وسىناۋ قيىن-قىستاۋ ساتتە وسى سالاداعى ارىپتەستەرىمىز ءوز قارۋلاستارى جانە اسكەردىڭ نەگىزگى قۇرامى – جاۋىنگەرلەردى اتالعان ۆيرۋستان قورعاۋعا جانتالاسا قىزمەت ەتىپ ءجۇر. مىڭ جەردەن بۇل ولاردىڭ بەرگەن سەرتىنە سايكەس مىندەتى دەسەك تە, اق حالاتتىلاردىڭ ۆيرۋستى جۇقتىرۋ قاۋپى جوعارى ەكەنىن ەسكەرسەك, بۇل ناعىز جانكەشتىلىك قىزمەت دەر ەدىك. وسى باعىتتا تالماي ەڭبەكتەنىپ جاتقان ماماننىڭ ءبىرى كىشى سەرجانت نۇرسۇلتان نوعاەۆ. ول 2014 جىلدان باستاپ جاڭاوزەن قالاسىندا ورنالاسقان 5548 اسكەري ءبولىمى 3-جەدەل ماقساتتاعى روتاسىندا سانيتارلىق نۇسقاۋشى بولىپ قىزمەت ەتەدى.
نۇرسۇلتان قىزىلوردا وبلىسىنا قاراستى ارال اۋدانىندا دۇنيەگە كەلگەن. ارالداعى ورتا مەكتەپتى, سوسىن قىزىلوردا قالاسىنداعى «وركەنيەت» مەديتسينالىق كوللەدجىنىڭ «ەمدەۋ ءىسى» فاكۋلتەتىن ءساتتى اياقتادى.
ماماندىعى بويىنشا جۇمىسقا كىرىسپەس بۇرىن, «مەن ەڭ ءبىرىنشى كەزەكتە ازامات رەتىندە وتان الدىنداعى بورىشىمدى وتەۋ – نەگىزگى مىندەتىم» دەپ, ءوز قالاۋىمەن اسكەرگە اتتاندى. قىسقا مەرزىمدىك اسكەري قىزمەتىن وتار قالاشىعىنداعى 30212 اسكەري بولىمدە ابىرويمەن اتقاردى.
نۇرسۇلتان 2011 جىلدىڭ قاراشا ايىندا قىزىلوردا قالاسىنداعى «ايدان مۇناي» كومپانياسىنا فەلدشەر بولىپ جۇمىسقا ورنالاسىپ, جاس ماماندى ۇجىم جىلى قارسى الىپ, قولدارىنان كەلگەنشە كومەكتەرىن اياعان جوق.
جاستىڭ اتى جاس ەمەس پە, اسقان ىجداھاتتىلىقپەن, ىنتامەن ول دا بارىنشا ءوزىن جاقسى قىرىنان كورسەتتى. ەتكەن ەڭبەگى ەلەنىپ, قىزمەت ەتكەن جىلدارىندا قالالىق جەدەل مەديتسينالىق جاردەم ستانساسى اكىمشىلىگى, قالالىق دەنساۋلىق ساقتاۋ ءبولىمى, وبلىستىق دەنساۋلىق ساقتاۋ دەپارتامەنتى تاراپىنان العىس حاتتارمەن جانە ديپلومدارمەن ماراپاتتالدى.
الايدا سوناۋ بالا كەزىنەن دارىگەر بولۋدى ارمانداعان نۇرسۇلتان ماماندىعىن ەندى اسكەري ومىرمەن ۇشتاستىرىپ, ءوزىن اسكەري مەديتسينادا سىناعىسى كەلدى. 2012 جىلى ۇلتتىق ۇلاننىڭ جەم قالاسىنداعى 6655 اسكەري بولىمىندە كەلىسىمشارت بويىنشا بەكەت باستىعى, ياعني ساقشى بولىپ اسكەري قىزمەت جولىن باستادى.
ال 2014 جىلدان باستاپ جاڭاوزەندەگى 5548 اسكەري ءبولىمىنىڭ 3-جەدەل ماقساتتاعى روتاسىنىڭ سانيتارلىق نۇسقاۋشىسى لاۋازىمىندا بۇگىنگە دەيىن قىزمەتىن ءمىنسىز اتقارىپ كەلەدى.
