مۋكوپوليساحاريدوزدار (مپس) – بەلگىلى ءبىر فەرمەنتتەردىڭ قالىپتاسۋىنا جاۋاپ بەرەتىن گەندەردىڭ مۋتاتسيالانۋىنان پايدا بولاتىن, سيرەك كەزدەسەتىن تۇقىم قۋالايتىن اۋرۋلار توبى. مپس سوزىلمالى پروگرەسسيۆتى اعىنمەن جانە ءارتۇرلى جۇيەلىك كورىنىستەرمەن سيپاتتالادى. اۋرۋ ورتالىق جۇيكە جۇيەسىنە, جۇرەك-تامىر, تىنىس الۋ جۇيەلەرىنە, سۇيەك-بۋىن اپپاراتىنا, ىشكى اعزالارعا (باۋىر, كوكباۋىر) اسەر ەتۋى ىقتيمال, سونداي-اق پاتسيەنتتەر ەستۋ مەن كورۋ قابىلەتىن جوعالتۋى مۇمكىن.
مپس-تىڭ جالپى العاندا جانە ونىڭ جەكە تيپتەرىنىڭ تارالۋى الەمدە ءارتۇرلى. بۇگىنگى تاڭدا قازاقستاندا مۋكوپوليساحاريدوزداردىڭ ءتۇرلى تيپتەرى بار 76 پاتسيەنت تىركەلگەن. سونىمەن II مپس بار پاتسيەنتتەردى قولداۋدىڭ جاڭا فورماتى دەنساۋلىق ساقتاۋ سالاسىنداعى ساراپشىلار مەن حانتەر سيندرومى بار پاتسيەنتتەر اراسىنداعى ءتيىمدى ديالوگ الاڭى بولىپ وتىر. بۇگىنگى تاڭدا ۇيىمداستىرۋشىلار ەكى ءبىلىم بەرۋ مەكتەبىن وتكىزدى. بۇل ۋاقىت تالابىنا سايكەس ونلاين فورماتتا ءوتتى جانە سيرەك گەنەتيكالىق اۋرۋى بار پاتسيەنتتەردىڭ وزەكتى ماسەلەلەرىنە ارنالدى. ءىس-شارالارعا مپس-تىڭ باسقا دا تيپتەرى بار پاتسيەنتتەر قوسىلدى.
ء«بىز ۇنەمى مۋكوپوليساحاريدوزى بار پاتسيەنتتەردى قولداۋدىڭ جاڭا جولدارىن ىزدەيمىز. بۇل, اسىرەسە كوروناۆيرۋس پاندەمياسى كەزەڭىندە وزەكتى بولدى», دەيدى «جاڭا ءومىر» مۋكوپوليساحاريدوزى جانە سيرەك كەزدەسەتىن اۋرۋلارى بار پاتسيەنتتەر قورى» قوعامدىق قورىنىڭ ديرەكتورى سامات رامازانوۆ.
مەكتەپتىڭ ءبىرىنشى وتىرىسىندا قازاقستانداعى مپس بويىنشا رەسپۋبليكالىق ۇيلەستىرۋشى, پەدياتريا جانە بالالار حيرۋرگياسى عىلىمي ورتالىعىنىڭ بالالار گاستروەنتەرولوگى مايرا ءشارىپوۆا مپس اۋرۋىنىڭ ەرەكشەلىكتەرىنە توقتالىپ, ەلدەگى جانە الەمدەگى COVID-19 جاعدايى, سونداي-اق پاتسيەنتتەر ءۇشىن كوروناۆيرۋستان كەيىنگى ىقتيمال اسقىنۋلار جانە پاندەميا كەزىندەگى قاۋىپسىزدىك شارالارى تۋرالى باياندادى.
«مۋكوپوليساحاريدوز – بۇل وتە اۋىر اۋرۋ. ەگەر ونى ەمدەمەسە, ەرتە بالالىق شاقتا مۇگەدەكتىك پەن ولىمگە اكەلەدى. ازىرگە مپس-دىڭ تەك بەس ءتيپىن ەمدەۋگە ارنالعان پرەپاراتتار جاسالدى: I, II, IV, VI جانە VII. ەمدەۋ فەرمەنتتى الماستىرۋ تەراپياسى تۇرىندە ۇسىنىلادى – اپتاسىنا ءبىر رەت پاتسيەنتتەرگە جەتىسپەيتىن فەرمەنتتەر تاعايىندالادى. بۇل پرەپاراتتار وتە قىمبات, بىراق ءبىزدىڭ مەملەكەت I, II, IV جانە VI تيپتەرى بار بالالاردى تەگىن قامتاماسىز ەتەدى. بىراق فەرمەنتتى الماستىرۋ تەراپياسىنان باسقا ءبىزدىڭ ەرەكشە ەمدەلۋشىلەرىمىز ارنايى جاعدايلارعا مۇقتاج. سوندىقتان مۋكوپوليساحاريدوزدارمەن اۋىراتىن پاتسيەنتتەرگە ارنالعان ءبىلىم بەرۋ مەكتەپتەرىنىڭ تسيكلى – ولاردىڭ ءومىر ءسۇرۋ ساپاسىن ارتتىرۋعا جاردەمدەسۋدىڭ تاماشا مۇمكىندىگى. بۇل مەكتەپكە تەك حانتەر سيندرومىمەن عانا ەمەس, مۋكوپوليساحاريدوزدىڭ بارلىق تۇرلەرى بار پاتسيەنتتەردىڭ اتا-انالارى قاتىساتىنىن اتاپ وتكىم كەلەدى. سەبەبى ماسەلە بارىنە ورتاق», دەيدى مايرا ءشارىپوۆا.
ەكىنشى مەكتەپ جرۆي ماۋسىمىنا ارنالدى. ونىڭ بارىسىندا «University Medical Center» كورپوراتيۆتىك قورى انا مەن بالا ۇلتتىق عىلىمي ورتالىعى سوماتيكا ءبولىمىنىڭ مەڭگەرۋشىسى جانە ورفاندىق ۇيلەستىرۋشىسى ايگۇل يبراەۆا ساراپشى بولدى. ۇيىمداستىرۋشىلار مپس-پەن اۋىراتىن پاتسيەنتتەرگە ارنالعان ءبىلىم بەرۋ مەكتەپتەرى جالعاساتىندىعىن ايتادى.
الماتى
