جاستاردىڭ اتا كاسىپتى جاڭعىرتۋعا نازارىن اۋدارۋ, ەڭبەككە باۋلۋدى ماقسات ەتكەن كونكۋرسقا قاتىسۋعا نيەت بىلدىرگەندەر قاراسى كوپ بولدى. ۇيىمداستىرۋشىلار جاستاردى اۋىل شارۋاشىلىعى سالاسىنداعى كاسىپكەرلىك بەلسەندىلىككە ىنتالاندىرۋدى دا كوزدەپ وتىرعانىن جەتكىزدى.
بۇل جوباعا تۇركىستان ءوڭىرى اۋداندارىنان 30-عا جۋىق ۆولونتەر قاتىسىپ, «الاتاۋ», «قاراتاۋ», «سىرداريا» جانە «تۇران» دەگەن ءتورت كومانداعا ءبولىنىپ جارىستى.
جارىستىڭ العاشقى كۇنى قازىعۇرت اۋدانىنداعى باقتان الما تەرۋمەن باستالىپ, جىگىتتەر قاۋىمىنىڭ قوي قىرقۋىنا ۇلاستى. العاشقى سايىستا «الاتاۋ» قۇراماسى باسىم تۇسسە, قوي قىرقۋ كەزىندە «سىرداريا» جىگىتتەرى ەپتىلىگىمەن العا شىقتى. جىگىتتەردىڭ ايتۋىنشا, قوي قىرقۋدا قولىنا العاش رەت قايشى العاندارى دا بار, سوعان قاراماستان ولار ۇيىمداستىرۋشىلاردىڭ تاپسىرماسىن جوعارى دارەجەدە ورىنداۋعا تىرىستى.
ال سايىستىڭ ەكىنشى كۇنى ساۋران اۋىلدىق وكرۋگىندە كارتوپ قازىپ, ونى جيناۋمەن باستالدى. بۇل جەردە بايقاۋعا قاتىسۋشىلاردىڭ كارتوپ جيناۋداعى جىلدامدىقتارى مەن سالماق بويىنشا باسىمدىلىقتارى ەسەپتەلىپ, ناتيجە بويىنشا «سىرداريا» توبى العا شىقتى. ءارى قاراي قاتىسۋشىلار سايىستى ماقتا القابىندا جالعاستىردى. ەلىمىزدىڭ وڭتۇستىگى – اق التىننىڭ وتانى ەكەنى بارىمىزگە بەلگىلى. سوندىقتان بۇل جارىستا اتالعان سايىستىڭ بولۋى زاڭدى. ماقتا تەرۋ كەزىندە قاتىسۋشىلارعا باعا بەرگەن قازىلار تەرىلگەن ماقتانىڭ تازالىعىنا, سالماعىنا ءجىتى ءمان بەردى.
«تۇران» كومانداسىنىڭ كاپيتانى ايكەرىم: «جارىستا بەرىلگەن تاپسىرمالاردى بۇرىن ەستىگەنىمىزبەن, ەشقاشان ورىنداپ كورگەنىمىز جوق. مىسالى, ءوزىم ماقتا القابىنا ءبىرىنشى رەت كەلىپ تۇرمىن. الما, ماقتا, كارتوپ تەرە ءجۇرىپ, وسى سالادا بۇرىننان قىزمەت ەتەتىن شارۋالاردىڭ ەڭبەگىن ءتۇسىنىپ جاتىرمىز. مۇنداي جوبالاردىڭ بولۋى ەڭبەك ادامدارىنا دەگەن قۇرمەتتى ارتتىرادى جانە جاستاردى دا سوعان باۋليدى دەپ ويلايمىن», دەيدى.
جارىستىڭ ءبىر قىزىعى – جاستار وزدەرى تۋعان وڭىردەگى كاسىپ تۇرلەرىنەن بولعان دودادا ەپتىلىكتەرىن بايقاتتى. مىسالى, ماقتاارالدىقتار ماقتا تەرىمدە ءبىرىنشى بولسا, «الاتاۋ» قۇراماسى الما مەن كارتوپ تەرۋدە كوزگە ءتۇستى.
«بۇل – جاستاردى ەڭبەككە باۋلۋعا ارنالعان جاقسى جوبا. ءبىزدىڭ تۇركىستان وبلىسى حالقىنىڭ 80 پايىزى اۋىلدا تۇرادى. وڭىرىمىزدە اۋىل شارۋاشىلىعى الەۋەتى قارقىندى دامىپ كەلەدى. بۇل – اتادان بالاعا ميراس بولىپ كەلە جاتقان كاسىپ. اتا كاسىپتىڭ جاندانۋى, اۋىل شارۋاشىلىعىنداعى يننوۆاتسيالىق دامۋ, شارۋاشىلىققا جاڭا تەحنولوگيالاردى ەنگىزۋ – ەندىگى جاستاردىڭ ەنشىسىندە. قازاقستان كەلەشەكتە الەمدىك ازىق-ت ۇلىك قاۋىپسىزدىگىن قامتاماسىز ەتۋدە ءوزىنىڭ تابيعي رەسۋرستارىنا ساي, لايىق ورنىن الادى دەپ سەنەمىز. وسى ماقساتتا قىزمەت ەتەمىز», دەيدى «جاستار رەسۋرستىق ورتالىعى» باسشىسى امالبەك ءومىرتاي.
جاستار ەكى كۇن بويى ناعىز اۋىل ءومىرىن سەزىنىپ جانە وزدەرىنىڭ ەڭبەككە قانشالىقتى قابىلەتتى ەكەنىن دالەلدەدى. جوباعا اۋىلشارۋاشىلىق سالاسىنىڭ ماماندارى, شارۋا قوجالىقتارىنىڭ يەلەرى, كوپبالالى انالار قازىلىق ەتتى. ناتيجە بويىنشا, «قاراتاۋ» كومانداسى III ورىن, ال «الاتاۋ» II ورىندى يەلەندى. I ورىندى «سىرداريا» قۇراماسى ەنشىلەپ, باس جۇلدەنى «تۇران» قانجىعاسىنا بايلادى. جەڭىمپاز جاستارعا العىس حات پەن باعالى سىيلىقتار تابىستالدى.
