ايماقتار • 27 قازان، 2020

اقمولا پوليتسەيلەرى ەنەسىنىڭ اتىنان نەسيە العان ايەلدى ۇستادى

415 رەت كورسەتىلدى

اقمولا پوليتسەيلەرى ءوزىنىڭ قايىن ەنەسىنىڭ اتىنا، ونىڭ كەلىسىمىنسىز ونلاين قارىز رەسىمدەگەن ايەلدى انىقتادى، – دەپ حابارلايدى Polisia.kz.

وسىنداي الاياقتىقتىڭ تاعى ءبىر فاكتىسى زەرەندى اۋدانىندا تىركەلدى. 5 قازاندا جەرگىلىكتى پوليتسيا بولىمىنە 53 جاستاعى ايەل ارىزدانعان. ونىڭ ايتۋىنشا، 29 مامىردا ونىڭ اتىنا بەلگىسىز بىرەۋ 75 مىڭ تەڭگە سوماعا ونلاين قارىز رەسىمدەگەن. ناتيجەسىندە، ونىڭ بارلىق مۇلكى تاركىلەندى جانە ونىڭ اقشالاي شوتتارى دا بۇعاتتالدى، بارلىق جاعدايلاردى انىقتاۋ ءۇشىن جابىرلەنۋشى دەرەۋ پوليتسياعا جۇگىنۋگە شەشىم قابىلدادى.

اتالعان فاكتى بويىنشا پوليتسيا قازاقستان رەسپۋبليكاسى قك 190-بابى 1-بولىگى (الاياقتىق) بويىنشا سوتقا دەيىنگى ءىس جۇرگىزۋدى باستادى. جۇرگىزىلگەن جەدەل-ىزدەستىرۋ ءىس-شارالارىنىڭ ناتيجەسىندە ءتارتىپ ساقشىلارى نۇر-سۇلتان قالاسىندا تۇراتىن 20 جاستاعى ايەلدى انىقتادى. ول ءوز كىناسىن تولىق مويىندادى. بەلگىلى بولعانداي، كۇدىكتى جابىرلەنۋشىنىڭ كەلىنى بولعان. وسى جىلدىڭ مامىر ايىندا كەلىنى كۇيەۋىنىڭ تۋىستارىنا قوناققا كەلىپ، قارت ايەلدىڭ بارلىق قۇجاتتارىنا قول جەتكىزدى. وعان شۇعىل تۇردە اقشا كەرەك بولىپ، ونلاين قارىزدى راسىمدەۋدى شەشتى. الايدا، بەرەشەكتى تولەۋدى ۇمىتىپ كەتكەن، وسىنداي جاعداي بولاتىنىن ويلاماعان.

پوليتسيا قىزمەتكەرلەرى، وكىنىشكە وراي، بۇل وقيعا وبلىستا ءبىرىنشى جاعداي ەمەس ەكەنىن اتاپ ءوتتى. جىل باسىنان بەرى پوليتسياعا وسىعان ۇقساس فاكتىلەر بويىنشا 300-دەن استام ازامات جۇگىنگەن. بارلىق جاعدايلاردا الاياقتار قۇجاتتاردىڭ دەرەكتەمەلەرى جانە بانك كارتالارى بويىنشا ونلاين قارىزدار رەسىمدەگەن، ولاردى جابىرلەنۋشىلەردىڭ وزدەرى ۇسىنعان. كوبىنەسە الاياقتار شاعىن نەسيە ۇيىمدارى جەكە تۇلعانىڭ دۇرىستىعىن تەكسەرۋ ءراسىمىن جۇرگىزبەيتىندىگىن جانە ۇسىنىلعان قۇجاتتار، ونىڭ ىشىندە جوعالعان قۇجاتتار بويىنشا نەسيەلەردى بەرەتىندىگىن پايدالانادى.

پوليتسيا دەپارتامەنتى وسىنداي فاكتىلەردىڭ الدىن الۋ ماقساتىندا تۇرعىنداردى سەرگەك بولۋعا، جەكە قۇجاتتاردىڭ، بانك كارتالارىنىڭ، CVV-كود پەن پارولدەردىڭ دەربەس دەرەكتەرىن مەسسەندجەرلەر مەن الەۋمەتتىك جەلىلەر ارقىلى بەرمەۋگە شاقىرادى.

سوڭعى جاڭالىقتار

ەرتەڭىن ويلاعان ەكپە الادى

كوروناۆيرۋس • بۇگىن، 16:53

ۇقساس جاڭالىقتار