ايماقتار • 11 قاراشا، 2020

تەرەكتىدەگى 10 اۋىلعا گاز جەتەدى

52 رەت كورسەتىلدى

باتىس قازاقستان وبلىسىنداعى تەرەكتى اۋدانىنىڭ دولين، توڭكەرىس جانە قونىسساي اۋىلدارىنا كوگىلدىر وتىن جەتتى. جىل سوڭىنا دەيىن تاعى 7 اۋىل تابيعي گاز قۇبىرىنا جالعانباق، دەپ حابارلايدى Egemen.kz.

بيىلعى جىلدىڭ باسىندا وبلىس اكىمىمەن ەسەپتىك كەزدەسۋدە دولين اۋىلىنىڭ تۇرعىندارى عالي ەسقاليەۆكە ەلدىمەكەنگە كوگىلدىر وتىن جەلىسىن جەتكىزۋ جونىندەگى ءوتىنىشىن ايتقان بولاتىن. شىنىندا دا وبلىس ورتالىعىمەن ىرگەلەس ورنالاسقان، قاراشىعاناققا دا جاقىن تۇرعان تەرەكتى اۋدانىنداعى 48 ەلدىمەكەننىڭ 15-ىندە بۇگىنگە دەيىن گاز تارتىلماعان ەدى. بيىل سول ولقىلىق جويىلادى.

"بيىل تەرەكتى اۋدانىنىڭ 10 ەلدىمەكەنگە كوگىلدىر وتىن كەلەدى. بۇعان دەيىن اۋدان حالقىنىڭ تابيعي گازبەن قامتىلۋى 89 پايىز بولسا، ەندى ول كورسەتكىش 96 پايىزدان اسادى. بۇل وتە قۋانىشتى جاڭالىق. گازدىڭ كەلۋىمەن كوپتەگەن تۇرمىستىق قيىندىق شەشىلەدى. بۇل مەملەكەتىمىزدىڭ نەگىزگى ساياساتى، حالىق تۇرمىسىنىڭ ساپاسىن ارتتىرۋ ءۇشىن جۇيەلى جۇمىس جۇرگىزىپ جاتىرمىز. بارشاڭىزدى وسى قۋانىشپەن قۇتتىقتايمىن"، دەدى ءوڭىر باسشىسى عالي ەسقاليەۆ دولين اۋىلىنداعى سالتاناتتى شارادا.

14

شىنىندا دا قاڭتار ايىندا وبلىس باسشىسىنا اۋىل تۇرعىندارىنىڭ ءوتىنىشىن جەتكىزگەن الەكساندرا مازۋر بۇل تىلەكتىڭ تەز ارادا جۇزەگە اسارىنا سەنبەگەنىن ايتادى.

"تالاي جىلدان بەرى گازدىڭ كەلۋىن كۇتتىك. اعاش تاپشى، كومىر قىمبات. وبلىس اكىمى جىل سوڭىنا دەيىن گاز كەلەدى دەپ ۋادە بەرسە دە قاشان قولىمىز جەتكەنشە تاعات تاپپادىق. مىنە، بۇگىن ۋادە ورىندالدى، ناتيجەسىن كورىپ وتىرمىز"، دەيدى دولين اۋىلىنىڭ تۇرعىنى الەكساندرا مازۋر. اۋىل اقساقالى قامبار بايگەلوۆ تە ماشاقاتى كوپ كومىر مەن اعاش وتىن دايىنداۋدان قۇتىلعانىنا رازى.

25

ايتا كەتەيىك، دولين، توڭكەرىس جانە قونىسساي اۋىلدارىن گازداندىرۋ جوباسىنىڭ قۇنى 337،237 ملن تەڭگەگە باعالانعان بولاتىن. جوبانى مەردىگەر "باتىسگازستروي" مەكەمەسى 298،9 ملن تەڭگەگە اتقارىپ شىقتى. 2020 جىلدىڭ مامىر ايىندا باستالعان جۇمىس بارىسىندا ۇزىندىعى 55،3 كم گاز قۇبىرى تارتىلىپ، اۋىلداعى 10 الەۋمەتتىك نىسان كوگىلدىر وتىنمەن جىلىتىلاتىن بولدى. 150 تۇرعىن ءۇي دە گازعا جالعانادى. قازىردىڭ وزىندە مۇندا 78 تۇرعىن ءۇي تابيعي گازدى كىرگىزىپ العان.

