سۋرەتتە: ماسانچي اۋىلىنىڭ تۇرعىنى ابدۋراشيد باگيەۆ وتباسىمەن بىرگە
"مەن ەلىمىزدىڭ پرەزيدەنتىنە, بارلىق قامقور قازاقستاندىقتارعا كورسەتىلگەن كومەك ءۇشىن ريزاشىلىعىمدى بىلدىرگىم كەلەدى. مەنىڭ اكەم دە, مەن دە وسىندا دۇنيەگە كەلدىك. ءبىزدىڭ وتانىمىز – وسى", دەيدى ا.باگيەۆ.
ءابدۋراشيدتى اۋىلداسى يۋسۋف پاروۆ تا قولداپ, ءوزىنىڭ دە تىرشىلىگى قالىپتى كۇيگە ورالعانىن جەتكىزدى.
سۋرەتتە: ماسانچي اۋىلىنىڭ تۇرعىنى يۋسۋف پاروۆ
"كومەك قولىن سوزعانداردىڭ بارلىعىنا - بيلىككە دە, قاراپايىم تۇرعىندارعا دا العىسىمىز شەكسىز", دەيدى اعىنان جارىلىپ يۋ.پاروۆ.
قازىرگى تاڭدا بالالار مەن جاستاردىڭ ءجيى شوعىرلاناتىن ورنىنا اينالعان ءماسانچيدىڭ ورتالىعىندا تىرشىلىك قىزا تۇسكەن. مۇندا "سامۇرىق-قازىنا" ۇلتتىق ءال-اۋقات قورىنىڭ قولداۋىمەن, جەرگىلىكتى بالالارعا ارنالعان ويىن الاڭى اشىلعان. الاڭ اتكەنشەكتەر, سىرعاناقتار جانە شۆەد قابىرعالارى مەن بەسەدكالارمەن جابدىقتالعان. ونىڭ قاسىنداعى زاماناۋي شاعىن فۋتبول الاڭقايى دا جاسوسىپىرىمدەردىڭ يگىلىگىنە جاراۋدا.
سۋرەتتە: ماسانچي اۋىلىنداعى سپورت جانە ويىن الاڭقايى
وعان جاقىن ماڭدا كورشى ماسانچي جانە قاراكەمەر اۋىلدارىنىڭ اقساقالدارى جاستاردى باقىلاپ, جايما-شۋاق اڭگىمە-دۇكەن قۇرۋدا.
سۋرەتتە: قاراكەمەر جانە ماسانچي اۋىلدارىنىڭ اقساقالدار كەڭەسى
"ماسانچيگە قوش كەلدىڭىزدەر!", دەپ اۋىلدىق وكرۋگتىڭ اقساقالدار كەڭەسىنىڭ توراعاسى دىدىر دۆۋماروۆ ءبىزدى جىلى قارسى الدى.
"كەيىنگى ايلاردا ءبىز ۇلكەن وزگەرىستەردى باستان كەشتىك. كوشەلەردىڭ بارلىعى دەرلىك اسفالتتالىپ, ينتەرنەتپەن قامتىلىپ, مادەني, ءبىلىم بەرۋ جانە سپورت نىساندارى سالىنۋدا. گاز تارتىلىپ, دۇكەندەر مەن ۇيلەر قالپىنا كەلتىرىلدى. اسىرەسە, ءبىز, اعا بۋىن جاس ۇرپاقتى قازاقستاندىق پاتريوتيزم رۋحىندا, مەملەكەتتىك ءتىلدى قۇرمەتتەۋ جانە ۇيرەنۋگە تاربيەلەۋدەمىز. قازاق ءتىلى ءبىزدىڭ بالالارىمىزعا ۇلكەن مۇمكىندىكتەر اشادى", دەيدى اۋىل تۇرعىنى.
سۋرەتتە: دىدىر دۆۋماروۆ, ماسانچي اۋىلدىق وكرۋگى اقساقالدار كەڭەسىنىڭ توراعاسى
ونىڭ قاراكەمەر اۋىلىنداعى ارىپتەسى ەرعازى بوزشاەۆ تا باۋىرلاس حالىقتار اراسىنداعى تىعىز قارىم-قاتىناس تۋرالى اتاپ ءوتتى.
ء"بىز ارقاشان بەيبىت ءومىر ءسۇرىپ كەلدىك جانە الداعى ۋاقىتتا دا تاتۋ-ءتاتتى تىرشىلىگىمىز جالعاسا بەرەدى. ءبىزدىڭ بولىسە الماي جۇرگەن ەشتەڭەمىز جوق", دەپ سەنىم ءبىلدىردى ەرعازى اتا.
