تاراز قالاسىنىڭ 85 جاستاعى تۇرعىنى ليديا سيدورەنكو ءوزى كولىك جۇرگىزگەن 61 جىلدىڭ ىشىندە بىردە-ءبىر رەت تە جول ەرەجەسىن بۇزباعان ەكەن. تاجىريبەلى جۇرگىزۋشى ەرتەدە «موسكۆيچ-ۆوسمەركا» جانە «موسكۆيچ-2140» كولىكتەرىن تىزگىندەگەن بولسا, 1990 جىلى ونى «ۆاز-2106» تەمىر تۇلپارىنا الماستىرعان. ال «ۆولگا» گاز-24 ماشيناسىن 2011 جىلدان بەرى ءالى كۇنگە دەيىن باسقارىپ كەلەدى. ول جۇرگىزۋشى كۋالىگىن 1959 جىلى سول كەزدەگى جامبىل قالاسىنان الىپتى. ءبىر قىزىعى, ول بىراق ەشبىر كولىك ۇيىمىندا جۇمىس ىستەمەگەن, ۇزاق جىلدار بويى وبلىس بويىنشا تۇتىنۋشىلار وداعىندا ەڭبەك ەتىپتى. تاجىريبەلى جۇرگىزۋشى, اسىرەسە جاستاردى جول قوزعالىسى ەرەجەلەرىن مۇلتىكسىز ساقتاۋعا, وزىنەن باسقا ادامداردى دا قادىرلەۋگە شاقىرادى. «سوندا عانا ءتارتىپ ورناپ, جول-كولىك وقيعالارى مەن قايعىلى وقيعالار از بولماق», دەيدى ول.
اۋليەاتا جەرىندەگى ەڭ ءتارتىپتى جۇرگىزۋشىمەن جۋىردا عانا جامبىل وبلىستىق پوليتسيا دەپارتامەنتىنىڭ باستىعى, گەنەرال-مايور جانات سۇلەيمەنوۆ كەزدەسكەن بولاتىن. كەزدەسۋدە «ۆولگا», «موسكۆيچ», «جيگۋلي» سياقتى جەتى ءتۇرلى رەتروماشينالار قاتارلاسىپ, بوي تۇزەدى. ولاردىڭ كەيبىرىن ليديا سيدورەنكو جەكە ءوزى باسقارىپ, جاس پوليتسەيلەرگە كولىك باسقارۋ شەبەرلىگىن كورسەتكەن ەدى. ءتىپتى ءاربىر كولىكتىڭ ەرەكشەلىكتەرى تۋرالى دا ايتىپ بەردى. بۇل رەتتە ءوڭىردىڭ باس پوليتسەيى وعان تالاي جىل بويى تارتىپكە باعىنىپ, جول ەرەجەسىن بۇزباعانى ءۇشىن العىس ايتىپ, العىس حات, گۇل شوقتارىن جانە باعالى سىيلىق تابىستادى. جاسى سەكسەننىڭ بەل ورتاسىنا كەلسە دە ليديا سيدورەنكو كولىك جۇرگىزۋدەن شارشاعان ەمەس. قايتا تاراز كوشەلەرىندە كوپشىلىككە ۇلگى كورسەتىپ ءجۇر.
جامبىل وبلىسى
