سونداي-اق جول ءجۇرۋ قاعيدالارىن بۇزۋشىلىقتاردى اۆتوماتتى تۇردە تىركەيتىن «سەرگەك» اپپاراتتىق-باعدارلامالىق كەشەنىنىڭ 1224 كامەراسى قالا اۋماعىنداعى اۆتوكولىك جولدارىنىڭ 153 جەلىلىك ۋچاسكەلەرىنە جانە 51 رەتتەلەتىن كوشە قيىلىسىنا ورناتىلعان. «سەرگەكتىڭ» بەينەباقىلاۋ كامەرالارى ارقىلى جولدا ءجۇرۋ ەرەجەلەرىنىڭ بۇزىلۋى پوشتا بايلانىسىمەن, سمس حابارلاماسى ارقىلى كولىك يەلەرىنە جەتكىزىلەدى. بيىلعى 10 قىركۇيەكتە ىسكە قوسىلعان قۇرىلعىنىڭ كومەگىمەن وسى كەزگە دەيىن 6006 جول ءجۇرۋ قاعيدالارىن بۇزعان قۇقىقبۇزۋشىلىق انىقتالدى. قۇقىق بۇزۋشىلارعا 42 ملن تەڭگەدەن استام كولەمىندە ايىپپۇل سالىنىپ, 8 ملن 590 مىڭ تەڭگەسى ءوندىرىلدى.
جولدا ءجۇرۋ ەرەجەسىن الدەنەشە رەت بۇزعانىمەن قويماي, ايىپپ ۇلىن تولەمەيتىن جۇرگىزۋشىلەر ۇستالىپ, كولىكتەرى ايىپ تۇراعىنا قويىلىپ جاتىر. ءوڭىر پوليتسەيلەرى 15 قازاندا باستالعان «بورىشكەر» ءىس-شاراسى كەزىندە وسىنداي جۇرگىزۋشىنىڭ بىرىنە سالىنعان ايىپپۇلدىڭ مولشەرى 1 ملن تەڭگەدەن اسىپ كەتكەنىن انىقتادى.
– جول قوزعالىسى ەرەجەلەرىن بۇزۋ, ونىڭ ىشىندە جىلدامدىقتى اسىرۋ فاكتىلەرىنە قاتىستى فوتو-بەينەتىركەۋدى جۇزەگە اسىراتىن, جالپى اۆتوكولىك قوزعالىسىن باقىلاۋعا الاتىن «كوردون م-2», «كوردون م-4» كەشەندەرىنىڭ بەينەكامەرالارىنا ارمەنيادان اكەلىنگەن «BMW-525» اۆتوكولىگى تۇسكەنىن انىقتادى. كولىك جۇرگىزۋشىسى 55 رەت جىلدامدىقتى اسىرىپ, 1 ميلليون 83 مىڭ 420 تەڭگە كولەمىندەگى ايىپپۇلدى تولەمەگەنى ءۇشىن ۇستالدى. جىلدامدىقتى 40 رەت ۇدەتكەن «ۆاز-21144» كولىگىنىڭ جۇرگىزۋشىسىنە سالىنعان ايىپپۇلدىڭ مولشەرى 666 مىڭ 720 تەڭگەنى قۇراعان. سونداي-اق «ۆاز-2108» اۆتوكولىگىنىڭ جۇرگىزۋشىسىنە 21 مارتە جىلدامدىقتى اسىرعانى ءۇشىن 333 مىڭ 360 تەڭگە ايىپپۇل سالىنعان. ال 28 رەت جىلدامدىعىن اسىرعان رەسەي فەدەراتسياسىنىڭ ەسەبىندە تۇرعان «ۆاز-21014» كولىگىنىڭ جۇرگىزۋشىسىنە سالىنعان ايىپپۇل 494 مىڭ تەڭگەگە جەتكەن, – دەيدى وبلىستىق پوليتسيا دەپارتامەنتىنىڭ ءباسپاسوز حاتشىسى گۇلنازيرا مۇحتاروۆا.
پاترۋلدىك قىزمەت پوليتسەيلەرى يەلەرى ايىپپۇل تولەمەگەن تاعى 37 اۆتوكولىكتى انىقتاپ, توقتاتتى. اكىمشىلىك قۇقىقبۇزۋشىلىق تۋرالى كودەكستىڭ 785-بابىنا سايكەس, بورىشكەر اتانعان جۇرگىزۋشىلەردىڭ كولىكتەرى ايىپ تۇراعىنا قويىلدى.
اتىراۋ وبلىسى