ءبىر ءتاۋىرى، اتالعان ەلدىمەكەندەردى گازداندىرۋ جۇمىسى ءبىراز ادامعا قوسىمشا تابىس تا بولدى. ماسەلەن، وسى ءۇش اۋىلعا گاز قۇبىرىن تارتۋ كەزىندە "جۇمىسپەن قامتۋ جول كارتاسى" باعدارلاماسى اياسىندا 101 ادام ۋاقىتشا جۇمىسقا تارتىلعان ەكەن. مۇنىڭ ىشىندە 40 ادام جەرگىلىكتى جۇمىسپەن قامتۋ ورتالىعى ارقىلى قامتىلعان. ولار ورتا ەسەپپەن ايىنا 85 مىڭ تەڭگە جالاقى العان ەكەن. بۇعان قوسا جوعارىداعى اۋىلداردى گازداندىرۋ ناتيجەسىندە جاڭادان تۇراقتى 40 جۇمىس ورنى اشىلعان.

25

دولين اۋىلى – ارحەولوگيالىق قازبا جۇمىستارى ناتيجەسىندە تابىلعان ايگىلى تاقساي حانشايىمىنىڭ وتانى. قازاقستاننىڭ جالپىۇلتتىق قاسيەتتى نىساندارى تىزىمىنە كىرگەن ساق كوسەمىنىڭ التىنمەن اپتالعان قابىر-وباسى 2012 جىلى تابىلعان بولاتىن. ورال-اقساي كۇرە جولىنىڭ بويىندا ورنالاسقان، تابيعاتى كوركەم ەلدىمەكەننىڭ بولاشاعى زور. اۋىلداعى ورتا مەكتەپ عيماراتى دا بيىل كۇردەلى جوندەۋدەن ءوتىپ، تۇگەل جاڭارتىلعان.

"ورتا مەكتەبىمىزدىڭ عيماراتىنا مەملەكەتتىك باعدارلاما شەڭبەرىندە جاڭارتۋ جۇمىسى جۇرگىزىلدى. عيماراتتىڭ ەسىك-تەرەزەسى، ەدەنى تۇگەل جاڭارتىلدى. جوندەۋ كەزىندە ءبىزدىڭ ءبىرىنشى سىنىپتان باسقا وقۋشىلار قاشىقتان وقىعان ەدى. ەندى ەكىنشى توقساننان باستاپ وقۋشىلار جاڭارتىلعان عيماراتتا شتاتتىق رەجيمدە وقي باستايدى. بولاشاقتا ىرگەلەس اۋىلدىڭ بالالارىن دا قابىلداۋعا مۇمكىندىك بار. ول ءۇشىن ينتەرنات اشۋ كەرەك"، دەيدى مەكتەپ ديرەكتورى ميراس ابۋعاليەۆ.

P.S. قازىرگى تاڭدا باتىس قازاقستان وبلىسى حالقىنىڭ 96،1%-ى تابيعي گازبەن قامتىلعان. بيىل مەملەكەت قازىناسىنان 910 ملن تەڭگە قاراستىرىلىپ، تەرەكتى اۋدانىنىڭ – 10، اقجايىق اۋدانىنىڭ – 11 ەلدىمەكەنىنە گاز تارتۋ جوسپارلانعان بولاتىن. بۇل مىندەت جۇزەگە اسقاندا وبلىس تۇرعىندارىنىڭ 96،7%-ى كوگىلدىر وتىننىڭ يگىلىگىن كورەتىن بولادى.

 

باتىس قازاقستان

سوڭعى جاڭالىقتار

نار نارىمبەتوۆ ەدى...

قازاقستان • كەشە

«وميكرون» شتامى وقشاۋلايدى

كوروناۆيرۋس • كەشە

پورترەتتەگى پاراسات

ەلباسى • كەشە

ۇقساس جاڭالىقتار