جوعارعى سوتتىڭ سۋدياسى يرينا كالاشنيكوۆا ەل سۋديالارىنىڭ VIII سەزىنە قاتىسۋشىلاردىڭ نازارىنا سۋديالارعا ارنالعان ەكى جيناقتى ۇسىندى. بۇل جيناقتار بيىل جوعارعى سوت پەن امەريكالىق زاڭگەرلەر قاۋىمداستىعىنىڭ قۇقىق ۇستەمدىگى باستاماسى اياسىندا دايىندالىپتى. جيىندا ءسوز العان ي.كالاشنيكوۆا زياتكەرلىك مەنشىك سالاسىنداعى قازىرگى زامانعى قۇقىقتىق قاتىناستاردى كوپتەگەن زاڭنامالىق جانە نورماتيۆتىك قۇقىقتىق اكتىلەرمەن, سونىڭ ىشىندە حالىقارالىق قۇقىق نورمالارىمەن جانە ىسكەرلىك اينالىم داعدىلارىمەن رەگلامەنتتەلگەن كۇردەلى جانە كوپ قىرلى سالا دەپ اتادى. وسى داۋلاردى قاراۋ, ولار بويىنشا شەشىم قابىلداۋ بەلگىلى ءبىر قيىندىق تۋدىرادى.
وتكەن جىلى اتالعان ىنتىماقتاستىق شەڭبەرىندە قازاقستاندىق سۋديالار زياتكەرلىك مەنشىك سالاسىنداعى, سونىڭ ىشىندە ينۆەستورلاردىڭ قۇقىقتارىنا قاتىستى داۋلاردى شەشۋ جونىندەگى حالىقارالىق تاجىريبەنى زەردەلەۋ ماقساتىندا اقش-تاعى سوتتاردا بولدى. سونىڭ ناتيجەسىندە ءبىز تىلگە تيەك ەتىپ وتىرعان وسى ەكى جيناق ازىرلەنىپتى. ءبىرىنشىسى – قازاقستان زياتكەرلىك مەنشىكتى قورعاۋ بويىنشا سوت ىستەرىن قاراۋ جونىندەگى ادىستەمەلىك ۇسىنىمدار جيناعى. ونى ي.كالاشنيكوۆا جانە Dentons فيرماسىنىڭ زاڭگەرى ناتاليا شاپوۆالوۆا ازىرلەدى. وندا تالاپ قويۋ تۇرلەرى, تالاپ-ارىزعا قوسا بەرىلەتىن قۇجاتتار تىزبەسى, داۋلاردىڭ ۆەدومستۆولىعى مەن سوتتىلىعىنىڭ ەرەكشەلىكتەرى كەلتىرىلەدى. سونىمەن قاتار جيناقتا تاراپتار مەن زاڭنىڭ قۇقىقتىق قاتىناستارىن, انىقتالاتىن جانە دالەلدەنەتىن فاكتىلەردى, تىكەلەي دالەلدەمەلەردى انىقتاۋ ماسەلەسى باياندالادى. اۆتورلىق قۇقىق جانە تاۋار بەلگىلەرىن قورعاۋ سالاسىنداعى داۋلار بويىنشا سوت ءىسىن جۇرگىزۋدىڭ ەرەكشەلىكتەرى كورسەتىلگەن. جيناقتا قۇجاتتار مەن سوت اكتىلەرىنىڭ ۇلگىلەرى بار. ەكىنشىسى – زياتكەرلىك مەنشىكتى قورعاۋ تۋرالى داۋلار بويىنشا سوت شەشىمدەرىن قۇراستىرۋدىڭ كومەكشى قۇرالى. باسىلىمدى «Dentons» فيرماسىنىڭ اعا زاڭگەرى ءاليا سەيىتوۆا دايىنداپ وتىر. نۇسقاۋلىقتا شەشىمدەر شىعارۋ, تاراپتاردىڭ قۇقىقتىق قاتىناستارىن جانە ناقتى داۋدى شەشۋدە قولدانىلاتىن قۇقىق نورمالارىن انىقتاۋ بويىنشا ۇسىنىستار كەلتىرىلەدى.
ەكى جيناق تا جوعارعى سوتتا ماقۇلداندى. وبلىستىق سوتتارعا جىبەرىلدى. سونداي-اق بۇل جيناقتار ەلەكتروندى فورماتتا دا قولجەتىمدى. ي.كالاشنيكوۆانىڭ ايتۋىنشا, بۇل جيناقتار سۋديالاردىڭ قىزمەتىندە پايدالى بولاتىن كورىنەدى جانە داۋلاردى ساپالى شەشۋگە, ماتەريالدىق قۇقىقتىق نورمالاردى ءتيىستى تۇردە قولدانۋعا, تۇراقتى سوت تاجىريبەسىن قالىپتاستىرۋعا ىقپال ەتەدى.
