ۆەدومستۆو باسشىسىنىڭ ايتۋىنشا, ەلىمىزدەگى قىلمىس سانى 37%-عا ازايىپ, اۋىر قىلمىستاردىڭ ىشىندە دەنساۋلىققا زيان كەلتىرۋ قىلمىستارى – 12%-عا, زورلىق – 39%-عا, قاراقشىلىق – 52%-عا, توناۋ – 50%-عا, بۇزاقىلىق فاكتىلەرى 45%-عا تومەندەپتى.
– جاسوسپىرىمدەر اراسىنداعى قىلمىس ازايدى. كوشەدە جاسالاتىن قىلمىس – 51%-عا, ماس كۇيدە جاسالاتىن قىلمىس – 16%-عا ازايىپ وتىر. قىلمىستى اشۋ كورسەتكىشى جاقساردى. اۋىر قىلمىستاردىڭ 64%-ى, اسا اۋىر قىلمىستاردىڭ 94%-ى اشىلدى. سونىمەن قاتار كارانتين كەزىندە ۇيدە وتىرىپ, الكوگولدىك ىشىمدىكتەر ءىشۋ فاكتىلەرى كوبەيگەن. سونىڭ سالدارىنان تۇرمىستىق قىلمىستاردىڭ سانى ءوستى. ىشىمدىك اسەرىنەن ادام ءولتىرۋ فاكتىلەرى – 12%-عا, جاسوسپىرىمدەرگە قاتىستى زورلىق فاكتىلەرى 19%-عا ارتىپ وتىر. كوپ جاعدايدا جابىرلەنۋشىنىڭ جاقىن تانىسى نەمەسە تۋىسى زورلاعانى انىقتالىپ وتىر. ولار – اكەسى, وگەي اكەسى, كورشىسى نەمەسە تانىستارى. مۇنداي ءاربىر فاكتى – وتباسى ءۇشىن ۇلكەن تراگەديا. جاعدايدى دۇرىستاۋ ءۇشىن پروفيلاكتيكالىق شارالار كۇشەيتىلىپ, ەسەپتە تۇرعان ازاماتتارمەن جۇمىس جۇرگىزىلدى, – دەدى ە.تۇرعىمباەۆ.
ءمينيستردىڭ ايتۋىنشا, وتباسىن قورعاۋ ءۇشىن ۋچاسكەلىك ينسپەكتورلار 61 000 قورعاۋ نۇسقاماسىن شىعارىپتى. سونداي-اق ەلىمىزدەگى قىلمىستىق جاعداي 29 قازاندا مەملەكەت باسشىسى قاسىم-جومارت توقاەۆتىڭ قاتىسۋىمەن وتكەن ىشكى ىستەر مينيسترلىگىنىڭ القا وتىرىسىندا باياندالدى. اتالعان وتىرىستا پرەزيدەنت قوعامدىق قاۋىپسىزدىكتى ساقتاۋدا پوليتسيا قىزمەتكەرلەرىنىڭ جۇمىسى ماڭىزدى ەكەنىن ايتىپ, ۆەدومستۆونىڭ الدىنا ناقتى تاپسىرمالار قويعان بولاتىن.
– مەملەكەت باسشىسى ەڭ الدىمەن قوعامداعى ءتارتىپتىڭ ساقتالۋىن تاپسىردى. پرەزيدەنت ۇلتارالىق كەلىسىم مەن قوعامداعى تۇراقتىلىق – ەڭ باستى قۇندىلىق ەكەنىن العا تارتتى. ادامدار ءوز قاۋىپسىزدىكتەرى ءۇشىن الاڭداماۋى كەرەك. بۇگىندە ىشكى ىستەر مينيسترلىگى الەۋمەتتىك داۋ-دامايلار مەن قوعامدىق تىنىشتىقتى بۇزۋدىڭ الدىن الۋ بويىنشا بارلىق قاجەتتى شارالاردى قابىلداپ جاتىر. قىزمەتتىڭ سەرۆيستىك مودەلى ەنگىزىلۋدە. تۇرعىنداردىڭ قاۋىپسىزدىگىن قامتاماسىز ەتۋ ماسەلەسى دە جولعا قويىلدى. پاترۋلدىك پوليتسيانىڭ جۇمىسى كوشەلەردە, باقتاردا, اۋلالاردا, ادامدار كوپ جينالاتىن ورىنداردا قاۋىپسىزدىكتىڭ ساقتالۋىن قامتاماسىز ەتۋگە باعىتتالىپ وتىر. اكىمدىكتەرمەن بىرلەسىپ كريمينوگەندى اۋدانداردا جاپونيا, وڭتۇستىك كورەيا جانە سينگاپۋر ەلدەرىنىڭ تاجىريبەسى بويىنشا ارنايى ستاتسيونارلىق بەكەتتەر قويىلىپ جاتىر. ول جەردە پوليتسيا قىزمەتكەرلەرى تاۋلىك بويى قىلمىستاردىڭ الدىن الىپ, ازاماتتاردى قابىلداي الاتىنداي جاعداي جاسالعان. بۇگىندە ايماقتاردا وسىنداي 44 بەكەت ورناتىلعان. الداعى ەكى جىلدا ءدال وسىنداي 176 بەكەت ورناتۋ كوزدەلىپ وتىر, – دەدى ە.تۇرعىمباەۆ.
ۆەدومستۆو باسشىسىنىڭ ايتۋىنشا, ۋچاسكەلىك ينسپەكتورلاردىڭ مارتەبەسىن زاڭنامالىق تۇرعىدا كوتەرۋ جۇمىستارى جۇرگىزىلۋدە. پرەزيدەنت ءوز سوزىندە «قىلمىستىڭ الدىن الاتىن نەگىزگى تۇلعا – ۋچاسكەلىك ينسپەكتور» دەپ اتاپ وتكەن بولاتىن. ول جەرگىلىكتى حالىقتىڭ پروبلەمالارىن شەشىپ, قىلمىستاردىڭ جولىن كەسىپ, ازاماتتاردىڭ قاۋىپسىز بولۋىن قامتاماسىز ەتۋى كەرەك. سوندىقتان ۋچاسكەلىك ينسپەكتورلاردىڭ قۇزىرەتىن ارتتىرۋ جۇمىستارى ءالى دە جالعاساتىن بولادى.
– ولارعا زاڭنامالىق تۇرعىدا وزدىگىمەن تىيىم سالۋعا, ءتارتىپ بۇزعان ازاماتتارعا شەكتەۋ قويۋعا قۇزىرەت بەرۋ جوسپارلانۋدا. ماسەلەن, ۋچاسكەلىك ينسپەكتور جانجال شىعارعان وتباسى مۇشەسىن ۇيدەن شىعارىپ جىبەرە الادى. سونداي-اق ۋچاسكەلىك ينسپەكتور شەشىم قابىلداي الاتىنداي باپتاردىڭ سانىن ارتتىرۋ كوزدەلۋدە, – دەدى ۆەدومستۆو باسشىسى.
