ونىڭ ىشىندە وپەراتوردى انىقتاۋ تالاپتارى, اۋكتسيون وتكىزۋ ەرەجەلەرى جانە جەر قويناۋىن پايدالانۋ قۇقىعىن بەرۋ جونىندەگى كوميسسيا تۋرالى ەرەجە قامتىلعان.
ۆيتسە-ءمينيستردىڭ ايتۋىنشا, ۆەدومستۆو كومىرسۋتەكتەر بويىنشا جەر قويناۋىن پايدالانۋ قۇقىعىن بەرۋگە ارنالعان ەلەكتروندى اۋكتسيوندار وپەراتورىنىڭ ينتەرنەت-رەسۋرسىن پايدالانا وتىرىپ, ەلەكتروندى نىساندا اۋكتسيون وتكىزۋ قاعيدالارىن بەكىتتى. بيۋدجەت قاراجاتىن ۇنەمدەۋ ماقساتىندا قاجەتتى قىزمەتى بار قولدانىستاعى اقپاراتتىق نىسانداردى (پلاتفورمالاردى) پايدالانۋ ماسەلەسى شەشىلدى.
تالاپقا سايكەس, ەلەكتروندى اۋكتسيون وپەراتورى رەتىندە – جارعىلىق كاپيتالىنا مەملەكەت 100% قاتىساتىن «اقپاراتتىق-ەسەپتەۋ ورتالىعى» اق ايقىندالدى.
«قاتىسۋشى, ينۆەستور, الەۋەتتى ءوتىنىم بەرۋشى ەلەكتروندى اۋكتسيونعا قاتىسۋ ءۇشىن اۋكتسيوندى وتكىزۋگە ءوتىنىش بەرۋى ءتيىس. ءوتىنىش ەلەكتروندى تۇردە بەرىلەدى. بۇل بيىلعى تسيفرلى قولتاڭبانىڭ كومەگىمەن ەنگىزىلگەن جاڭالىقتاردىڭ ءبىرى. ءوتىنىش جەر قويناۋىن پايدالانۋدىڭ مەملەكەتتىك قورىن باسقارۋ باعدارلاماسىنا ەنگىزىلگەن ۋچاسكەلەر بويىنشا بەرىلەدى. بۇل باعدارلاما يندۋستريا جانە ينفراقۇرىلىمدىق دامۋ مينيسترلىگىنىڭ بۇيرىعىمەن بەكىتىلەدى. قازىر وندا جەر قويناۋىن پايدالانۋ قۇقىعىن بەرۋ ءۇشىن 82 ۋچاسكە كورسەتىلگەن. ءوتىنىش كەلىپ تۇسكەننەن كەيىن ەنەرگەتيكا مينيسترلىگى 20 جۇمىس كۇنى ىشىندە وسى وتىنىشتەردىڭ بارلىعىن قارايدى جانە وڭ شەشىم قابىلدانعان جاعدايدا ينتەرنەت-رەسۋرستا حابارلاما جاريالانادى», دەدى ج.جاحمەتوۆا.
مىندەتتى شارتتارعا قازاقستاندىق كادرلاردى وقىتۋ, عزتكج-عا جۇمسالاتىن شىعىندار, ولارمەن جۇرگىزىلەتىن جۇمىستار جانە جەرگىلىكتى قامتۋ جاتادى. حابارلاما جاريالانعاننان كەيىن الەۋەتتى ءوتىنىش بەرۋشى ساۋدا-ساتتىققا قاتىسۋعا ەلەكتروندى تۇردە ءوتىنىش بەرىپ, جارنا تولەيدى. بۇگىندە ونىڭ مولشەرى 100 اەك قۇرايدى, بۇل – شامامەن 277 مىڭ تەڭگە.
«قاتىسۋشىلار سايتتا تىركەلىپ, ءنومىر الادى جانە اۋكتسيون زالىنا ەلەكتروندى اۋكتسيوندار وتكىزىلگەنگە دەيىن ءبىر ساعات بۇرىن كىرەدى. بۇل وتە ماڭىزدى. ويتكەنى اۋكتسيون كەزىندە كىرمەسە, ول وتپەۋى مۇمكىن. اۋكتسيون باعانى ارتتىرۋ ارقىلى وتەدى. ءبىز باستاپقى جازىلىم بونۋسىن ۇسىنامىز جانە سودان كەيىن باعا ءوسىپ وتىرادى. قاتىسۋشىلار ءوز باعالارىن ۇسىنادى. ەرەجەلەردە اۋكتسيون قادامىنىڭ قالاي وسەتىنىن سيپاتتادىق. مىسالى, اعىمداعى جازىلۋ بونۋسى 20 مىڭ اەك-كە تەڭ نەمەسە ودان از بولسا, وندا اۋكتسيوننىڭ كەلەسى قادامى 25%-عا, ودان ءارى 20, 15, 10 جانە 5%-عا ۇلعايادى. ال اۋكتسيون جەڭىمپازى انىقتالعان كەزدە, ول كەلىسكەن قول قويۋ بونۋسىن تولەيدى, سودان كەيىن ونىمەن كەلىسىمشارت جاسالادى», دەدى ۆەدومستۆونىڭ وكىلى.
جاڭا ەرەجەگە سايكەس, العاشقى اۋكتسيون 23 جەلتوقساندا نۇر-سۇلتان ۋاقىتىمەن ساعات 10.00-دەن 17.00-گە دەيىن وتەدى. ساۋدا-ساتتىققا 400 ملن تەڭگەگە قول قويۋ بونۋستارىنىڭ جالپى باستاپقى مولشەرى بار 10 مۇناي-گاز ۋچاسكەسى شىعارىلادى. ولاردىڭ تۇتاستاي اۋدانى – 29 مىڭ شارشى شاقىرىمدى قۇرايدى.
