بيىلعى جىلدىڭ 19-شى قازانى مەن 10-شى قاراشاسىندا ارالىعىندا 395 نىسان تەكسەرىلدى: 51 حالىققا قىزمەت كورسەتۋ ورتالىعى, 43 قازپوشتا بولىمشەسى, 60 ەكىنشى دەڭگەيلى بانك بولىمشەسى, 15 قوعامدىق كولىك, 226 مەملەكەتتىك مەكەمە. ونىڭ ىشىندە ارشالى, ءبىرجانسال, ەرەيمەنتاۋ, ەسىل, جاقسى, جارقايىڭ, قورعالجىن, شورتاندى اۋداندارى جانە كوكشەتاۋ قالاسىنداعى 24 نىساندا اقمولا وبلىسىنىڭ مەملەكەتتىك باس سانيتاريالىق دارىگەرىنىڭ قاۋلىسىنىڭ تالاپتارى بۇزىلعاندىعى انىقتالدى.
"وسى ارالىقتا كارانتيندىك جانە ەپيدەمياعا قارسى شارالاردىڭ بۇزىلۋىنا بايلانىستى 6 اكىمشىلىك حاتتاما تولتىرىلدى. ارشالى اۋدانىنىڭ قازپوشتا بولىمشەسىنە 41670 تەڭگە, ەسىل اۋداندىق حقكو مەن اقمولا ەلەكتر جەلىسىن تاراتۋ كومپانياسىنىڭ باسشىلىعىنا 83340 مىڭ تەڭگە, قورعالجىن اۋدانىنىڭ مەملەكەتتىك مەكەمەلەرىنە 83340 مىڭ تەڭگە, ستەپنوگوردەگى جەكە تۇلعالالارعا 41670 تەڭگە ايىپپۇل سالىندى. 23 اكىمشىلىك ماتەريالدار قارالىپ جاتىر", دەلىنگەن ۆەدومستۆونىڭ مالىمەتىندە.
وسى رەتتە, مونيتورينگتىك توپ الدىندا اقمولا وبلىسىنىڭ مەملەكەتتىك باس سانيتاريالىق دارىگەرىنىڭ قاۋلىسىنداعى سانيتارلىق تالاپتاردىڭ ساقتالۋىن باقىلاۋدى نىعايتۋ جانە اكىمشىلىك شارانى قولدانۋ ارقىلى ىقپال ەتۋ مىندەتى تۇر. بۇعان اقمولا وبلىسى اۋماعىندا, ونىڭ ىشىندە كوكشەتاۋ قالاسىندا ەپيدەميالىق جاعدايدىڭ, ياعني كوروناۆيرۋس ينفەكتسياسىن جۇقتىرعانداردىڭ سانى ارتىپ وتىرعاندىعى سەبەپ بولىپ وتىر.
