ءيا, قازاقستان دەپ جۇرەگى سوققان ءاربىر قايسار ۇلاننىڭ باستى پارىزى – وتان قورعاۋ. الايدا «ەرىم دەيتىن ەل بولماسا, ەلىم دەيتىن ەر قايدان بولسىن» دەمەكشى, ساربازدىڭ قامىن ويلامايىنشا تاسىمىز ورگە دومالاپ كەتپەيتىنى انىق. وسىنى ەسكەرگەن قورعانىس مينيسترلىگى اسكەري كوميسسارياتتاردىڭ جاڭا كەلبەتىن قالىپتاستىرۋدى قولعا الدى.
ماسەلەن, 2019 جىلى قورعانىس ۆەدومستۆوسىندا قابىلدانعان جوسپارعا سايكەس, وسى جىلدىڭ باسىنان بەرى جەرگىلىكتى اسكەري باسقارۋ ورگاندارىن (اسكەري كوميسسارياتتاردى) قايتا ۇيىمداستىرۋ بويىنشا جۇمىستار جۇرگىزىلىپ جاتىر. سەبەبى, قورعانىس ىستەرى جونىندەگى دەپارتامەنتتەر, باسقارمالار مەن بولىمدەر قارۋلى كۇشتەر مەن قوعامدى بايلانىستىراتىن نەگىزگى بۋىن بولىپ سانالادى. سول سەبەپتى قورعانىس مينيسترلىگىمەن ولارعا جاڭا, زاماناۋي كەلبەت بەرۋ بويىنشا بىرقاتار شارالار ۇيىمداستىرىلىپ وتىر. ورىن الىپ جاتقان وزگەرىستەر وسى باعىتتاعى قىزمەتتىڭ بارلىق سالاسىنا قاتىستى.
ارينە, قورعانىس سالاسى ءۇشىن ەڭ الدىمەن اسكەري كوميسسارياتتاردىڭ حالىققا قولجەتىمدىلىگى مەن ىڭعايلىلىعى, ولاردىڭ سىرتقى كەلبەتى, ينفراقۇرىلىمى ماڭىزدى. وسى ماقساتتا عيماراتتاردى جوندەۋ, قاجەتتى قىزمەتتىك جانە تۇرمىستىق ءۇي-جايلاردى قۇرۋ, جابدىقتاۋ, سونىڭ ىشىندە حالىقتى قابىلداۋ جانە اسكەرگە شاقىرىلۋشىلاردى ورنالاستىرۋ, اۆتوموبيل تەحنيكاسىنا ارنالعان تۇراقتار بويىنشا جۇمىستار جۇرگىزىلمەك.
حالىقپەن جۇمىس ىستەۋگە ەرەكشە كوڭىل بولىنەدى. ءاربىر ازامات اسكەري كوميسسارياتقا كەلىپ, اسكەري ەسەپكە الۋعا جانە اسكەري قىزمەتكە شاقىرۋعا قاتىستى انىقتامالىق ماتەريالدارمەن تانىسا الادى. مەكەمەگە كەلۋشىلەرمەن تىكەلەي جۇمىس ىستەۋ ءۇشىن ازاماتتاردى قىزىقتىراتىن بارلىق سۇراقتارعا جاۋاپ بەرە الاتىن جانە قاجەت بولعان جاعدايدا ماسەلەلەرىن شەشۋگە كومەك كورسەتەتىن ارنايى قىزمەتكەرلەر وقىتىلادى.
جەرگىلىكتى اسكەري باسقارۋ ورگاندارىنىڭ جۇمىسىن جەتىلدىرۋدە تسيفرلاندىرۋدىڭ دا ماڭىزى زور. وسىعان دەيىن اسكەري كوميسسارياتقا ارنايى كەلىپ الۋ كەرەك بولعان 9 قىزمەت ءتۇرىن بۇگىندە «ەلەكتروندىق ۇكىمەت» پورتالىنان الۋعا بولادى. اتاپ ايتقاندا ەسەپكە قويۋ جانە ەسەپتەن شىعارۋدىڭ, اسكەري-تەحنيكالىق مەكتەپتەرگە ءتۇسۋدىڭ, تىركەۋ كۋالىگى مەن اسكەري بيلەتتىڭ, سونداي-اق ءتۇرلى اقپاراتتىق انىقتامالاردى الۋدىڭ جولى جەڭىلدەدى.
اسكەري كوميسسارياتتاردى باسقا مەملەكەتتىك ورگانداردىڭ دەرەكتەر بازاسىمەن ينتەگراتسيالاۋ جۇرگىزىلۋدە. بۇل قادام اسكەري ەسەپكە الۋدى ەلەكتروندى فورماتتا جۇرگىزۋگە, ال اسكەري مىندەتتىلەردى ەسەپكە قويۋ مەن شىعارۋدى ولاردىڭ تۇرعىلىقتى مەكەنجايى بويىنشا اۆتوماتتى تۇردە جۇرگىزۋگە مۇمكىندىك بەرەدى.
قورعانىس ۆەدومستۆوسىنىڭ جوسپارى بويىنشا وسى ءىس-شارالاردى جاپپاي ىسكە اسىرۋ ازاماتتاردىڭ اسكەري قىزمەتكە ءتۇسۋىن ىڭعايلاتىپ, ارميا مەن قوعام اراسىندا سىندارلى ديالوگ قالىپتاساتىن بولادى. سونىمەن قاتار بۇل قادامدار سىبايلاس جەمقورلىق تاۋەكەلدەرىن ازايتۋعا جانە قاعازباستىلىقتى قىسقارتۋعا ىقپال ەتەدى.
نۇر-سۇلتان قالاسىنىڭ قورعانىس ىستەرى جونىندەگى دەپارتامەنتى مەن ەلوردانىڭ اۋداندىق اسكەري كوميسسارياتتارى بازاسىندا «تسيفرلىق جەرگىلىكتى اسكەري باسقارۋ ورگانى» قاناتقاقتى جوباسى ىسكە قوسىلدى. ال جاقىن ارادا بارلىق جەرگىلىكتى اسكەري باسقارۋ ورگاندارىن وسى زامانعى بىرىڭعاي ستاندارتقا كەلتىرۋ جوسپارلانىپ وتىر.
بۇدان باسقا, قورعانىس ىستەرى جونىندەگى بولىمشەلەردە سىبايلاس جەمقورلىق تاۋەكەلدەرىن تالداۋ جانە ازايتۋ جونىندەگى قىزمەت ۇيىمداستىرىلدى. بۇل جۇمىسقا وسى جىلدىڭ اقپان ايىندا قول قويىلعان ءوزارا ءىس-قيمىل تۋرالى مەموراندۋم نەگىزىندە سىبايلاس جەمقورلىققا قارسى ءىس-قيمىل اگەنتتىگى دە قوسىلدى.
