سالتاناتتى جيىندا ءسوز باستاعان اقپارات جانە قوعامدىق دامۋ ءمينيسترى ايدا بالاەۆا بۇل ماراپاتتىڭ Astana Media Week جوباسى اياسىندا ۇيىمداستىرىلعانىن اتاپ ءوتتى.
ء"ۇش كۇنگە سوزىلعان Astana Media Week جوباسى حالىقارالىق جۋرناليستيكانىڭ نازارىن ەلوردامىزعا اۋدارعان ەرەكشە ءىس-شارا بولدى. بۇگىندە بۇكىل الەمدى ابىگەرگە سالعان پاندەميا جاعدايىندا الەم جۋرناليستەرى ءبىر ارنادا توعىسىپ, ءوز كاسىپتەرىنە دەگەن ادالدىقتى كەزەكتى رەت دالەلدەپ وتىر. ونلاين فورماتتاعى پلاتفورمادا الەمنىڭ 16 مەملەكەتىنىڭ كورەرمەندەرى ءۇشىن 50-دەن استام حالىقارالىق مەدياساراپشى تاجىريبەلەرىمەن ءبولىستى. ەڭ باستىسى – ءبىزدىڭ وتاندىق جۋرناليستيكا دەڭگەيى دە الەمدىك باسەكەگە قابىلەتتىلىگىنە كوز جەتكىزدىك", دەدى مينيستر ايدا بالاەۆا.
وتاندىق پلاتفورما اقش, ۇلىبريتانيا, شۆەتسيا, ساۋد ارابياسى, رف سياقتى مەدياالپاۋىت مەملەكەتتەردىڭ اقپارات كەڭىستىگىنە شىعىپ, پايدالى كونتەنتپەن ءبولىستى.
"وسىنداي ورتاق الاڭعا ءوزارا تاجىريبە الماسىپ, وزىق ۇلگىلەردى ۇيرەنۋ جۋرناليستيكانىڭ بىلىكتىلىگىن جەتىلدىرىپ, ونى جاڭا دەڭگەيگە كوتەرەتىنى انىق. سونىڭ ىشىندە وتاندىق مەديا سالاسىندا ودان ءارى دامۋىنا ۇلكەن سەرپىن بەرەدى دەپ سەنەمىز. "ۇركەر" ۇلتتىق بايگەسىنىڭ ماراپاتتاۋ ءراسىمى Astana Media Week اپتالىعى اياسىندا ءوتىپ وتىر. ارينە, ءبىز ءۇشىن قوعامداعى ءار سالانىڭ وزىندىك ورنى بار. جۋرناليستيكانىڭ قوعام ءۇشىن اتقارىپ وتىرعان ەڭبەگى وتە زور. ءاربىر ەڭبەك لايىقتى باعاسىن الۋى كەرەك دەپ سانايمىز. ءبىزدىڭ بۇگىنگى شارامىز دا وسى نيەتپەن وتكىزىلىپ وتىر. سوندىقتان ءبىزدىڭ ءادىل قازىلار القاسى جۇزدەن جۇيرىك شىققان شىن تالانتتارعا لايىقتى باعاسىن بەرگەنىنە سەنىمدىمىز", دەدى مينيستر.
مينيستر وسى جىلعى بايقاۋدىڭ تاعى ءبىر جاڭالىعى – قازاق جۋرناليستيكاسىنىڭ اقتاڭگەرى شەرحان مۇرتازا اتىنا ارنايى نوميناتسيا تاعايىندالعانىن تىلگە تيەك ەتتى.
"شەرحان اعامىزدىڭ وتاندىق جۋرناليستيكانى دامىتۋدا اتقارعان ەڭبەگى مەن قوسقان ۇلەسى ولشەۋسىز. سوندىقتان, قازاق جۋرناليستيكاسىنىڭ اسقار شىڭى سانالاتىن شەراعا اتىنداعى ماراپاتقا يە بولۋ – كىمگە بولسىن زور مارتەبە, بيىك جەتىستىك دەپ بىلەمىن", دەدى ايدا بالاەۆا.
ەستەرىڭىزگە سالا كەتەيىك, اتالعان نوميناتسيا بويىنشا جۇلدە قورىن بەلگىلى جۋرناليست قاينار ولجاي جەڭىپ الدى.
