"زاڭ جوباسىنىڭ نەگىزگى ەرەجەلەرىن قىسقاشا اتاپ وتۋگە رۇقسات ەتىڭىزدەر. بىرىنشىدەن, ىشكى نارىقتى "تازارتۋ" ەسكەرىلگەن. بۇل ماسەلەدەگى زاڭنامالىق جاڭالىعى – سۋبەكتىلەردىڭ باقىلاۋىنان وبەكتىلەردىڭ باقىلاۋىنا كوشۋ. ياعني ءوندىرۋشى نەمەسە ساتۋشى ەمەس, ءونىمنىڭ ءوزى تەكسەرىلەتىن بولادى. ول ءۇشىن زەرتحانالاردا سىناق جۇرگىزۋ ءۇشىن ادام ومىرىنە قاۋىپتى ءونىم ۇلگىلەرىن ساتىپ الۋ راسىمدەرى ەنگىزىلەدى. سىناق ناتيجەلەرىمەن دالەلدەنگەن قاۋىپتى ءونىمدى ڭارىقتىڭ اينالىمىنان جەدەل تۇردە شىعارىپ الۋ ماقساتىندا نارىقتى قاداعالاۋ ينستيتۋتى ەنگىزىلۋدە. بۇل جاپپاي باقىلاۋدى بىلدىرمەيدى. وبەكتىلەر اقپاراتتىق بازادا "ونلاين" رەجىمدە قاداعالاناتىن بولادى, ال تەكسەرۋلەر تەك "انىقتاۋ – سىناۋ – نارىقتان الۋ" سحەماسى بويىنشا جۇزەگە اسىرىلادى", دەدى مينيستر.
ەكىنشىدەن, سايكەستىكتى باعالاۋ راسىمدەرىن جەتىلدىرۋ, سەرتيفيكاتتاۋ جانە اككرەديتتەۋ پروتسەستەرىن تسيفرلاندىرۋ قارالعان.
"ول ءۇشىن ەلەكتروندىق سەرتيفيكاتتارعا كوشۋ, كەيىننەن ەۋرازيالىق ەكونوميكالىق كوميسسيانىڭ ورتاق پروتسەستەرىمەن ينتەگراتسيالاۋ قاراستىرىلعان. سايكەستىكتى باعالاۋعا ءوندىرۋشى, ءوندىرۋشىنىڭ ۋاكىلەتتى تۇلعاسى, يمپورتتاۋشى, ساتۋشى دەگەن ءوتىنىش بەرۋىشىلەردىڭ ناقتى ءتىزىمى بەكىتىلەدى. سەرتيفيكات "يەسىنىڭ" جانە "پايدالانۋشىسىنىڭ" قۇقىعى تۋرالى ماعىناسى ەنگىزىلەدى. سىناق پروتسەسىنىڭ فوتو-بەينە تىركەۋ مەحانيزمى كوزدەلەدى جانە سىناق بازاسىنىڭ بولۋىنا قويىلاتىن تالاپتار بەلگىلەنەدى. اتالعان شارالاردى قابىلداۋ ناتيجەسىندە سەرتيفيكاتتاۋ كەزىندە سىناق ناتيجەلەرىنىڭ دۇرىستىعىن 100 پايىزعا دەيىن جەتكىزۋ كۇتىلۋدە جانە سەرتيفيكاتتالماعان ءونىمدى تولىق باقىلاۋعا الۋ مۇمكىندىك بەرىلەدى", دەدى ب.سۇلتانوۆ.
