ەۋروپانىڭ عارىش اگەنتتىكتەرى عالامشارعا ازىرگە ەش قۇرىلعىسىن قوندىرعان جوق. سەبەبى وسىدان ءتورت جىل بۇرىن ولاردىڭ العاشقى تاجىريبەسى ساتسىزدىككە ۇشىراعان ەدى. دەگەنمەن الداعى ءىس-تاجىريبەلەرگە اقش پەن رەسەي كومەككە كەلمەك.
وسى ورايدا يلون ماسك ExploreMars.org Twitch-تە سويلەگەن سوزىندە 2024 جىلى ادامداردى قىزىل عالامشارعا اتتاندىرۋعا نيەتتى ەكەنىن ايتتى. ي.ماسك مارسقا ۇشاتىن SpaceX عارىش كەمەلەرىنىڭ بيلەتتەرىنىڭ باعاسىن جاريالادى. ونىڭ ايتۋىنشا, بيلەت باعاسى عارىش كەمەسىنىڭ كولەمىنە بايلانىستى بولماق. ي.ماسك ءوزىنىڭ Twitter پاراقشاسىندا «بيلەت قۇنى 500 مىڭ دوللارعا جەتۋى مۇمكىن, بالكىم 100 مىڭ دوللارعا تەڭەسۋى عاجاپ ەمەس. جولداما قۇنى ەكونوميكاسى دامىعان ەلدەر تۇرعىندارىنىڭ جەردەگى ءۇيىن ساتىپ, بيلەت الۋىنا جەتكىلىكتى», دەپ جازدى.
SpaceX كومپانياسى مارسقا 2020 جىلدىڭ ورتاسىندا Starship پەن Super Heavy عارىش كەمەلەرىن جىبەرۋدى جوسپارلاپ وتىر. ي.ماسك مارستا 2025 جىلعا قاراي ءوزىن ءوزى قامتاماسىز ەتە الاتىن قالاشىقتىڭ پايدا بولاتىنىنا سەنىمى مول. بۇل پروتسەستىڭ جۇزەگە اسۋى قيىنعا سوعاتىنىن, الايدا جوسپارلى تۇردە ارەكەتتەر ىسكە اساتىنىن مالىمدەدى.
ي.ماسك توعىز جىل ىشىندە ادامداردى مارسقا اپاراتىن مىڭعا جۋىق جۇلدىزدىق كەمەنى دايىنداپ شىعارۋدى قولعا الدى. ارينە, مۇنداي مەرزىمدە ورىندالا ما, جوق پا بەلگىسىز. الايدا جاھاندىق پروبلەمالاردىڭ ورىستەۋى كۇن سايىن ارتىپ جاتقاندىقتان, اسىعۋ كەرەك ەكەنىن العا تارتتى.
سونىمەن قاتار بىرىككەن اراب امىرلىكتەرى عارىش زوندىن مارسقا جىبەرگەن العاشقى اراب مەملەكەتى بولدى. ء«ال-امال» اپپاراتىن 20 شىلدەدە تانەگاسيما ارالىنداعى عارىش ايلاعىنان جاپوندىق زىمىران-تاسىعىشى اسپانعا ۇشىرعان بولاتىن.
باستاپقىدا ۇشىرۋ 14 شىلدەگە بەلگىلەندى, بىراق اۋا رايىنىڭ قولايسىزدىعىنا بايلانىستى ۇشۋ بارىسىن ەكى رەت اۋىستىردى. دۋبايداعى مۋحاممەد بين راشيد عارىش ورتالىعىندا كولورادو ۋنيۆەرسيتەتىنىڭ اتموسفەرالىق جانە عارىشتىق فيزيكا زەرتحاناسىمەن بىرگە ازىرلەنگەن عارىشتىق زوند جەتى ايدان كەيىن قىزىل پلانەتاعا جەتەدى دەپ بولجانۋدا.
ءباا-ءنىڭ مارس ميسسياسىنىڭ ماقساتى − اتموسفەرانى, كليماتتىق جاعدايلاردى جانە جىل مەزگىلدەرىنىڭ اۋىسۋىن زەرتتەۋ. اپپارات وربيتادا بۇكىل مارسياندىق جىل بويى قالۋى كەرەك. ياعني, ونىڭ ۇزاقتىعى جەردەگى جىلمەن سالىستىرعاندا ەكى ەسە كوپ.
بۇدان بولەك عارىشتىق زوند العاش رەت اتموسفەرانىڭ تومەنگى قاباتتارىن جانە مارستىق اۋا رايىن, سونىڭ ىشىندە شاڭدى داۋىلداردىڭ قالىپتاسۋىن زەرتتەيدى. كەمەنىڭ ارنايى ينفراقىزىل جانە ۋلتراكۇلگىن دياپازوندارىندا مارس اتموسفەراسىن باقىلاۋعا مۇمكىندىك بەرەتىن ءۇش كامەرامەن جابدىقتالعان.
