ايماقتار • 28 قازان، 2020

مويىنقۇم اۋدانىندا بىرقاتار ماسەلە شەشىمىن تابۋدا

29 رەت كورسەتىلدى

بۇگىندە جامبىل وبلىسى، مويىنقۇم اۋدانىنىڭ دامۋ قارقىنى جوعارى. بارلىق سالادا ءوسۋ بار. بۇل تۋرالى بۇگىن مويىنقۇم اۋدانىنىڭ اكىمى مادەن مۇساەۆ تاراز قالاسىنداعى وڭىرلىك كوممۋنيكاتسيالار قىزمەتىنىڭ الاڭىندا وتكەن بريفينگتە ايتتى، دەپ حابارلايدى Egemen.kz

اعىمداعى جىلدىڭ قاڭتار-قىركۇيەك ايلارىندا ونەركاسىپ ونىمدەرىنىڭ جالپى كولەمى 59 078،0 ميلليون تەڭگەگە جەتكەن. ال، قۇرىلىس جۇمىستارىنىڭ كولەمى بيىل 13 272،5 ميلليون تەڭگەنى قۇراعان. سونداي-اق، وسى ۋاقىتقا دەيىن  2900،0 شارشى مەتر تۇرعىن ءۇي پايدالانۋعا بەرىلگەن. سول سياقتى اۋىل شارۋاشىلىعى سالاسىنىڭ جالپى ءونىمى 4459،4 تەڭگە بولعان.

"كوكتەمگى ەگىس دالا جۇمىستارى ءوز دەڭگەيىندە جۇرگىزىلدى. اتاپ ايتساق، بيىلعى جىلى ەگىس القابىن 334 گەكتارعا ارتتىرىپ، جوسپارلانعان 5408 گەكتار جەر تولىق يگەرىلدى. كوكتەمگى ەگىس دالا جۇمىستارىنا ۇكىمەت تاراپىنان كەپىلدەندىرىلگەن باعامەن اۋدان شارۋاشىلىقتارىنا 390 توننا جانار-جاعارماي ءبولىنىپ، اۋدان شارۋاشىلىقتارىنىڭ ەگىستىك جەر كولەمىنە سايكەس تاراتىلىپ بەرىلۋ جۇمىستارى جۇرگىزىلۋدە. جالپى، مويىنقۇم اۋدانىندا جەر ەرەكشەلىگىنە قاراي ەگىن شارۋاشىلىعىمەن "شۋ" وزەنىنىڭ بويىنداعى 7 ەلدى مەكەننىڭ شارۋاشىلىقتارى اينالىسادى. وتكەن جىلى اۋداندىق بيۋدجەت ەسەبىنەن 60،0 ميلليون تەڭگەگە جالپى ۇزىندىعى 69،0 شاقىرىم بولاتىن 9 توعاندى مەحانيكالىق تازالاۋدان وتكىزدىك. بيىلعى جىلى دا جالپى ۇزىندىعى 51 شاقىرىم بولاتىن توعانداردى تازالاۋ جۇمىستارى ۇيىمداستىرىلىپ وتىر. بۇل جۇمىستارعا اۋدان بيۋدجەتىنەن 16،4 ميلليون تەڭگە قارجى بولىنسە، "جۇمىسپەن قامتۋدىڭ جول كارتاسى" باعدارلاماسى اياسىندا 52،4 ميلليون تەڭگە قارجى قارالىپ، تازالاۋ جۇمىستارى جۇرگىزىلۋدە"، دەدى مادەن مۇساەۆ.

سونىمەن قاتار، بيىل "جۇمىسپەن قامتۋدىڭ جول كارتاسى" باعدارلاماسى ارقىلى اۋداندا 21 اۋىلىشىلىك جولداردى ورتاشا جوندەۋ ءۇشىن 454،5 ميلليون  تەڭگە قاراستىرىلعان. ال، اۋداندىق بيۋدجەت ەسەبىنەن 9 اۋىلىشىلىك جولداردى جوندەۋگە 206،2 ميلليون تەڭگە بولىنگەن. قازىرگى تاڭدا جۇمىس جۇرگىزىلۋدە ەكەن. سول سياقتى، اۋدان بويىنشا جالپى 24 اۋىلدىق ەلدى مەكەننىڭ 17 ەلدىمەكەنى نەمەسە 70،8 پايىزى ورتالىقتاندىرىلعان اۋىزسۋمەن قامتاماسىز ەتىلگەن.

"2019 جىلى جالپى 258،5 ميلليون تەڭگەگە اۋىزسۋ قۇبىرى قۇرىلىستارىنىڭ جۇمىستارى جۇرگىزىلدى. ونىڭ ىشىندە جوبالىق قۇنى 426،3 ميلليون تەڭگەنى قۇرايتىن "قىلىشباي اۋىلىنداعى اۋىزسۋ عيماراتىنىڭ جانە سۋ قۇبىرى قۇرىلىسىنىڭ 2-كەزەڭىن سالۋ" نىسانىنا 111،0 ميلليون تەڭگە قارجى ءبولىنىپ، جۇمىستارى جۇرگىزىلسە، بيىلعى جىلعا وسى جوبانى اياقتاۋعا 302،0 ميلليون تەڭگە قاراجات قاراستىرىلىپ وتىر. 2019 جىلى جوبالىق قۇنى 996،4 ميلليون تەڭگەنى قۇرايتىن "بالقاش كولىنەن بۋرىلبايتال ستانساسىنا دەيىن سۋ قۇبىرى جانە سۋ قابىلداۋ عيماراتتارى قۇرىلىسىن سالۋ" جانە جوبالىق قۇنى 583،6 ميلليون تەڭگەنى قۇرايتىن "بۋرىلبايتال-ميرنىي-قياقتى توپ سۋ قۇبىرى قۇرىلىسىن سالۋ" جۇمىستارى تولىق اياقتالدى. 2020 جىلعا جوبالىق قۇنى 780،0 ميلليون تەڭگە بولاتىن "قارابوگەت-سارىوزەك اۋىلدارىن سۋمەن جابدىقتاۋ جانە سۋ تاراتۋ قۇرىلىسى" جوباسىن قارجىلاندىرۋعا ءوتىنىم بەرىلدى"، دەدى اكىم.

جالپى، جيىن بارىسىندا مادەن مۇساەۆ قازىرگى تاڭدا حالىقتىڭ سۇرانىسى اۋىل-ايماققا گاز قۇبىرىن جۇرگىزۋ بولىپ وتىرعانىن جەتكىزدى. اكىم قازىرگى كەزدە كوپتەن بەرى كۇردەلى ماسەلە بولىپ كەلە جاتقان ەلدىمەكەندەرگە كوگىلدىر وتىن تارتۋ جۇمىستارى باستالعانىن مالىمدەدى. ياعني اكىمدىك كورشى شۋ اۋدانىنداعى گاز ستانساسىمەن كەلىسىمگە كەلىپتى. سونداي-اق، اۋدانداعى ءتۇرلى سالاداعى جۇمىستار تۋرالى دا اڭگىمەلەدى.

سوڭعى جاڭالىقتار

ۇقساس جاڭالىقتار