ۇيالى بايلانىس جانە ينتەرنەتكە تىركەلگەن ابونەنتتەر سانىنىڭ ازايعانىنا قاراماستان, بايلانىس قىزمەتتەرىنىڭ اۋقىمى ايتارلىقتاي ءوستى. مىسالى, اعىمداعى جىلدىڭ قاڭتار-تامىزىندا ەلىمىزدىڭ تەلەكوممۋنيكاتسيالىق كومپانيالارىنىڭ بايلانىس قىزمەتىنەن تاپقان كىرىستەرى 8,3 پايىزعا ۇلعايىپ, 574,2 ملرد تەڭگەنى قۇرادى. وتكەن جىلى بۇل كورسەتكىش 519,9 ملرد تەڭگە بولعان ەدى. كىرىستەر ءوسىمىنىڭ نەگىزگى سەبەپتەرىنىڭ ءبىرى − ينتەرنەت-پروۆايدەرلەر مەن ۇيالى بايلانىس وپەراتورلارى ءتاريفىنىڭ كوتەرىلۋى.
ينتەرنەت ۇسىنۋ قىزمەتى سالاسىنداعى تەلەكوممۋنيكاتسيالىق كومپانيالاردىڭ كىرىستەرى ءبىر جىل ىشىندە 13,2 پايىزعا ءوستى جانە 213,4 ملرد تەڭگەگە جەتتى. بۇل تەلەكوممۋنيكاتسيا نارىعىنداعى قىزمەتتەردىڭ جالپى 37,2 پايىزىن قۇرايدى. سونىمەن قاتار ۇيالى بايلانىس قىزمەتتەرىنىڭ اۋقىمى وتكەن جىلدىڭ سايكەس كەزەڭىمەن سالىستىرعاندا 1,5%-عا ۇلعايىپ, 151,7 ملرد تەڭگەنى قۇرادى. سونىڭ ىشىندە حالىققا كورسەتىلگەن ۇيالى بايلانىس قىزمەتتەرى اقشالاي ماندە ءبىر جىلدا بىردەن 5,1 پايىزعا, ياعني 108,1 ملرد تەڭگەگە دەيىن وسكەن.
سونداي-اق وڭىرلىك بولىنىستە بايلانىس قىزمەتتەرى كولەمىنىڭ 80 پايىزى الماتى مەن نۇر-سۇلتان قالالارىنا تيەسىلى. ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ مالىمەتىنشە, ۇيالى بايلانىس كولەمى ۇيالى بايلانىس وپەراتورلارى تىركەلگەن مەكەنجاي بويىنشا بولىنگەن. ماسەلەن, الماتىداعى بايلانىس قىزمەتتەرىنىڭ كولەمى 336,6 ملرد تەڭگە بولسا, نۇر-سۇلتاندا 121 ملرد تەڭگەنى قۇرايدى. بۇدان بولەك, سەكتورداعى قىزمەت كورسەتۋ كولەمى بويىنشا قاراعاندى (13,8 ملرد تەڭگە), شىعىس قازاقستان (13,2 ملرد) جانە الماتى (9,9 ملرد) وبلىستارى كوش باستاپ تۇر.
ەستەرىڭىزگە سالا كەتەيىك, تاياۋدا تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى ۇيالى بايلانىس قىزمەتتەرىن كورسەتۋ قاعيدالارىنا وزگەرتۋلەر ەنگىزگەن بولاتىن. ەندى ءموبيلدى وپەراتورلار ابونەنتتەرگە وزگە تاريفتىك جوسپارلارمەن قاتار, تولەم ءبىر كۇنتىزبەلىك ايعا جاسالاتىن تاريفتىك جوسپاردى دا ۇسىنۋى ءتيىس. ەنگىزىلگەن وزگەرتۋلەردىڭ ناتيجەسىندە ابونەنتتەر تاريفتىك جوسپارلاردىڭ ىشىنەن وزىنە قاجەتىن تاڭداي وتىرىپ, ونى تولىق ءبىر اي پايدالانا الادى. مىسالى, ەگەر ابونەنت تاريفتىك جوسپارعا ايدىڭ سوڭعى كۇنى قوسىلسا, ونىڭ جەكە شوتىنان بايلانىس قىزمەتى ءۇشىن تولەم كەلەسى ايدىڭ سوڭعى كۇنى شەگەرىلەدى.
مۇنىمەن قوسا, ەرەجەگە «بازالىق تاريفتىك جوسپار» ۇعىمى ەنگىزىلدى. اتالعان تاريف ابونەنتتىك تولەمدى تالاپ ەتپەيدى, تەك ناقتى پايدالانعان مينۋت نەمەسە SMS سانىنا عانا تولەم جاساي وتىرىپ, قوڭىراۋ شالۋعا جانە SMS جىبەرۋگە مۇمكىندىك بەرەدى. «بازالىق تاريفتىك جوسپار» ابونەنت ءنومىردى باسقا ۇيالى بايلانىس وپەراتورىنىڭ جەلىسىنە اۋىستىرعاندا (MNP قىزمەتى), جاڭا تاريفتىك جوسپاردى تاڭداپ ۇلگەرمەگەندە, سونداي-اق قولدانىستاعى تاريفتىك جوسپار ارەكەت ەتۋىن توقتاتقان جاعدايدا عانا قوسىلادى.
