ەستەرىڭىزگە سالا كەتەيىك, بيىلعى جىلدىڭ 4 قازانىنان باستاپ الماتى قالاسى اكىمى باقىتجان ساعىنتاەۆتىڭ تاپسىرماسى بويىنشا حالىقارالىق اۋەجاي اۋماعىندا حالىقارالىق رەيستەردى باقىلاۋدى كۇشەيتۋ جانە شەتەلدەن كوروناۆيرۋس اكەلىنۋىن ەسكەرتۋ بويىنشا شارالار قابىلداندى.
قر كولىكتەگى باس مەملەكەتتىك سانيتار دارىگەرىنىڭ قاۋلىسىنا سايكەس, قازاقستاندىقتار ەلگە پتر انىقتاماسىنسىز كەلۋلەرىنە بولادى, بىراق ونداي جاعدايدا ولار جەتى كۇندىك كارانتينگە جىبەرىلەدى. پتر-تەكسەرۋ ناتيجەسى بار انىقتاماسى جوق شەتەلدىكتەر ۇشىپ شىعاتىن اۋەجايدىڭ اۋە كەمەسىنىڭ بورتىنا جىبەرىلمەيدى. سوعان قاراماستان, ۇشاق بورتىنا پتر انىقتاماسى جوق شەتەلدىكتەردىڭ وتىرۋىنا جول بەرگەن اۋە كومپانيالارىنا 4,5 ملن تەڭگە ايىپپۇل سالىنادى.
ۇشاق بورتىندا جولاۋشىلارمەن تولىق مالىمەتتەرى بار ساۋالنامالار الدىن الا تولتىرىلادى. سانيتارلىق قىزمەتكەرلەر جولاۋشىلاردى كۇتىپ الۋ كەزىندە ساۋالنامالاردى جيناپ, انىقتامالاردىڭ بار-جوعىن تەكسەرەدى. الماتى اۋەجايىنا كەلگەن كەزدە جولاۋشىلارعا مىندەتتى تۇردە تەرمومەتريا جۇرگىزىلەدى. وسىلايشا, ۇشاقتان شىعار الدىندا جولاۋشىلار ەكى دالىزگە بولىنەدى: انىقتامالارى جوقتار اۋەجايدىڭ جەكەلەنگەن ايماعىندا پاسپورتتىق باقىلاۋدان وتەدى. ودان كەيىن بۇل جولاۋشىلاردى ارنايى قىزمەت وكىلدەرى كارانتيندىك ستاتسيونارلارعا ورنالاستىرۋ ءۇشىن وزدەرىمەن بىرگە الىپ جۇرەدى, وندا ولار پتر تەستىلەۋ ادىسىمەن COVID-19-عا تەكسەرۋدەن ءوتىپ, ناتيجەسىن كۇتەدى. تەرىس ناتيجەلى انىقتامالارى بار جولاۋشىلار اۋەجايدان كەتە بەرۋلەرىنە بولادى.
جالپى, قالانىڭ اۋەجايىندا سانيتارلىق-ەپيدەميولوگيالىق باقىلاۋدىڭ بارلىق قاۋىپسىزدىك شارالارى قولعا الىنعان. الەۋمەتتىك ارا-قاشىقتىقتى ساقتاۋعا ارنالعان ارنايى بەلگىلەر, سانيتايزەرلەر بار.
ء"اربىر حالىقارالىق رەيس كەلگەننەن كەيىن ۇشىپ كەلۋ ايماعىنا دەزينفەكتسيالىق وڭدەۋ جۇرگىزىلەدى. قاۋىپسىزدىك قىزمەتى ماسكا رەجيمى مەن الەۋمەتتىك قاشىقتىقتىڭ ساقتالۋىن قاداعالايدى", دەپ حابارلادى الماتى حالىقارالىق اۋەجايىنىڭ ءباسپاسوز قىزمەتى.
سونىمەن قاتار, اۋەجايدىڭ تەرمينالىندا COVID-19-عا تەكسەرۋدەن ءوتۋ مۇمكىندىگى بار. ماتەريال تاپسىرۋ پۋنكتى ەكىنشى قاباتتا ورنالاسقان, وندا تەكسەرۋدىڭ كەلەسى تۇرلەرى جۇرگىزىلەدى: پتر-تەست, يفت-تەست جانە ەكسپرەسس-تەستىلەۋ.
بەلگىلى بولعانداي, سانيتارلىق-ەپيدەميالىق قاۋىپسىزدىكتىڭ وسى سىندى شارالارى بىرقاتار ەلدەردە قولعاي الىنۋدا. مىسالى, وڭتۇستىك كورەيانىڭ Asiana Airlines اۋە كومپانياسىنىڭ وكىلى ۆسەۆولود كيم قازاقستان رەسپۋبليكاسى ازاماتتارىنىڭ كورەيا رەسپۋبليكاسىنا كىرۋ ەرەجەلەرىن ءتۇسىندىردى.
"كورەيا رەسپۋبليكاسى بيلىگىنىڭ شەشىمىمەن كورەيا رەسپۋبليكاسىنا باراتىن بارلىق ازاماتتاردىڭ مىندەتتى تۇردە پتر انىقتاماسى بولۋى كەرەك. وسى جىلدىڭ 25 قازانىنا دەيىن تەك Asiana Airlines اۋە كومپانياسى ءۇشىن شەكتەۋلەر قويىلعان. ءبىز بورتقا تەك كورەيا رەسپۋبليكاسىنىڭ ازاماتتارىن عانا الا الدىق. جاقىن ارادان بەرى 25-ءشى قازاننان بەرى ەلگە كىرۋ ءتارتىبى جەڭىلدەتىلدى, قازىر ءبىز ءوزىمىزدىڭ اۋە كومپانيامىزدىڭ بورتىنا باسقا مەملەكەتتەردىڭ ازاماتتارىن الا الامىز. بىراق ءار رەيستە 100 ادامعا دەيىن جۇكتەۋ شەكتەۋى قويىلعان. قازاقستان ازاماتتارىنا پتر انىقتاماسىنسىز كورەياعا بارۋ مۇمكىن ەمەس", دەپ اتاپ وتكەن ول كورەيا رەسپۋبليكاسىنا بارعان كەزدە ءبىر اپتا كارانتيندە بولۋ مىندەتتى شارتتاردىڭ ءبىرى ەكەنىن ايتىپ, ءسوزىن تولىقتىردى.
