قۇستاردىڭ قىرىلۋى العاش رەت 4 قاراشادا بەلگىلى بولا باستادى. سول كۇنى رەزەرۆات قىزمەتكەرلەرى 16 قۇستىڭ, دالىرەك ايتقاندا, 11 سۋقۇزعىن مەن 5 شاعالانىڭ ولەكسەسىن تاۋىپتى. ال كەلەسى كۇنگى مونيتورينگ كەزىندە تاعى دا 20 سۋقۇزعىننىڭ ولگەنى انىقتالدى. سونداي-اق 6-7 قاراشادا 13 قۇستىڭ ولگەنى تىركەلگەن.
– بىزدە ساراپتاما قورىتىندىسى بولماعاندىقتان, ناقتى سەبەبىن ايتا المايمىز. قازىر قۇستاردىڭ جىلى جاققا ورالۋ ميگراتسياسى ءجۇرىپ جاتىر. قۇستاردىڭ السىرەگەنىن بايقادىق. سوعان قاراعاندا, قۇستار ميگراتسيا كەزىندە شارشاپ, السىرەگەن بولۋى مۇمكىن. وسىعان بايلانىستى جۇمىس كوميسسياسى قۇرىلدى. ولگەن قۇستار نەگىزىنەن بالىقپەن نەمەسە ولەكسەمەن قورەكتەنەتىن قاناتتىلار قاتارىنا جاتادى, – دەيدى وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ ءبولىم باسشىسى مەرەكە شالقاروۆ.
دەگەنمەن تابيعات قورعاۋشىلار رەزەرۆات اۋماعىندا جۇرگىزىلەتىن مونيتورينگتى كۇشەيتىپ وتىر. ويتكەنى مۇندا قۇستاردىڭ قىرىلۋى العاش رەت ەمەس. مۇندا 2013 جىلى دا قۇستاردىڭ قىرىلۋى تىركەلگەن بولاتىن. «اقجايىق» مەملەكەتتىك تابيعي رەزەرۆاتىنىڭ اكۆاتورياسىنا كىرەتىن «شالىگا» ارالىندا شاعالالار جاپپاي قىرىلىپ, 1 250 قۇستىڭ ولەكسەسى تابىلعان ەدى. وكىنىشكە قاراي, سول كەزدە قاناتتىلاردىڭ اجالىنا نە سەبەپ بولعانى اشىق ايتىلعان جوق.
ال بۇل جولى قۇستار نەدەن قىرىلدى؟ قۇس تۇماۋى ما, اتىراۋدىڭ لاستانعان اۋاسىنىڭ اسەرى بار ما؟ تاعى دا ايتىلماي قالىپ جۇرمەسە...
اتىراۋ وبلىسى
