"شانحاي ىنتىماقتاستىق ۇيىمى ءوزىنىڭ قاجەتتىلىگى مەن ومىرشەڭدىگىن دالەلدەي وتىرىپ, شتاتتى رەجىمدە جۇمىسىن جالعاستىرىپ كەلەدى. ءبىز بۇگىن بەكىتۋدى كوزدەپ وتىرعان قۇجاتتار پاكەتى – سونىڭ جارقىن دالەلى. بۇل قۇجاتتاردىڭ ءبارى دە شانحاي ىنتىماقتاستىق ۇيىمىنىڭ ابىرويىن بەكەمدەي ءتۇسۋى جولىندا جۇمىس اتقاراتىنىنا سەنىمدىمىن", دەدى قاسىم-جومارت توقاەۆ.
قازاقستان پرەزيدەنتى سوڭعى 20 جىلدا شىۇ-عا مۇشە مەملەكەتتەر ۇلكەن جولدان وتكەنىن اتاپ ءوتتى.
"شىۇ – ەڭ تابىستى حالىقارالىق ۇيىمداردىڭ بىرىنە اينالدى. بۇل ۇيىم جەر جاھاننىڭ تورتتەن ءبىر بولىگىن الىپ جاتقان اۋماقتا سەنىم مەن سەرىكتەستىكتى نىعايتا بىلەتىن ءتيىمدى قۇرال رەتىندە قارالادى. بۇل ىنتىماقتاستىققا مۇشە مەملەكەتتەردە الەم حالقىنىڭ 40 پايىزى تۇرادى, الەمدىك ءجىو-ءنىڭ 40 پايىزى – وسى ۇيىمعا مۇشە مەملەكەتتەرگە تيەسىلى. سونىمەن قاتار شىۇ جاۋاپتى ايماقتاعى جاعداي وتە كۇردەلى بولىپ وتىر, ءارى ول تەرەڭ ترانسفورماتسيادان وتۋدە. كوروناۆيرۋس الەمدىك قاۋىمداستىقتار ءۇشىن قاتاڭ سىناق بولا وتىرىپ, حالىقارالىق ىنتىماقتاستىقتىڭ كەمشىن تۇستارىن كورسەتىپ بەردى. پاندەميا جاھاندىق دەرجاۆالاردىڭ اراسىنداعى سەنىم داعدارىسىن كۇردەلەندىرىپ جىبەردى. الدىن الۋ ديپلوماتياسى مەن قاقتىعىستاردى رەتتەۋدىڭ قازىرگى مەحانيزمدەرى ايتارلىقتاي ىركىلىپ قالدى. قاۋىپسىزدىك ماسەلەلەرى بويىنشا قاتەر ارتىپ بارادى. ونىڭ ىشىندە تەرروريزم, قارۋلانۋ باسەكەسى, ءارتۇرلى گيبريدتى سوعىستار, كليماتتىڭ وزگەرۋى بار", دەدى قاسىم-جومارت توقاەۆ.
