1 قاراشا كۇنى كيرپيچنىي اۋىلىندا ورنالاسقان “Greenland” دەمالىس بازاسىنىڭ جانىندا پاترۋلدىك پوليتسيا قىزمەتكەرلەرى 32 جاستاعى “KIA Rio X-Line” اۆتوكولىگىنىڭ جۇرگىزۋشىسىن توقتاتتى, ول كولىك قۇرالىن “جەڭىل” دارەجەدە ماس كۇيىندە باسقارعان جانە كولىك قۇرالىن باسقارۋ قۇقىعىنان ايىرىلعان.
سول كەشتە زينچەنكو كوشەسىندە پاترۋلدىك پوليتسيا جاساعى 42 جاستاعى “وپەل ۆەكترا” اۆتوكولىگىنىڭ جۇرگىزۋشىسىن توقتاتتى, ول دا كولىك قۇرالىن “ورتاشا” دارەجەدە ماس كۇيىندە باسقارعان جانە كولىك قۇرالىن باسقارۋ قۇقىعىنان ايىرىلعان. جۇرگىزۋشىلەر اقتوبە قالاسى پب ۋۇي-نە قامالدى. ەكى دەرەك بويىنشا قر قك 346-بابى 1-بولىگى (كولىك قۇرالدارىن باسقارۋ قۇقىعىنان ايىرىلعان جانە الكوگولدىك, ەسىرتكىلىك جانە (نەمەسە) ۋىتقۇمارلىق ماساڭ كۇيدەگى ادامنىڭ كولىك قۇرالىن باسقارۋى) بويىنشا سوتقا دەيىنگى تەرگەۋ باستالدى.
ەستەرىڭىزگە سالا كەتەيىك, 2020 جىلعى 11 قاڭتاردا كۇشىنە ەنگەن زاڭعا ەنگىزىلگەن جاڭا وزگەرىستەرگە سايكەس, قازاقستاندا بۇرىن كولىك جۇرگىزۋ قۇقىعىنان ايىرىلعان, ماس كۇيىندە كولىك قۇرالدارىن جۇرگىزگەن جۇرگىزۋشىلەرگە قاتىستى جازا قاتاڭداتىلدى. وسى باپتىڭ سانكتسياسى بەس مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋ, نەمەسە سول مولشەردە تۇزەۋ جۇمىستارى, نە ءبىر مىڭ ەكى ءجۇز ساعاتقا دەيىنگى مەرزىمگە قوعامدىق جۇمىستارعا تارتۋ, نە بەس جىلعا دەيىنگى مەرزىمگە باس بوستاندىعىن شەكتەۋ, نە سول مەرزىمگە باس بوستاندىعىنان ايىرۋ, كولىك قۇرالىن باسقارۋ قۇقىعىنان ءومىر بويىنا ايىرۋ تۇرىندەگى جازانى كوزدەيدى.
وسىعان بايلانىستى, اقتوبە وبلىسىنىڭ پوليتسيا دەپارتامەنتى ازاماتتاردى الكوگولدىك جانە ەسىرتكىلىك ماساڭ كۇيدە كولىك قۇرالدارىن باسقارماۋدى سۇرايدى جانە ەسكەرتەدى, ءسىزدىڭ ويلاستىرىلماعان ارەكەتتەرىڭىزدەن كىناسىز ادامدار زارداپ شەگۋى مۇمكىن.
