ۋنيۆەرسيتەت قابىرعاسىندا جاڭادان جاساقتالعان كابينەتتە جازۋشى ءومىرىنىڭ ءار جىلدارىنان سىر شەرتەتىن فوتوسۋرەتتەر, ەڭبەكتەرى مەن كىتاپتارى, ول تۋرالى ء باسپاسوز بەتتەرىندە جاريالانعان ماقالالار توپتاستىرىلعان. جينالعاندار الدىندا قازاقستان جازۋشىلار وداعىنىڭ توراعاسى, اقىن ۇلىقبەك ەسداۋلەت قاجىعالي مۇحانبەتقالي ۇلىنىڭ شىعارماشىلىعى تۋرالى ەستەلىكتەرمەن ءبولىستى.
وتكەن عاسىردىڭ 60-شى جىلدارىنان باستاپ قازاق ادەبيەتىندە وزىندىك قولتاڭباسىمەن تانىلا باستاعان قاجىعالي مۇحانبەتقالي ۇلىنىڭ "جۇلدىزدى تۇندەر", "توعاي سىبدىرى", "جاڭعىرىق", "قايداسىڭ, سەن ماحاببات" كىتاپتارى جارىق كورگەن. سونداي-اق وقىرمان 2016 جىلى قازاقستان رەسپۋبليكاسىنىڭ مەملەكەتتىك سىيلىعىنا يە بولعان, سىرىم باتىر بەينەسى مەن سول ءداۋىردىڭ قايشىلىقتى وقيعالارى تۋرالى جازىلعان "تار كەزەڭ" تاريحي رومانىن جاقسى بىلەدى.
ق.جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ رەكتورى, فيلولوگيا عىلىمدارىنىڭ دوكتورى, پروفەسسور باۋىرجان ەردەمبەكوۆ قابىرعالى قالامگەر, ۋنيۆەرسيتەتتىڭ قۇرمەتتى پروفەسسورى قاجىعالي مۇحانبەتقالي ۇلىنىڭ كەزىندە وقۋ ورداسىندا وتكىزىلگەن ايتۋلى شارالارعا قاتىسىپ, سالماقتى ويلارىمەن, زەردەلى ەستەلىكتەرىمەن جاس ۇرپاق ساناسىنا رۋحانيات ۋىزىن سىڭىرە بىلگەنىن جەتكىزدى.
اقتوبە ايماعىنداعى تاريحي تۇلعالاردىڭ ەسىمدەرىن قايتا جاڭعىرتۋ ماقساتىندا سوڭعى جىلدارى وسى ۋنيۆەرسيتەتتە "اقتوبە اقتاڭگەرلەرى" اۋقىمدى جوباسى قولعا الىنىپ, وقۋ عيماراتتارىنا حالىق اقىنى نۇرپەيىس بايعانيننىڭ, عالىم بەكەجان سۇلەيمەنوۆتىڭ, قوعام قايراتكەرى مۇحتار ارىننىڭ ەسىمدەرى بەرىلدى. بۇل رەتتە قۇدايبەرگەن جۇبانوۆ, تاحاۋي احتانوۆ, ءابىش كەكىلباەۆ, وتەجان نۇرعاليەۆ اتىنداعى كونفەرەنتس-زالدار, نۇرسۇلۋ تاپالوۆا اتىنداعى حورەوگرافيا زالى, روزا جامانوۆا اتىنداعى مۋزىكا كابينەتى, دەربىسالى بەركىمباەۆ, ءالىم المات, دوسجان حازىرەت, بەكەجان سۇلەيمەنوۆ, رابيعا سىزدىق, ەسەت جۇبانوۆ, ءاليا مولداعۇلوۆا, باكىر تاجىباەۆ, ەلتوق دىلمۇحامەدوۆ, امانتاي وتەگەنوۆ سىندى تۇلعالار مەن اۋعان سوعىسى ارداگەرلەرى اتىنداعى ءدارىسحانالار اشىلدى. ق.مۇحانبەتقالي ۇلىن ەسكە الۋ شاراسىنا جازۋشىنىڭ جۇبايى سۇلۋحانىم ءىلياسوۆا قاتىسىپ, جينالعاندارعا ريزاشىلىعىن ءبىلدىردى.