نۇرسۇلتان ۇجىمعا جاڭادان كەلگەندە باعىت-باعدار بەرىپ, ەرەكشە ىقىلاس تانىتقان سول كەزدەگى مەديتسينالىق پۋنكتىنىڭ باستىعى, اعا لەيتەنانت قۇدايبەرگەن بەكمىرزاەۆقا, بار بىلگەنىن ۇيرەتىپ, ءاردايىم ونىڭ بىلىكتى مەديتسينا قىزمەتكەرى رەتىندە قالىپتاسۋىنا كومەك كورسەتىپ جۇرگەن ءبولىمنىڭ مەديتسينالىق قىزمەتىنىڭ باستىعى, مەديتسينا قىزمەتىنىڭ اعا لەيتەنانتى جەڭىس نارىمبەتوۆكە دەگەن العىسى شەكسىز. وسى اسكەري دارىگەرلەردىڭ ارقاسىندا ءوز سالاسىنىڭ قىر-سىرىن مەڭگەرىپ, كاسىبي تۇرعىدا جەتىلگەنىن ۇلكەن ريزاشىلىقپەن ايتادى.
نۇرسۇلتان تاستەمىر ۇلى ءۇشىن جاڭاوزەن شاھارى بۇگىندە تۋعان ولكەسىندەي بولىپ كەتكەن. وعان وسى قالانىڭ كوشە تازالىعى, ءتۇزۋ نيەتتى تۇرعىندارى مەن تىلەۋلەس ارىپتەستەرى ۇنايدى ەكەن. بۇل جونىندە وزىنەن سۇراعانىمىزدا:
– ماعان جاڭاوزەن قالاسى بىردەن ۇنادى, سەبەبى اۋا رايى ءبىزدىڭ سىر ەلىنىڭ اۋاسىنا ۇقسايدى ەكەن. وسىندا كەلىپ, ماماندىعىم بويىنشا اسكەري مەديتسينا قىزمەتىن اتقارىپ جاتقانىما قۋانىشتىمىن. دارىگەر رەتىندە الدىما كەلگەن اسكەري قىزمەتشىگە ءاردايىم جىلى قاباق تانىتىپ, ولاردىڭ جانىنا باتقان دەرتتى سەزىنەمىن. اق حالاتتىدان كومەك سۇراعان ءار جاننىڭ ورنىنا ءوزىمدى قويىپ, ونىڭ كومەككە قانشالىقتى ءزارۋ ەكەنىن تۇسىنەمىن. وسىلايشا مەيىرىم تانىتىپ, قولىمنان كەلگەن ەم-دومدى جاساپ, اۋرۋدان تەز ارادا ايىعۋىنا قولدان كەلگەنشە كومەگىمدى ايامايمىن. اسكەري ءبولىم ۇجىمىندا وتە ساۋاتتى جاندار جەتەرلىك. ولارمەن ەشقاشان داۋىس كوتەرىپ سويلەسكەن ەمەسپىن. ءاردايىم سىپايىلىق تانىتامىن. دارىگەرلەردى كوپشىلىك اق حالاتتى ابزال جاندار دەپ سىيلاپ جاتادى. سوندىقتان وسى سىيلاستىققا ءبىز ابدەن لايىقتى بولۋىمىز كەرەك, – دەيدى ول.
مىنە, وسىنداي ۇستانىممەن قىزمەت ەتەتىن كىشى سەرجانت نۇرسۇلتان نوعاەۆقا ساربازدار دا وتە ريزا. وعان ءاردايىم العىس ءبىلدىرىپ جاتادى.
مىنە, جەكە قۇرامنىڭ جانىنا دەمەۋ بولىپ, گيپپوكراتقا بەرگەن انتىنا كىر كەلتىرمەي, اق حالاتتى ابزال جان اتىنا لايىق ەڭبەك ەتىپ جۇرگەن كىشى سەرجانت نوعاەۆ سەكىلدى ناعىز اسكەري مەديتسينا مامانىن ءبىز دە كوپكە ۇلگى ەتۋدى ءجون كوردىك.
ەربولات مەرسايىن ۇلى,
پودپولكوۆنيك
