كوللاجدى جاساعان قونىسباي شەجىمباي, «EQ»
پرەزيدەنت وسى جارلىققا وراي حالىققا جولداعان ۇندەۋىندە پارتيالىق تىزىمگە جاستار ءۇشىن 30 پايىزدىق كۆوتا ەنگىزىلگەنىن اتاپ ءوتتى. بۇل – جاستارعا بەرىلگەن ۇلكەن مۇمكىندىك, مەملەكەتتىك قولداۋ.
جاستار – قوعامنىڭ قوزعاۋشى كۇشى, ىزگىلىكتى ىستەردىڭ بەلورتاسىندا جۇرگەن بۋىن وكىلدەرى. ازاماتتىق كوزقاراسىن اشىق ايتىپ, قوعامدىق جۇمىستارعا بەلسەنە ارالاسىپ جۇرگەن جاستاردىڭ زاڭ شىعارۋشى مىنبەدەن, مەملەكەتتىك ماڭىزى بار شارالاردان توبە كورسەتىپ, يگى ىستەردىڭ باسى-قاسىندا بولۋى وتە قۇپتارلىق ءىس. بۇل – ازاماتتىق قوعام قالىپتاستىرۋعا جاسالعان قادام.
وسكەلەڭ ۇرپاق ەلىمىزدىڭ وركەندەۋى مەن دامۋىنا قوسار ۇلەسى ايرىقشا. ويتكەنى بولاشاققا ۇمتىلۋ, جانقيارلىقپەن جۇمىس ىستەۋ, ءونىمدى ەڭبەك ەتۋ, ت.ب. سيپاتتار جاستارعا ءتان تابيعي قۇبىلىستار. جاس بۋىننىڭ وزىنە ءتان وسىنداي الەۋەتىن قاجەتتى ۋاقىتتا, ءتيىستى ورىنعا سارپ ەتۋ دۇرىس ويدان, ءادىل شەشىمنەن تۋعان باستاما دەر ەدىك.
قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقاەۆ پارلامەنت ءماجىلىسى مەن ءماسليحات دەپۋتاتتارى سايلاۋىن تاعايىنداۋ تۋرالى حالىققا جولداعان ۇندەۋىندە: ء«بىزدىڭ ورتاق ميسسيامىز – قازاقستاندى وركەندەتۋ, ازاماتتارىمىزدىڭ يگىلىگى ءۇشىن قىزمەت ەتۋ. قازاقستان حالقى اسا ماڭىزدى تاريحي سىندارلى ساتتەردە ءبىر جەڭنەن قول, ءبىر جاعادان باس شىعارا ءبىلدى. حالقىمىز وسى جولى دا ەلىمىزدى جان-جاقتى جاڭعىرتۋ باعىتىنداعى جاڭا تاريحي ميسسياسىن لايىقتى اتقارادى دەپ سەنەمىن. تاۋەلسىزدىكتىڭ 30 جىلدىعى قارساڭىندا ەلىمىز كەمەلدەنە ءتۇسىپ, دامۋدىڭ جاڭا كەزەڭىنە شىعاتىنىمىز انىق. مەملەكەتىمىزدىڭ بارلىق ازاماتتارىن بەلسەندى ازاماتتىق ۇستانىمىن تانىتۋعا, پارلامەنت ءماجىلىسىنىڭ جانە ءماسليحاتتاردىڭ الداعى سايلاۋىنا ۇيىمشىلدىقپەن قاتىسۋعا شاقىرامىن» دەدى.
بىرلىككە ۇمتىلعان ۇلت قاشاندا يگىلىك پەن نىعمەتكە بولەنەدى. سىندارلى ساتتە حالىققا اسا قاجەت, بارشاعا ورتاق قۇندىلىق – بىرلىك. راسىندا, اللانىڭ الدىندا سۇيكىمدى ادامدار ەلدى بىرلىككە شاقىرعاندار, الاۋىزدىققا جول بەرمەگەندەر. ەكى دۇنيەنىڭ باقىتىنا جەتەلەيتىن قۇران كارىمنىڭ «حۋجۋرات» سۇرەسىندە: «ەي, ادامدار! نەگىزىندە, ءبىز سەندەردى ءبىر ەر جانە ءبىر ايەلدەن جاراتتىق ءارى سەندەردى ءبىر-بىرلەرىڭدى تانىپ, بىلۋلەرىڭ ءۇشىن حالىقتار مەن رۋلار ەتىپ جاسادىق. انىعىندا اللانىڭ الدىنداعى سەندەردىڭ ەڭ قۇرمەتتىلەرىڭ تاقۋالارىڭ», دەلىنگەن.
اللا تاعالا حالقىمىزدىڭ ىرىس-نەسىبەسىن مولايتىپ, اۋىزبىرشىلىگىن ارتتىرعاي. تاۋەلسىزدىگىمىزدى ماڭگىلىك ەتىپ, بولاشاققا باسقان قادامىمىزدى بەرەكەلى ەتكەي! تىلەگىمىز قابىل, مۇراتىمىز اسىل بولعاي! ءامين!
ناۋرىزباي قاجى تاعان ۇلى,
قازاقستان مۇسىلماندارى ءدىني باسقارماسىنىڭ توراعاسى,
باس ءمۇفتي
