قوعام • 29 قازان، 2020

قارۋلى كۇشتەردە ۇشقىشسىز اۆياتسيالىق جۇيەلەر ەنگىزىلۋدە

1030 رەت كورسەتىلدى

قارۋلى كۇشتەردە ۇشقىشسىز اۆياتسيالىق جۇيەلەردى ەنگىزۋ جانە دامىتۋ بويىنشا بەلسەندى جۇمىس جۇرگىزىلۋدە، دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.

ۇشقىشسىز ۇشۋ اپپاراتتارىنىڭ پايدا بولۋى اسكەرلەر مەن قارۋ-جاراقتى قولدانۋدا ناقتى جاڭاشىلىق بولدى. بۇگىندە ولار قارۋلى قاقتىعىستاردا دا، سونداي-اق ءىس-شارالاردىڭ قاۋىپسىزدىگىن قامتاماسىز ەتۋ ءۇشىن دە كەڭىنەن قولدانىلۋدا.

قارۋ-جاراقتىڭ بۇل ءتۇرى قازاقستان اسكەرىندە بەلسەندى تۇردە ەنگىزىلۋدە. قارۋلى كۇشتەردىڭ قۇرلىق اسكەرلەرى "SkyLark" تاكتيكالىق ۇشقىشسىز ۇشۋ اپپاراتتارىمەن جابدىقتالعان. ول 10 كم² اۋماقتى باقىلاۋعا ارنالعان، بازادان 40 شاقىرىم قاشىقتىقتا بىرنەشە جۇزدەگەن مەتر بيىكتىكتەن جەردەگى جەكە ادامداردى كورۋگە جانە سۋرەتتى وپەراتوردىڭ مونيتورىنا بەرۋگە قابىلەتتى.

اسكەري-اۋە كۇشتەرىنىڭ تىزىمىندە "WingLoong" بارلاۋ-سوققى بەرۋ كەشەنى بار. ول اۋە بارلاۋىن جۇرگىزۋ مىندەتتەرىن عانا ورىنداپ قويماي، باسقارىلاتىن زىمىراندار مەن بومبالارعا جوعارى دالدىكتى سوققى بەرۋگە دە قابىلەتتى.

ۇشقىشسىز ۇشۋ اپپاراتتارى ارنايى ينفروقۇرىلىمدى تالاپ ەتپەيدى. بۇل رەتتە ولار جاۋىنگەرلىك تيىمدىلىكتى ايتارلىقتاي ارتتىرىپ، باسقارىلاتىن اۆياتسياعا جۇكتەمەنى تومەندەتەدى. ولاردى ماقساتتى ايقىنداۋعا، ارتيللەريا اتىسىن تۇزەتۋگە، جەردەگى نىساناعا سوققى بەرۋگە، اسا ماڭىزدى نىسانالار مەن ولاردىڭ ەلەمەنتتەرىن جەدەل تەرەڭدىكتە جويۋ ءۇشىن قولدانىلادى.

كوروناۆيرۋس پاندەمياسىنا بايلانىستى توتەنشە جاعداي كەزىندە قازاقستان قارۋلى كۇشتەرىنەن ۇشقىشسىز ۇشۋ اپاراتتارىنىڭ ەسەپتەرى تارتىلدى. ولاردىڭ كومەگىمەن 80-گە جۋىق بۇزۋشىلىق انىقتالدى. اتاپ ايتقاندا ادامداردىڭ رۇقساتسىز جانە كولىك قۇرالدارىنىڭ كارانتيندىك ايماقتاردان تىس جەرلەرگە ءوتۋى.

ۇشقىشسىز ۇشۋ اپپاراتتارىن قامتاماسىز ەتۋ مەن پايدالانۋ بويىنشا مامانداردى اۋە قورعانىسى كۇشتەرىنىڭ اسكەري ينستيتۋتىندا دايىندايدى. تاراز قالاسىندا ۇشقىشسىز ۇشۋ اپپاراتتارىن دايىنداۋ جانە جاۋىنگەرلىك قولدانۋ ورتالىعى قۇرىلدى. ول جەردە وپەراتورلار بىلىكتىلىگىن ارتتىرىپ، نۇسقاۋشىلاردى وقىتادى. سونداي-اق جىل سايىن وقۋ-ادىستەمەلىك جيىندار دا وتكىزىلەدى.

قازاقستاندىق اسكەري قىزمەتشىلەر بىلىكتىلىكتەرىن ارميا حالىقارالىق ويىندارى بارىسىندا دا شىڭداي تۇسەدى. قازاقستان جىل سايىن ەلىمىزدە وتكىزىلەتىن "سۇڭقار اڭشىلىعى" ۇشقىشسىز ۇشۋ اپپاراتتارىن ەسەپتەۋ سايىسىنىڭ باستاماشىسى بولدى. 2017 جىلدان 2019 جىلعا دەيىن قازاقستان قارۋلى كۇشتەرىنىڭ كومانداسى سايىستا ءبىرىنشى ورىنعا يە بولۋى، بۇل ءبىزدىڭ ەلىمىزدە قارۋ-جاراقتىڭ وسى ءتۇرىن تابىستى قولدانۋ مەن دامۋىن ايقىنداي تۇسەدى.

سوڭعى جاڭالىقتار

ۇقساس جاڭالىقتار