ءارتىس بولاتىنىمدى سەزەتىنمىن. ءالى دە وسى جولدا كەلەمىن", دەپ اتاپ ءوتتى ءانشى.
سۇحبات بارىسىندا ديماش ءوزىنىڭ بالالىق شاقتارىنىڭ ەستەلىگىمەن ءبولىستى.
"ماعان ۆەلوسيپەد ساتىپ بەرگەن كەز ءالى كۇنگە دەيىن ەسىمدە. رەسپۋبليكالىق دەڭگەيدەگى "اينالايىن" كونكۋرسىنا قاتىسىپ, بەس جاسىمدا لاۋرەات اتاندىم. ماعان العىس حاتپەن بىرگە مىڭ تەڭگە بەرىلدى. قازىر ول دەگەنىڭىز ءۇش دوللارعا تەڭ سوما. سول العىس حاتىممەن مىڭ تەڭگەنى اجەمە تەزىرەك تابىستاۋعا اسىققانىم ەسىمدە. اجەم وزىنە بىردەڭە السىن دەپ ويلادىم. ۇيگە قايتىپ بارا جاتقان كەزدە انامنان "تەڭگە سىزدە مە؟ قازىر اجەمە بەرەمىز" دەي بەرگەنىم ەسىمدە", دەيدى ءانشى العاشقى تابىسىنا بەس جاسىندا قول جەتكىزگەنىن ەسىنە الدى.