قاريالارعا قاراپ, بۇل جاي ايتىلا سالعان ءسوز ەمەس ەكەنىن سەزىنەسىز. سىيلاستىعى جاراسقان قارتتار ءوزارا ۇزاق اڭگىمەلەسىپ, ورتاق ىستەردى تالقىلادى. ولار اۋىل جاستارى ءۇشىن فۋتبولدان جولداستىق كەزدەسۋ ۇيىمداستىرۋ, اۋىل تۇرعىندارىمەن كەزدەسۋ سەكىلدى يگى ىستەردى جوسپارلاپ وتىر. اقساقالدار ءبىر-ءبىرىن قۇشاقتاپ, ىزگى تىلەكتەرىن ايتىپ, اسەرلى تارقاستى.
سۋرەتتە: قاراكەمەر اۋىلىنداعى تۇرعىن ۇيلەردىڭ قۇرىلىس جۇمىستارى
ايتپاقشى, قاراكەمەر اۋىلىندا جاس ماماندارعا ارنالعان ەكى پاتەرلى 10 ءۇيدىڭ قۇرىلىسى اياقتالۋدا, 16 كوشەگە اسفالت توسەلىپ, دارىگەرلىك امبۋلاتوريا بوي كوتەردى, سۋ قۇبىرى قايتا جاڭارتىلدى, گاز قۇبىرى تارتىلۋدا.
سۋرەتتە: قاراكەمەر اۋىلىنداعى كوشەلەردى اباتتاندىرۋ جۇمىستارى
قورداي اۋدانىنىڭ ءبىلىم بەرۋ سالاسى دا باسقا سالالار سەكىلدى, ناعىز وڭ وزگەرىستەردى باستان وتكەرۋدە. مۇنىڭ جارقىن مىسالى رەتىندە ماسانچي اۋىلىندا سالىنىپ جاتقان 600 ورىندىق قازاق جانە ورىس مەكتەبى. بۇگىندە نەگىزگى عيماراتتىڭ قابىرعالارى تۇرعىزىلىپ ۇلگەرگەن, نىساننىڭ ەكىنشى عيماراتى سالىنۋدا, ولاردى ءوزارا ۇيلەسىمدەگى گالەرەيالىق قۇرىلىس بايلانىستىرادى. قۇرىلىس 2021 جىلدىڭ تامىز ايىندا اياقتالادى دەپ كۇتىلۋدە.
سۋرەتتە: ماسانچي اۋىلىندا مەكتەپ قۇرىلىسى
ء"بۇل بىلىم وشاعىنىڭ اشىلۋىمەن ماسانچي اۋىلىنداعى مەكتەپتەردىڭ جۇكتەمەسىنە قاتىستى ماسەلە شەشىلمەك. ءبىلىم بەرۋ مەكەمەسىنىڭ قۇرىلىسىنان باسقا, 41 كوشە اسفالتتالىپ, بالالار مەن سپورت الاڭدارى جابدىقتالدى. گازبەن قامتۋ جۇمىستارى جۇرگىزىلۋدە. ماگيسترالدىق گاز قۇبىرى تارتىلىپ, ەندى كۆارتالىشىلىك جەلىلەر ورناتىلۋدا. بۇگىنگى كۇنى 140 ءۇي كوگىلدىر وتىندى تۇتىنۋعا دايىن. ءبىز گازعا قوسۋدى قاراشانىڭ ەكىنشى جارتىسىنا جوسپارلاپ وتىرمىز", دەيدى ماسانچي اۋىلدىق وكرۋگى اكىمىنىڭ ورىنباسارى حۋسەين بۋلار.
سۋرەتتە: بيىل قورداي اۋدانىنىڭ 22 اۋىلىنىڭ تۇرعىندارى گازبەن قامتىلادى
"قازترانسگاز" ۇلتتىق وپەراتورى جامبىل وبلىسىنىڭ اكىمدىگىمەن بىرلەسىپ, 73 شاقىرىم گاز قۇبىرىن تارتتى. 3,7 ملرد. تەڭگە ينۆەستيتسيالىق باعدارلاما ەسەبىنەن "قازترانسگاز" كومپانياسى العاشقى 42 شاقىرىم جەلىنى جۇرگىزىپ, ناتيجەسىندە وتەگەن جانە قاراسۋ اۋىلدارىنىڭ تۇرعىندارى گازعا قوسىلدى.
