ونىڭ ىشىندە ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017 – 2021 جىلدارعا ارنالعان "ەڭبەك" مەملەكەتتىك باعدارلاماسى (بۇدان ءارى – "ەڭبەك" مەملەكەتتىك باعدارلاماسى) بويىنشا 11,4 مىڭنان استام ادام, ال جۇمىسپەن قامتۋدىڭ 2020 جىلعا ارنالعان جول كارتاسى (بۇدان ءارى – جقجك) شەڭبەرىندە 2,2 مىڭ ادام قولداۋ الدى. "ەڭبەك" مەملەكەتتىك باعدارلاماسىنا 11,4 مىڭ مۇگەدەكتىگى بار ادام قاتىستى, ونىڭ 4 مىڭى تۇراقتى جۇمىس ورىندارىنا, 6 مىڭنان استامى ۋاقىتشا جۇمىستارعا ورنالاستىرىلدى, 448 ازامات قىسقا مەرزىمدى كاسىپتىك وقىتۋمەن قامتىلدى, 284 ادام ميكروكرەديتتەر الدى جانە 700 ادام مەملەكەتتىك گرانتتار الدى. سونداي-اق, "باستاۋ بيزنەس" جوباسى بويىنشا كاسىپكەرلىك قىزمەت نەگىزدەرىنە وقىتۋعا 504 ادام جىبەرىلدى. تاعى 2,2 مىڭعا جۋىق مۇگەدەكتىگى بار ادام جۇمىسپەن قامتۋدىڭ جول كارتاسىنىڭ جوبالارىنا جۇمىسقا ورنالاستىرىلدى.
"جقجك اياسىندا جۇزەگە اسىرىلىپ جاتقان جوبالار الەۋمەتتىك-مادەني نىساندار مەن تۇرعىن ءۇي-كوممۋنالدىق شارۋاشىلىق نىساندارىن جوندەۋ مەن قايتا جاڭارتۋدى, ينجەنەرلىك-كولىك ينفراقۇرىلىمىن سالۋدى جانە ەلدى مەكەندەردى اباتتاندىرۋدى كوزدەيدى. مۇنداي جۇمىستارعا مۇگەدەكتىگى بار ادامدار مەديتسينالىق قورىتىندىلارعا سايكەس جىبەرىلەدى", دەدى ەڭبەك مينيسترلىگى حالىقتى جۇمىسپەن قامتۋ دەپارتامەنتىنىڭ ەڭبەك نارىعىن دامىتۋ باسقارماسىنىڭ باسشىسى باقىت قاشىربەكوۆ.
بۇدان باسقا, "حالىقتى جۇمىسپەن قامتۋ تۋرالى" زاڭعا سايكەس, جەرگىلىكتى اتقارۋشى ورگاندار اۋىر جۇمىستاردى, ەڭبەك جاعدايلارى زياندى, قاۋىپتى جۇمىستارداعى جۇمىس ورىندارىن ەسەپتەمەگەندە, جۇمىس ورىندارى سانىنىڭ ەكىدەن ءتورت پايىزعا دەيىنگى مولشەرىندە مۇگەدەكتىگى بار ادامدار ءۇشىن جۇمىس ورىندارىنا كۆوتا بەلگىلەۋدى قامتاماسىز ەتەدى. كۆوتا شەڭبەرىندە 2017 جىلدان باستاپ وسى جىلعا دەيىن 13,6 مىڭ مۇگەدەكتىگى بار ادام جۇمىسقا ورنالاستىرىلدى, ونىڭ ىشىندە 1,8 مىڭى – 2020 جىلدىڭ 2-توقسانىنىڭ قورىتىندىسى بويىنشا.
"2018 جىلدان باستاپ حالىقارالىق تاجىريبە نەگىزىندە مۇگەدەكتەردى جۇمىسقا ورنالاستىرۋ ءۇشىن ارنايى جۇمىس ورنىن جابدىقتاۋعا جۇمىس بەرۋشىلەردىڭ شىعىندارىن سۋبسيديالاۋ ەنگىزىلدى. بيىل كورۋ, ەستۋ جانە تىرەك-قيمىل اپپاراتى بۇزىلعان مۇگەدەكتەر ءۇشىن 31 ارنايى جۇمىس ورنىن قۇرۋ جوسپارلانۋدا", دەپ تولىقتىردى باقىت قاشىربەكوۆ.
