– باستى ماقسات – جولدا ءجۇرۋ ەرەجەلەرىن بۇزعانى ءۇشىن سالىنعان ايىپپ ۇلىن تولەمەي جۇرگەن جۇرگىزۋشىلەردى انىقتاۋ. پاترۋلدىك پوليتسيا قىزمەتكەرلەرىمەن تەك ءبىر تاۋلىك ىشىندە ايىپپۇلىن تولەگەن سەگىز جۇرگىزۋشى انىقتالىپ, كولىكتەرى ارنايى تۇراققا قويىلدى. ماسەلەن, س.داتوۆ كوشەسىندە رەسەيلىك ءنومىرى بار «Audi ا6» اۆتوكولىگى توقتاتىلدى. تەكسەرۋ كەزىندە كولىك يەسىنىڭ 500 040 تەڭگەنى قۇراعان ايىپپ ۇلىن تولەمەگەنى انىقتالىپ, اۆتوكولىك ايىپ تۇراعىنا جەتكىزىلدى. ءىس-شارا كەزىندە 192 كولىك يەسىنىڭ 14 ملن تەڭگە كولەمىندەگى ايىپپۇلدى تولەمەگەنى انىقتالىپ, اۆتوكولىكتەرى ايىپ تۇراعىنا قويىلدى, – دەپ ءمالىم ەتتى وبلىستىق پوليتسيا دەپارتامەنتىنىڭ ءباسپاسوز قىزمەتى.
ايىپپۇل تولەمەيتىن جۇرگىزۋشىلەردىڭ دەنى – وزگە ەلدەن كولىك الىپ كەلگەندەر. سولاردىڭ قاتارىندا رەسەيدە تىركەلگەن كولىكتەردى اكەلگەن 135 جۇرگىزۋشى بار. ءبىراز داۋ-دامايدىڭ تۋىنداۋىنا سەبەپكەر بولعان ارمەنيا رەسپۋبليكاسىنىڭ كولىگىمەن جۇرگەن 18 جۇرگىزۋشى دە ايىپپ ۇلىن تولەۋگە اسىقپاي ءجۇر.
پوليتسيا قىزمەتكەرلەرى زاڭسىزدىقتىڭ الدىن الۋ ءۇشىن قىراعىلىق تانىتقان سايىن جول ەرەجەسىن بۇزۋعا بەيىم جۇرگىزۋشىلەر كوبەيىپ بارادى. ماسەلەن, اتىراۋ قالاسىندا 2-8 قاراشادا پاترۋلدىك پوليتسەيلەر 1001 رەت جولدا ءجۇرۋ ەرەجەسىن بۇزعانداردى انىقتاپ وتىر. دەپارتامەنتتىڭ ءباسپاسوز قىزمەتى ۇسىنعان مالىمەتكە قاراعاندا, كولىك قۇرالىن ماس كۇيىندە باسقارعان 13 جۇرگىزۋشى (اكىمشىلىك قۇقىقبۇزۋشىلىق تۋرالى كودەكستىڭ 608-بابى), جولدىڭ قارسى باعىتىنا شىققان – 7 (596-باپتىڭ 3-ءبولىمى), مىندەتتى ساقتاندىرۋ شارتىن جاساسۋدان جالتارعاندار – 162 (230-باپتىڭ 2-ءبولىمى), جۇرگىزۋ قۇقىعىنان ايىرىلعان 2 (612-باپتىڭ 3-ءبولىمى) جۇرگىزۋشى انىقتالىپ, اكىمشىلىك جاۋاپكەرشىلىككە تارتىلدى. ءبىر اپتادا قۇقىقبۇزۋشىلىق جاساعانى ءۇشىن سالىنعان ايىپپۇل ارقالاعان 72 جۇرگىزۋشى دە ءتارتىپ ساقشىلارىنىڭ نازارىنا ىلىكتى.
