كاسىپقوي بوكس دوداسىندا الدىمەن رينگ تورىنە الەم چەمپيونى بەكزات نۇرداۋلەتوۆ شىقتى. ونىڭ قارسىلاسى – 28 جاستاعى يبراھيم ماوكالا. جەكپە-جەك التى راۋندقا جوسپارلانعان ەدى. بىراق كاسىپقوي بوكستاعى العاشقى قارسىلاسىن ەكىنشى راۋندتا اۋىر سوققىمەن نوكاۋتقا تۇسىرگەن بەكزات نۇرداۋلەتوۆ بابىندا ەكەنىن بايقاتتى.
ەكىنشى جۇپتا تاعى ءبىر وتانداسىمىز دانيل سەمەنوۆ قارسىلاسى مۇسا ادجيبۋدى ءتورتىنشى راۋندتا تەحنيكالىق نوكاۋتقا جىبەردى. اۋىر سالماقتاعى بوكسشىلاردىڭ بۇل جەكپە-جەگى دە التى راۋندقا سوزىلۋى ءتيىس ەدى. ءۇشىنشى جەكپە-جەكتە قازاقستاندىق ەۆگەني پاۆلوۆتىڭ باعى جاندى. ول تاجىريبەلى گۋدلاك مرەمانى ەكىنشى راۋندتا سۇلاتىپ سالدى.
ال ابىلايحان ءجۇسىپوۆتىڭ كاسىپقوي بوكستاعى العاشقى جەكپە-جەگى جەڭىسپەن باستالدى. وعان تانزانيادان كەلگەن قارسىلاسى مەشاك مۆانكەمۆا ءبىراز قارسىلىق تانىتۋعا تىرىستى. ءسويتىپ ءبىرىنشى ورتا سالماقتاعى قوس بوكسشىنىڭ ايقاسى التى راۋندقا سوزىلدى. دەگەنمەن, تورەشىلەر جەڭىستى قازاقستاندىق بوكسشىعا بەرۋگە شەشىم قابىلدادى.
اتىراۋدا ءبىرىنشى رەت وتكەن كاسىپقوي بوكس كەشىنىڭ باستى ايقاسى قازاقستاندىق بوكسشى بەك نۇرماعانبەت پەن تاعى ءبىر تانزانيالىق ابدالاھ پازيمەن اراسىندا ءوتتى. تورەشىلەر التى راۋندقا جالعاسقان جارتىلاي اۋىر سالماقتاعى جەكپە-جەكتە قازاق ۇلانىنىڭ شەبەرلىگىن جوعارى باعالادى.
وسىلايشا, رينگ تورىندە قازاقتىڭ نامىسىن قورعاعان بەس بوكسشىنىڭ ايبىنى اسقاقتادى. ونىڭ ىشىندە بەكزات نۇرداۋلەتوۆ, دانيل سەمەنوۆ, ابىلايحان ءجۇسىپوۆ كاسىپقوي بوكستا العاش رەت باق سىنادى.
اتىراۋ وبلىسى
