ءبىلىم • 14 قاراشا، 2020

نۇر-سۇلتاندا "Bilim اll IT" جاڭا وقۋ ورتالىعى اشىلدى

30 رەت كورسەتىلدى

"Strong mothers NS" قوعامدىق قورى مەن ەلوردا اكىمدىگىنىڭ قولداۋىمەن سارىارقا اۋدانىندا "Bilim all IT" كومپيۋتەرلىك ساۋاتتىلىققا وقىتۋدىڭ جاڭا ورتالىعىن اشتى، دەپ حابارلايدى Egemen.kz

"ماقسات – كوپبالالى، جالعىزباستى، ەرەكشە بالالاردى تاربيەلەپ وتىرعان انالارعا كومەكتەسۋ. تامىز ايىنان باستاپ ءبىز بايقوڭىر اۋدانىندا وقۋ ورتالىعىن اشتىق، قىزمەتتەرگە سۇرانىس جوعارى بولدى. قازىر ءبىز وسىنداي ورتالىقتى سارىارقا اۋدانىنداعى انالاردىڭ ءوتىنىشى بويىنشا اشىپ وتىرمىز. ءبىزدىڭ مەكەمەدە بالالار اقىسىز ءبىلىم الادى. قوسىمشا كۋرستار، شاحمات، كوركەمونەر، دومبىرا ۇيىرمەلەرى بار. مۇندا انالار دا اعىلشىن ءتىلىن جانە كومپيۋتەرلىك ساۋاتتىلىقتى وقيدى. تاعى ءبىر ماقسات - انالارعا ارنالعان اقپاراتتىق قىزمەتتەر، ولاردى ءارتۇرلى شەبەرلىك سىنىپتارىنا شاقىرۋ. ورتالىقتى اشۋعا قولداۋ كورسەتكەنى ءۇشىن اكىمدىككە، قوعامدىق قور مۇشەلەرىنە العىسىمدى بىلدىرەمىن"، دەيدى "Strong mothers NS" قورىنىڭ قۇرىلتايشىسى ۇلجان مىرزاگەلديەۆا.

IT كۋرستارىمەن 250 ادامدى قامتۋ جوسپارلانعان. وقۋ ورتالىعى ەكى اۋىسىمدىق رەجىمدە جۇمىس ىستەيدى. كارانتين كەزىندە سانيتارلىق-ەپيدەميالىق ستاندارتتارعا سايكەس ۇيىمداعى ۇيىرمە جۇمىستارى وقۋ پروتسەسىنە كەدەرگى كەلتىرمەۋ ءۇشىن دەمالىس كۇندەرى وتكىزىلەدى.

"شامامەن 200-250 بالانى قامتۋ جوسپارلانعان. ءبىزدىڭ ماماندار جۇمىسپەن قامتۋ ورتالىعى ارقىلى كەلگەن جاس مۇعالىمدەر. بارلىق ساباقتار سانيتارلىق نورمالاردى ساقتاي وتىرىپ وتكىزىلەدى"، دەدى "Strong mothers NS" قورىنىڭ باسشىسى رايگۇل سەرىكباەۆا.

ەستەرىڭىزگە سالا كەتەيىك، بۇعان دەيىن ءبىرىنشى Bilim All ورتالىعى ءۋاليحانوۆ، 3 مەكەنجايى بويىنشا اشىلعان. وندا بارلىعى 300-گە جۋىق بالا بار. ورتالىقتا از قامتىلعان، كوپبالالى جانە تولىق ەمەس وتباسىلاردان شىققان جانە قولداۋدى قاجەت ەتەتىن وتباسىلاردىڭ بالالاپى ءارتۇرلى كۋرستاردا اقىسىز قوسىمشا ءبىلىم الا الادى. سونىمەن، ورتالىقتا كۇندىزگى توپتار، ورىس، قازاق، اعىلشىن جانە اراب تىلدەرى كۋرستارى، ماتەماتيكا، شاحمات كلۋبى، شەبەرحانا، گيتارا مەن دومبىرا ۇيىرمەلەرى بار.

بولاشاقتا ورتالىقتار ماستەر-كلاستار، پسيحولوگيالىق ترەنينگتەر، زاڭگەرلىك كەڭەستەر مەن قولداۋعا مۇقتاج انالارعا كومەكتەسۋ ءۇشىن كەزدەسۋلەر وتكىزۋدى جوسپارلاپ وتىر.

سوڭعى جاڭالىقتار

ۇقساس جاڭالىقتار