"سەنات جانىنداعى جاس ساراپشىلار كلۋبىنىڭ جۇمىسى بەلسەندى تۇردە جاندانىپ كەلەدى. كوپتەگەن جاس ازاماتتار وسى باستاماعا قىزىعۋشىلىق تانىتىپ, ونىڭ جۇمىسىنا قاتىسۋعا نيەت بىلدىرۋدە. ءبىز سەنات ۇيىمداستىراتىن ءتۇرلى باعىتتاعى ءىس-شارالارعا كلۋب مۇشەلەرىن جۇمىلدىرۋعا باسا ءمان بەرەمىز. قازىردىڭ وزىندە ۇتىمدى ۇسىنىستار مەن تىڭ يدەيالار كەلىپ ءتۇسىپ جاتىر", دەدى ماۋلەن اشىمباەۆ.
سونداي-اق, سەنات توراعاسى ساپالى ينتەرنەتسىز تسيفرلىق تەحنولوگيانى دامىتۋ مۇمكىن ەمەس ەكەنىن ايتتى. سوندىقتان سەناتورلار كەشە عانا وتكەن پالاتا وتىرىسىندا سالىق كودەكسىن جەتىلدىرۋگە ارنالعان زاڭ جوباسىنا جاڭا نورمالار ەنگىزدى. ول تۇزەتۋلەر بايلانىس وپەراتورلارىنا راديوجيىلىكتى قولدانعانى ءۇشىن تولەيتىن تولەمنىڭ 90 پايىزىن اۋىلدىق جەرلەردى كەڭ جولاقتى ينتەرنەتپەن قامتاماسىز ەتۋگە جۇمساۋعا مۇمكىندىك بەرەدى.
"قازىرگى تاڭدا بايلانىس وپەراتورلارى راديوجيىلىكتى قولدانعانى ءۇشىن جىل سايىن 17 ميللياد تەڭگە كولەمىندە قارجى تولەيدى. سەناتورلار وسى تولەمنىڭ 90 پايىزىن ولاردىڭ وزدەرىنە قالدىرۋدى ۇسىنىپ وتىر. بىراق وپەراتورلار بۇل قاراجاتتى, ەڭ الدىمەن, اۋىلدىق جەرلەردى كەڭ جولاقتى, ساپالى ينتەرنەتپەن قامتاماسىز ەتۋگە جۇمساۋ كەرەك. بۇل – مەملەكەت باسشىسىنىڭ ءتيىستى تاپسىرماسى اياسىندا وڭىرلەردەگى ينتەرنەت ينفراقۇرىلىمىن دامىتۋعا ارنالعان شارا", دەدى ماۋلەن اشىمباەۆ.
سەنات توراعاسى قازاقستان حالقىن, اسىرەسە, اۋىلدىق جەرلەردىڭ تۇرعىندارىن قولجەتىمدى ينتەرنەتپەن جانە ساپالى بايلانىسپەن قامتاماسىز ەتۋ ارقىلى تسيفرلىق تەڭسىزدىكتى جويۋدىڭ ماڭىزى زور ەكەنىن دە تىلگە تيەك ەتتى.
ءوز كەزەگىندە مينيستر باعدات مۋسين وسى ماڭىزدى ماسەلەگە ەرەكشە نازار اۋدارىپ, ونى وڭتايلى شەشۋگە اتسالىسىپ جاتقانى ءۇشىن سەنات دەپۋتاتتارىنا العىسىن ءبىلدىردى جانە ۆەدومستۆو الدىندا تۇرعان ناقتى سىن-قاتەرلەرگە توقتالىپ ءوتتى.
"تسيفرلاندىرۋدىڭ ەكى جاعى بار. ءبىرىنشىسى اشىقتىق بولسا, ەكىنشىسى – اقپارات قاۋىپسىزدىگى. حالىققا دەر كەزىندە كومەك كورسەتۋ ءۇشىن بارلىق مالىمەتتى ءبىر جۇيەگە جيناۋ – ءبىزدىڭ مىندەتىمىز. مىسالى, توتەنشە جاعداي كەزىندە تولەمدەردى تولەۋگە قاتىستى ماسەلەلەر مالىمەتتەردىڭ بولماۋىنان ەمەس, ولاردىڭ ءارتۇرلى دەرەكتەر بازاسىندا ساقتالۋىنان تۋىندادى. سوندىقتان ءبىز تسيفرلاندىرۋ ارقىلى حالىققا الدىن الا كومەك كورسەتەتىن جۇيە قۇرۋدى كوزدەپ وتىرمىز. ءبىز ازاماتتار 4 بالاسى بار ەكەنىن وزدەرى كەلىپ ايتقانىن كۇتىپ وتىرماۋىمىز كەرەك. قايتا ولاردىڭ مارتەبەسى وزگەرىپ, كوپ بالالى اتا-انا اتانعانىن الدىن الا ءبىلۋىمىز قاجەت. سول كەزدە جاردەماقى الۋ, بالاباقشاعا ورنالاسۋ ماسەلەلەرىن شەشۋ جەڭىلدەي تۇسەدى. ينفراقۇرىلىمعا قاتىستى ناقتى تۇيتكىلدەر بار. سوندىقتان وڭىرلەردە ينتەرنەتتى دامىتۋ ماقساتىمەن وپەراتورلاردى ىنتالاندىرۋ باعىتىندا قولداۋ كورسەتكەنى ءۇشىن سەناتورلارعا العىسىمىزدى بىلدىرەمىز", دەدى باعدات مۋسين.
وتىرىسقا قاتىسقان جاس ساراپشىلار دا وسى ماسەلەگە قاتىستى ءوز پىكىرلەرىن ءبىلدىرىپ, تسيفرلاندىرۋدىڭ نەگىزگى قىرلارىنا توقتالدى. كلۋب مۇشەلەرى اشىق ۇكىمەتتى دامىتۋ جانە تسيفرلىق ءبىلىم بەرۋ ماسەلەلەرى بويىنشا, سونداي-اق, دەنساۋلىق ساقتاۋ سالاسىندا تسيفرلىق تەحنولوگيانى قولدانۋ پرەسپەكتيۆالارىنا قاتىستى ۇسىنىستارىن جەتكىزدى.
مينيستر باعدات مۋسين بارلىق ۇسىنىستى مۇقيات تالقىلاۋعا دايىن ەكەنىن جانە ولاردى الداعى جۇمىس بارىسىندا ەسكەرەتىنىن ايتتى.