وتەگەن اۋىلىنداعى توعىز جاسار نۇرسۇلتان اناسى ايگۇل ابدۋلداەۆانىڭ گاز وتتىعىن ابايلاپ تۇتاتىپ جاتقانىن قىزىعۋشىلىقپەن تاماشالاۋدا. بيولوگيا ءپانىنىڭ مۇعالىمى وسى ءساتتى ۇيگە كەلىن بولىپ تۇسكەن كەزدەن, ياعني جيىرما جىلدان بەرى كۇتكەن. بۇگىندە ول الا تاڭنان وتىن مەن كومىر دايىنداپ, جۇمىستان كەيىن ۇيگە اسىعىپ, پەش جاعىپ, سۋىق ءۇيدى جىلىتۋ سەكىلدى بەينەتتى جۇمىستاردى ۇمىتقان.
سۋرەتتە: وتەگەن جانە قاراسۋ اۋىلدارىنىڭ تۇرعىندارى قازىردىڭ وزىندە كوگىلدىر وتىندى قولدانۋدا
جولداسى باقيعا اتتانعان ايگۇل جالعىز ءوزى ءتورت بالا تاربيەلەپ وتىر. كوگىلدىر وتىنعا قول جەتۋىمەن كوپتەگەن ماسەلەلەردىڭ شەشىلگەنىن جەتكىزدى. سونىمەن بىرگە 233 اۋلانى قۇرايتىن اتالعان اۋىلدىڭ 24 وتباسى دا تابيعي گازعا قوسىلىپ ۇلگەرگەن.
سۋرەتتە: ايگۇل ابدۋلداەۆا وتباسىمەن بىرگە
"جۇمىستار جۇرگىزىلۋدە, كورشى قاراسۋ اۋىلىندا 1018 ءۇيدىڭ 127-ءسى گازداندىرىلدى, مەردىگەرمەن جاسالعان كەلىسىم-شارتقا سايكەس ۇيگە قۇبىر جەتكىزۋدىڭ جالپى قۇنى 350 مىڭ تەڭگەنى قۇرايدى. تۇتىنۋشى باستاپقى تولەم رەتىندە 100 مىڭ تەڭگە تولەيدى, قالعان سومانى ايىنا 25 مىڭ تەڭگەدەن 10 ايدا ءبولىپ تولەيدى. شارتتارى وتە ىڭعايلى, ادامدار ونى ءتيىمدى پايدالانۋدا", دەپ اتاپ ءوتتى قاراسۋ اۋىلدىق وكرۋگى اكىمىنىڭ مىندەتىن اتقارۋشى رايا جاسىباەۆا.
ءبىر-ەكى اپتادان كەيىن ورتالىقتاندىرىلعان سۋ قۇبىرى جۇمىس ىستەي باستايتىن ارال اۋىلىنىڭ تۇرعىندارىن دا جاقسى جاڭالىقتار كۇتىپ تۇر. جۇمىسپەن قامتۋدىڭ جول كارتاسى شەڭبەرىندە سۋ قابىلداعىش نىسانىنىڭ قۇرىلىسى مەن قۇبىرلاردى جۇرگىزۋ جۇمىستارى اعىمداعى جىلدىڭ مامىر ايىنىڭ ورتاسىندا باستالعان, مەردىگەر "تەمىرسترويسەرۆيس جانە ك" جشس تاۋەلسىزدىك كۇنىنە دەيىن سۋعا قوسۋعا ۋادە بەرىپ وتىر.
ء"بىز 20 شاقىرىم قۇبىر تارتىق, ءبىرىنشى جانە ەكىنشى كوتەرمەلى سورعى ستانتسيالارىن ورناتتىق, قازىرگى ۋاقىتتا اۋماقتى اباتتاندىرۋ جانە جارىقتاندىرۋمەن اينالىسۋدامىز", دەدى "تەمىرسترويسەرۆيس جانە ك" جشس ينجەنەر-سمەتاشىسى جالعاسباي ۇلىمبەتوۆ.
سۋرەتتە: ءالجان انا اۋىلىنداعى سپورتتىق-ساۋىقتىرۋ كەشەنىنىڭ قۇرىلىسى
سونداي-اق, قۇرىلىسىنا 321 ميلليون تەڭگە باعىتتالعان ءالجان انا اۋىلىنداعى سپورتتىق-ساۋىقتىرۋ كەشەنى دە تاۋەلسىزدىك كۇنىنە دەيىن پايدالانۋعا بەرىلمەك. "اگروسپەتسستروي" جشس باسشىسى قايرات نارتباەۆتىڭ ايتۋىنشا, ىشكى جۇمىستاردىڭ 95 پايىزى اياقتالىپ, رەزەرۆتىك ديزەل گەنەراتورى ورناتىلعان. تاراتۋ شكاف پۋنكتىن قۇرۋ ءۇشىن ارنايى ماماندار تارتىلعان.