ايتالىق, بۇعان دەيىن ۇيالى بايلانىس وپەراتورى ابونەنتتە قانداي دا ءبىر تاريفتىك جوسپار بولماسا, ونى وزدەرى ابونەنتتىڭ كەلىسىمىنسىز كەز كەلگەن تاريفتىك جوسپارعا قوسا الاتىن. ەندى ولار وزگەرىستى جىلىنا ءبىر رەت قانا ەنگىزە الادى جانە بۇل تۋرالى ابونەنتتى ناقتى وزگەرىستەرگە دەيىن كۇنتىزبەلىك وتىز كۇن بۇرىن حاباردار ەتۋگە مىندەتتى.
«قازاقتەلەكوم» اق 2019 جىلدىڭ 1 قاڭتارىنان باستاپ 3499 تەڭگەگە جاڭا «باستاپقى» پاكەتتىك تاريفتىك جوسپارى ەنگىزىلدى. بۇل توپتاما قولدانىستاعى ەڭ تومەنگى تاريفتىك جوسپاردان (3 550 تەڭگە) 5,5 پايىزعا تومەن جانە وعان 10 مبيت/س دەيىنگى جىلدامدىقپەن ينتەرنەت قىزمەتتەرى جانە قازاقستان بويىنشا ءليميتسىز قوڭىراۋلارمەن تەلەفون بايلانىسى, التەل/تەلە2 جەلىسىنە قوڭىراۋ شالۋ كىرەدى.
ال «قازاقتەلەكوم» اق ابونەنتتى بايلانىس قىزمەتتەرىنە قوسۋ بويىنشا جۇمىستاردى جۇرگىزۋگە 50 پايىز جەڭىلدىك, سونداي-اق تەلەفوننىڭ ابونەنتتىك تولەمىنە اي سايىنعى 10 پايىزدىق جەڭىلدىك جانە ينتەرنەت قىزمەتتەرىنىڭ ابونەنتتىك تولەمىنە 15 پايىزدىق جەڭىلدىك ۇسىنادى. «ترانستەلەكوم» اق قاتىسۋشىلارى, سونداي-اق مۇگەدەكتىگى بار ازاماتتار مەن ولارعا تەڭەستىرىلگەن تۇلعالار ءۇشىن ينتەرنەت جەلىسىن قولدانۋ قىزمەتىنە 5 پايىز جەڭىلدىك ۇسىنادى.
«كار-تەل» جشس جاڭا «الەۋمەتتىك», «الەۋمەتتىك پليۋس» تاريفتىك جوسپارلارىنىڭ جەلىسى جانە «مۇعالىمدەر مەن وقۋشىلارعا ارنالعان» تاريفتىك جوسپارى دايىندالدى. تاريفتىك جوسپار بويىنشا ابونەنتتەر ۇيالى بايلانىس قىزمەتتەرىن ايتارلىقتاي تومەندەتىلگەن باعامەن (590 تەڭگەدەن باستاپ) الادى.
سونىمەن بىرگە «ەرەكشە» تك «كسەلل» اق-دا «كسەلل» ابونەنتتەرى ءۇشىن قازىر دە قولجەتىمدى بولماق. تاريفتىك جوسپار بويىنشا 1, 2-توپ مۇگەدەكتەرى مەن ەستۋ قابىلەتى ناشار ازاماتتار جەلى ىشىندە 1 تەڭگەدەن, باسقا وپەراتورلاردىڭ جەلىسىنە 9 تەڭگەدەن, باسقا وپەراتورلاردىڭ جەلىسىنە 1 SMS ءۇشىن 2 تەڭگەدەن بايلانىسۋ مۇمكىندىگىنە يە.
ەلىمىزدىڭ جانە الەمدىك ينتەرنەت سالاسىنا قاتىستى ماسەلەلەردىڭ ءبىرازى الەمدىك مىنبەردە دە شەشىمىن تاپتاي كەلەدى. سەبەبى جاھاندى جاۋلاعان پاندەميانىڭ اسەرى روۋمينگتىك بايلانىسقا دا زاردابىن تيگىزۋدە. روۋمينگتى تۇتىنۋشىلار سانىنىڭ وسۋىنە قاراماستان, وپەراتورلار حالىقارالىق روۋمينگتەن جوسپارلانعان كىرىستى جىل سوڭىنا دەيىن قالپىنا كەلتىرگىسى جوق.
