ماسكەۋ جەنەۆاداعى «التىلىق» پەن يران كەلىسسوزدەرىنىڭ ءساتتى وتۋىنە نيەت بىلدىرەدى. رەسەيدىڭ سىرتقى ىستەر ءمينيسترى سەرگەي لاۆروۆ برازيليالىق ارىپتەسى لۋيس البەرتۋ فيگەيرەدۋمەن اڭگىمەلەسكەن سوڭ وسىنداي مالىمدەمە جاسادى. بۇل تۋرالى يتار-تاسس حابارلادى.
«ءبىز «جەنەۆا-2» كەلىسسوزدەرىنىڭ اياسىندا يران يادرولىق باعدارلاماسىن رەتتەۋ ماسەلەسىن تالقىلادىق, – دەدى لاۆروۆ. – يران يادرولىق باعدارلاماسىن رەتتەۋ جولدارىن ىزدەستىرۋدەگى برازيليانىڭ قوسقان ۇلەسىن جوعارى باعالايمىز. يران مەن «التىلىق» كەلىسسوزدەرىنىڭ بۇگىنگى راۋندى ءساتتى اياقتالادى دەپ ويلايمىز».
جەنەۆاداعى كەزدەسۋ يران سىرتقى ىستەر ءمينيسترى دجاۆاد زاريف پەن ەۋرو وداقتىڭ سىرتقى ىستەر مەن قاۋىپسىزدىك ساياساتى جونىندەگى جوعارعى وكىلى كەترين ەشتوننىڭ قاتىسۋىمەن وتەدى.
برازيليا سىرتقى ىستەر ءمينيسترى لۋيس البەرتۋ فيگەيرەدۋ سيرياداعى داعدارىستى رەتتەۋدەگى رەسەيدىڭ ءرولىن جوعارى باعالادى.
ايدار ورىسباەۆ.