"اۋا-رايى ازىرگە قۇرعاق جانە جىلى بولىپ تۇر, وسىنى پايدالانىپ اۋماققا اسفالت توسەۋ جۇمىستارىن ورىنداپ ۇلگەرۋىمىز كەرەك", دەپ قوستى قۇرىلىسشى.
سۋرەتتە: قورداي اۋىلىنداعى تۇرعىن ۇيلەردىڭ قۇرىلىسى
اتالعان كومپانيانىڭ تاعى ءبىر وكىلى, باس ديرەكتوردىڭ ورىنباسارى نۇرلان سەرىكباەۆ جۋرناليستەرگە اۋدان ورتالىعىنىڭ "باتىس" القابىنداعى 60 پاتەرلىك ءۇش ءۇيدىڭ قۇرىلىسى تۋرالى ايتىپ بەردى. قۇرىلىس كەستەگە ساي جۇرگىزىلۋدە دەسەك, اعىمداعى جىلدىڭ 23 جەلتوقسانىنان كەشىكتىرىلمەي ءتيىستى تۇرعىندار قونىس تويىن تويلايدى دەپ كۇتىلۋدە. ەكى ءۇي دە اۋدانى 65 شارشى مەتردەن اسپايتىن, ءتورتىنشى جايلىلىق كلاسىنداعى ءبىر, ەكى جانە ءۇش بولمەلى پاتەرلەردەن تۇرادى. قۇرىلىس باسىندا 200-دەن استام ادام تەر توگۋدە, ولاردىڭ جارتىسى جەرگىلىكتى جۇمىسپەن قامتۋ ورتالىعى ارقىلى قامتىلعان. تەك قانا قازاقستاندىق قۇرىلىس ماتەريالدارى قولدانىلۋدا. ۇيلەر 85-90 پايىزعا دايىن. دەمەك, جىل سوڭىنا دەيىن كەزەكتە تۇرعان 1542 ادامنىڭ بىرقاتارى جەكە باسپانالى بولادى دەپ سەنىممەن ايتا الامىز.
وركەنيەت يگىلىكتەرى ءالجان انا اۋىلىنىڭ ت.رىسقۇلوۆ اتىنداعى №23 ورتا مەكتەبىندە دە كەڭىنەن قولدانىلۋدا. ءبىلىم ورداسى وڭىرلەردى دامىتۋ باعدارلاماسى اياسىندا كۇردەلى جوندەۋدەن وتكەن. تەحنيكالىق قاداعالاۋ وكىلى ەمەن كيىكباەۆتىڭ ايتۋىنشا, جۇمىسشىلاردىڭ جەتىسپەۋشىلىگى ماسەلەسى تۋىنداعان. دەگەنمەن جۇمىستار ويداعىداي اياقتالۋدا, وقۋ ورنى اكىمشىلىگىنىڭ جۇمىس ساپاسىنا كوڭىلدەرى تولادى.
سۋرەتتە: ءالجان انا اۋىلىنداعى №23 مەكتەپتىڭ ديرەكتورى ءاليا بايگەلوۆا
مەكتەپ اشىلعاننان بەرى, ياعني 1972 جىلدان باستاپ كۇردەلى جوندەۋ كورمەگەن. ەندى باستاۋىش سىنىپ وقۋشىلارى اشىق جانە كەڭ كابينەتتە ءبىلىم الاتىن بولادى. بارلىق ەڭبەك ۇجىمىنىڭ, وقۋشىلار مەن اتا-انالاردىڭ اتىنان مەملەكەت باسشىنا وسىنداي تارتۋ ءۇشىن العىس بىلدىرەمىن, - دەدى ءاليا بايگەلوۆا قۋانىشتى كوڭىل كۇيمەن.
ال سورتوبە اۋىلىنداعى ء"بۇلدىرشىن" بالاباقشاسىنىڭ مەڭگەرۋشىسى ايشا يدىبو مۇنداي مەكتەپكە دەيىنگى ءبىلىم بەرۋ مەكەمەسى وزگە اۋدان ورتالىقتارىندا جوق ەكەنىن ماقتانىشپەن ايتادى. سونداي-اق, ول جامبىل وبلىستىق "ۆىنحۋا" دۇنگەن ەتنومادەني ورتالىعى قاۋىمداستىعىنىڭ توراعاسى قىزمەتىن قوسا اتقارادى. بۇگىنگى تاڭدا قاۋىمداستىق دۇنگەندەر اراسىندا بەلسەندى تۇردە مەملەكەتتىك ءتىلدى كەڭىنەن ناسيحاتتاپ, ۇيرەتۋمەن اينالىسۋدا.