سونداي-اق رەسەيدە تىركەلگەن 44, ارمەنيادا ەسەپتە تۇراتىن 5 كولىك قۇرالى ارنايى تۇراققا قويىلعان. ال 23 اۆتوكولىك يەسىنەن 922 296 تەڭگە كولەمىندە ايىپپۇل وندىرىلگەن. اكىمشىلىك ايىپپ ۇلىن تولەمەي جۇرگەندەردىڭ باسىم بولىگى شەتەلدە تىركەلگەن اۆتوكولىكتەردىڭ جۇرگىزۋشىلەرى بولىپ شىقتى.
ءتىپتى كولىگىنە جاساندى ءنومىر تاعۋدى ءسان كورەتىندەر بار. پاترۋلدىك پوليتسيا قىزمەتكەرلەرى مەملەكەتتىك بەلگىسى كۇدىك تۋدىرعان «Toyota Avalon» اۆتوكولىگىن 10 قاراشادا ساعات 03:00 شاماسىندا توقتاتتى. تەكسەرۋ كەزىندە كولىككە تاعىلعان مەملەكەتتىك بەلگىلەردىڭ جاساندى ەكەنى انىقتالدى. شەتەلدىك كولىكتى تىزگىندەگەن 23 جاستاعى جۇرگىزۋشىنىڭ مەديتسينالىق كۋالاندىرۋ قورىتىندىسىمەن ورتا دەڭگەيدەگى ماس كۇيدە بولعانى دالەلدەندى. بۇل ازاماتقا قاتىستى اكىمشىلىك قۇقىقبۇزۋشىلىق تۋرالى كودەكستىڭ 590-بابىنىڭ 4-بولىمىمەن (جالعان نەمەسە جاساندى مەملەكەتتىك بەلگى ورناتقان كولىك قۇرالىن باسقارۋ) جانە 608-بابى 1-بولىمىنە سايكەس جيناقتالعان قۇجاتتار اتىراۋ قالالىق مامانداندىرىلعان اكىمشىلىك سوتىنا جولداندى. سوت قاۋلىسىمەن ماس جۇرگىزۋشى جەتى جىل مەرزىمگە كولىك قۇرالىن جۇرگىزۋ قۇقىعىنان ايىرىلىپ, 15 تاۋلىككە اكىمشىلىك قاماۋعا الىندى.
ءبىر كولىككە ءبىر ءنومىر بولۋشى ەدى. ال ەكى ءتۇرلى ءنومىر تاعۋعا بولا ما؟ اتىراۋلىق جۇرگىزۋشى ءدال وسىنداي ارەكەتىمەن پوليتسيا قىزمەتكەرلەرىن الداعىسى كەلگەن سەكىلدى. بالكىم, جول ەرەجەسىن بۇزعانىن جاسىرۋدىڭ امالى شىعار. دەگەنمەن قىراعى كوزدى پاترۋلدىك پوليتسەيلەر «ۆاز-2114» اۆتوكولىگىن باسقارعان جۇرگىزۋشىنىڭ «ەركەلىگىنە» توقتام سالدى. تەكسەرۋ كەزىندە رەسەي فەدەراتسياسىندا تىركەلگەن جەڭىل كولىكتىڭ الدىڭعى جاعىنا تاعىلعان مەملەكەتتىك بەلگىنىڭ ارىپتىك سيمۆولدارى وزگەرتىلگەن ەكەن. كولىك قۇرالى ارناۋلى ايىپ تۇراعىنا قويىلدى. ال 38 جاستاعى جۇرگىزۋشىنىڭ مۇنداي ارەكەتكە نەگە بارعانى ازىرگە بەلگىسىز. ەندى پوليتسەيلەر ونىڭ بۇل ارەكەتىنەن قىلمىستىق قۇقىقبۇزۋشىلىق بەلگىلەرىن انىقتاۋ ءۇشىن تەكسەرۋ جۇرگىزىپ جاتىر.
اتىراۋ وبلىسى
