اتالعان جولدى قايتا جاڭعىرتۋ اتىراۋ قالاسىنىڭ شەكاراسىنان باستالىپ, قۇرمانعازى اۋدانىنداعى گانيۋشكين اۋىلىنا دەيىنگى 616-833 شاقىرىمىنداعى ۋچاسكەدە ىسكە اسىرىلۋدا. جوبا ءتورت ۋچاستكەگە بولىنگەن. جولشىلار جەر توسەمىن سالۋ, جاساندى قۇرىلىمدار مەن تومەنگى قاباتىن ورناتۋ جۇمىستارىن جۇرگىزىپ جاتىر. يندۋستريا جانە ينفراقۇرىلىمدىق دامۋ مينيسترلىگى ۇسىنعان مالىمەتكە سۇيەنسەك, جوبانىڭ مەردىگەرلەرى رەتىندە بىرنەشە كومپانيا تارتىلعان. ولار – «ليانكياران يول تيكينتي» ااق, «Todini Construzioni Generali S.p.A», «Ant Insaat Maden Sanayi A.S.» جانە «سينە ميداس ستروي» بك» جشس. جول قۇرىلىسىن ەۋروپا قايتا قۇرۋ جانە دامۋ بانكى قارجىلاندىرىپ وتىر. ال «Renardet S.A» بىرلەسكەن كاسىپورنى & Aarvee Associates Architects Engineers & Consultants Pvt. Ltd», «ZS Engineering» جشس تەحنيكالىق باقىلاۋدى جۇزەگە اسىرادى.
جوباعا سايكەس, جولدىڭ 217 شاقىرىمدىق ۋچاسكەسىندە 8 وتكەل سالىنىپ, 63 سۋ قۇبىرى ورناتىلماق. وسىنشا شاقىرىمعا سوزىلاتىن تاس جولدى رەكونسترۋكتسيالاۋ 2023 جىلى اياقتالادى. سول كەزدە بۇل تاس جول ەكى جولاقتى قوزعالىسى بار ەكىنشى تەحنيكالىق ساناتقا سايكەس بولادى. بۇل, ارينە, جولداعى ۋاقىتتى ايتارلىقتاي قىسقارتىپ, ءوڭىردىڭ ترانزيتتىك الەۋەتىن ارتتىرماق. بۇدان بولەك جەرگىلىكتى تۇرعىندارعا جول بويىنداعى سەرۆيستىك قىزمەت كورسەتۋدى دامىتىپ, كاسىبىن دوڭگەلەتۋگە مۇمكىندىك بەرەدى.
مينيسترلىكتىڭ مالىمەتى بويىنشا اتىراۋ وڭىرىنەن رەسەي شەكاراسىنا دەيىنگى ارالىقتاعى جولدىڭ ۇزىندىعى 277 شاقىرىمدى قۇرايدى. بىلتىر قۇرىلىس جۇمىستارى رەسەي شەكاراسىنان بەرى قاراي 60 شاقىرىمدىق ۋچاسكەدە باستالعان بولاتىن. ونداعى قوزعالىس جىل سوڭىنا دەيىن اشىلادى دەپ كۇتىلۋدە. بۇل ۋچاسكەدەگى قايتا جاڭعىرتۋ جۇمىستارى رەسپۋبليكالىق بيۋدجەتتىڭ قاراجاتىنا جۇرگىزىلىپ جاتىر.
جول سالۋ جۇمىسى اتىراۋ قالاسىنىڭ ماڭىنداعى شاعىن اۋىلداردا دا قولعا الىنىپ وتىر. ماسەلەن, جول ماسەلەسى 1 مىڭعا جۋىق اۋلاسى بار بەرەكە اۋىلىنداعى باستى پروبلەمانىڭ ءبىرى ەدى. مۇندا اسفالتتىڭ جوقتىعىنان جاڭبىر جاۋسا, جولدىڭ ءبارى مي باتپاققا اينالىپ شىعا كەلەدى. ەندى تۇرعىندار سول قيىندىقتان قۇتىلماق. اتىراۋ قالالىق تۇرعىن ءۇي-كوممۋنالدىق شارۋاشىلىق ءبولىمىنىڭ باس مامانى ەرجان حاينوللاەۆتىڭ ايتۋىنشا, جاقىن ارادا اۋىلدا 19 شاقىرىم اسفالت توسەلەدى. بۇگىنگى تاڭدا اۋىلدىڭ 13 كوشەسىندە جولدىڭ نەگىزگى توسەمى دايىندالدى. بۇل اۋلادا 42 كوشەگە اسفالت توسەلەدى.
شاھار اۋماعىندا, وعان ىرگەلەس ەلدى مەكەندەردە سالىنىپ جاتقان جولدىڭ ساپاسىن اتىراۋ قالاسىنىڭ اكىمى قايرات ورازباەۆ باقىلاۋىنا الدى. اكىمنىڭ تاپسىرماسىمەن اسفالت توسەۋ پروتسەسى ۆيدەوعا ءتۇسىرىلىپ, قالالىق تۇرعىن ءۇي-كوممۋنالدىق شارۋاشىلىق بولىمىنە ەسەپ رەتىندە جىبەرىلەدى. وسىعان وراي مەردىگەردىڭ ۇسىنىسىمەن جول ساپاسىن باقىلايتىن زەرتحانا جۇمىس ىستەيدى. وسىنداي باقىلاۋمەن ەركىنقالا اۋىلدىق وكرۋگىنىڭ ءتورت كوشەسىندە 3,1 شاقىرىم جول اسفالتتالدى. بۇل اۋىلدا ۇزىندىعى 60,2 شاقىرىم جولدى جوندەۋ جوسپارلانىپتى.
قالا ىرگەسىندە جاڭادان بوي كوتەرىپ جاتقان شاعىن اۋدانداردا دا جول قۇرىلىسى قارقىن الا باستادى. ماسەلەن, «اقساي-2» شاعىن اۋدانىنىڭ 29 كوشەسىندە 27,8 شاقىرىم جول جوندەلدى. ەندى تاعى 16 كوشەدە 15,3 شاقىرىم اسفالت توسەۋ كوزدەلىپ وتىر. «تاسقالا-3» اۋىلىنىڭ تۇرعىندارى ءۇشىن جول قۇرىلىسى ءسال ەرتەرەك اياقتالادى. جىل سوڭىنا دەيىن جوبادا قاراستىرىلعان 8,8 شاقىرىم توسەلەدى. سونداي-اق «اتىراۋ-1» كەنتىندەگى 24 كوشەدە 19,5 شاقىرىم جول توسەۋ جۇمىسى اياقتالدى. ال جاقىندا 33,3 شاقىرىم تروتۋار سالۋ بويىنشا جوسپارلانعان جۇمىستار ىسكە اسىرىلادى.
سونىمەن قاتار دامبا-2 اۋىلىندا 2,2 شاقىرىمدىق 7 كوشەگە اسفالت توسەۋ جوسپارلانۋدا. وسى اۋىلعا قوڭسى قونعان «جاڭاتالاپ-1» شاعىن اۋدانىنداعى 24 كوشەدە 21,1 شاقىرىم پايدالانۋعا بەرىلدى. بۇل جۇمىستاردى مەردىگەرلىككە تاڭدالعان «اتىراۋينجستروي-ايس», «كازاحدورستروي» جانە «اتىراۋكولىك» سەرىكتەستىكتەرى جۇرگىزىپ جاتىر.
اتىراۋ وبلىسى