سۋرەتتە: ماسانچي جانە سورتوبە اۋىلىنداعى تۇرعىنداردىڭ باسىم بولىگى قازاق ءتىلىن مەڭگەرۋدە
سورتوبە اۋىلىنداعى 110-عا جۋىق تۇرعىن ەكى ايلىق قازاق ءتىلىن مەڭگەرۋ بويىنشا كۋرسقا قاتىسۋدا, ونىڭ ىشىندە مەكتەپكە دەيىنگى مەكەمەلەردىڭ تاربيەلەنۋشىلەرى مەن تەحنيكالىق قىزمەتكەرلەرى, كاسىپكەرلەر جانە يمامدار, سونداي-اق, ءۇي شارۋاسىنداعى ايەلدەر دە بار. بىزگە تاراز قالاسىنداعى "تىلدەردى وقىتۋ" ورتالىعىنان ماماندار ارنايى كەلىپ, ناتيجەسىندە ءبىز ءتىلدى باستاپقى دەيگەيدە مەڭگەرىپ شىقتىق. ءارى قاراي دا وقۋدى جالعاستىرساق دەيمىز, ويتكەنى, نيەت ءبىلدىرىپ وتىرعان جاندار كوپ. الايدا, قاراشا ايىنا جوسپارلانعان وقۋ كۋرسى كەلەسى جىلدىڭ قاڭتار ايىنا اۋىستىرىلدى.
سۋرەتتە: اعىمداعى جىلى قازاق تىلىندە وقىتاتىن سىنىپتاردىڭ سانى ارتتى
"بالاباقشالاردا اتا-انالاردىڭ سۇرانىسى بويىنشا قازاق تىلىندە وقىتاتىن توپتار كوبەيدى. ماسەلەن, بىزدە وسى ۋاقىتقا دەيىن 7 ورىس توبى جانە 5 قازاق توبى بولسا, قازىر كەرىسىنشە – جەتى قازاق توبى مەن 5 ورىس توبى قۇرىلىپ وتىر. تاعى دا قايتالاپ ايتامىن: بۇل وزگەرىستەردىڭ بارلىعى اتا-انالاردىڭ سۇرانىسىنا ساي ىسكە استى", دەپ اتاپ ءوتتى ايشا ليۋشيروۆنا.
اۋدان اكىمى رۇستەم داۋلەت اتقارىلعان جۇمىستار مەن الداعى جوسپارلار تۋرالى ايتىپ بەردى.
سۋرەتتە: قورداي اۋدانىنىڭ اكىمى رۇستەم داۋلەت
"سىزدەر اتقارىلعان جۇمىستاردىڭ بىرقاتارىن عانا كوردىڭىزدەر. بىراق بۇل, مەنىڭ ويىمشا, جۇرگىزىلگەن جۇمىستىڭ اۋقىمىن كورسەتۋ ءۇشىن جەتكىلىكتى. 392 جوبانى ىسكە اسىرۋعا 35 ميللياردتان استام تەڭگە باعىتتالدى, بۇگىندە ولار 95 پايىزعا دايىن. بۇل جوبالار قوردايلىقتار ءومىرىنىڭ بارلىق سالالاسىن قامتيدى. اتاپ ايتساق, گازبەن جانە سۋمەن قامتاماسىز ەتۋ, تۇرعىن ءۇي جانە جول قۇرىلىسى, كوشەلەردى جارىقتاندىرۋ جانە اباتتاندىرۋ, ءبىلىم بەرۋ, دەنساۋلىق ساقتاۋ, سپورت سالالارى بويىنشا كوپتەگەن جۇمىستار جۇرگىزىلدى. مەملەكەت باسشىسىنىڭ تاپسىرماسى بويىنشا بيىل اۋدان تاريحىندا العاش رەت 22 اۋىلدىڭ تۇرعىندارى گازبەن قامتىلۋدا. سونىمەن قاتار, تىلدەردى وقىتۋ ورتالىعى, يمامدار ءۇيى اشىلدى. بەس اۋىلدىق وكرۋگتە قوعامدىق كەڭەستەر قۇرىلىپ, ولار قوعامدىق-ساياسي تۇراقتىلىقتى نىعايتۋعا ءوز ۇلەستەرىن قوسۋدا", دەپ تۇيىندەدى رۇستەم داۋلەت.
