ايماقتار • 27 قازان، 2020

سولتۇستىك قازاقستاندا كوكتايعاقتان كولىك اپاتى جيىلەدى

38 رەت كورسەتىلدى

قار ءبىلىنىپ، كوكتايعاق باستالعالى سولتۇستىكقازاقستاندىق پاترۋلدىك پوليتسيا باتالونىنىڭ جۇمىسى ارتا تۇسۋدە. ويتكەنى، ماشينالاردىڭ جولدان تايىپ كەتۋى جيىلەپ، اپاتتى جاعدايلار ارتىپ جاتىر، - دەپ جازادى Egemen.kz

جاقسىباي سامرات

ماسەلەن، وتكەن دەمالىس كۇندەرى سونداي بىرنەشە وقيعا بولدى. سونىڭ ءبىرى ومبى-پەتروپاۆل تاسجولىمەن كەلە جاتقان جولاۋشىلاردىڭ باسىندا بولعان. بۇل جايلى جولاۋشى ينستاگرامم پاراقشاسىندا بىلاي دەپ جازعان: "تۇنگى ساعات 1 شاماسىندا ومبى تاسجولىمەن پەتروپاۆلعا قاراي بەت تۇزەگەن بولاتىنبىز. بوران باستالىپ، جولدىڭ بەتى كوكتايعاققا اينالدى، باۋىرىم ەكەۋمىز مىنگەن كولىك كوكتايعاقتىڭ كەسىرىنەن جولدان كيۋۆەتكە ءتۇسىپ كەتتى. كومەككە پوليتسيانى شاقىرعان ەدىك. ولار دەر كەزىندە جەتىپ، كومەك قولىن سوزدى. جەدەل ارەكەت ەتىپ، جولعا الىپ شىققان جپق قىزمەتكەرلەرىنە العىس بىلدىرگىمىز كەلەدى. جىگىتتەرگە ۇلكەن راقمەت. پاترۋلدىك ماشينانىڭ ءنومىرى 0054"، - دەلىنگەن وندا.

ال ەسىل اۋدانىندا كاماز-دىڭ جۇرگىزۋشىسى كوكتايعاق جولمەن الىسا وتىرىپ، دەنساۋلىعىنىڭ ناشارلاۋىنا بايلانىستى كولىگىن توقتاتۋعا ءماجبۇر بولعان. ول دا پوليتسيانىڭ دابىل قابىلدايتىن نومىرىنە حابارلاسىپ، وزىنە كومەك سۇراعان. جەدەل كەلگەن پاترۋلدىك پوليتسيانىڭ قىزمەتكەرلەرى نۇرسۇلتان اۋشاحمانوۆ پەن قايسار مۇقانوۆ سىرقاتتانعان جۇرگىزۋشىنى اۋرۋحاناعا جەتكىزگەن. بۇعان ناۋقاستانىپ قالعان جۇرگىزۋشى جۇمىس ىستەيتىن "پەتروپاۆل-جولدارى" جشس ەسىل وندىرىستىك جول ۋچاسكەسىنىڭ باستىعى سقو پوليتسيا دەپارتامەنتىنە جۇگىنىپ، كورسەتكەن كومەگى ءۇشىن العىسىن ءبىلدىردى.

ال كەشە پەتروپاۆل قالاسىنىڭ ءبىر تۇرعىنى تاڭعى مەزگىلدە كەلەڭسىز جاعدايعا تاپ بولدى. ول كوكتايعاقتىڭ كەسىرىنەن ماشيناسىن ءسوندىرىپ الىپ، جولدىڭ ورتاسىنا تۇرىپ قالعان. «امالىم تاۋسىلعان مەن جولدىڭ ورتاسىندا جول-جونەكەي كولىكتەرگە كەدەرگى كەلتىردىم»، - دەيدى كولىگى جامبىل مەن چەليۋسكين كوشەلەرىنىڭ قيىلىسىندا ماشيناسى وت الماي قالعان باقىتجان جاقىپوۆا.

باسقا شاراسى بولماعان سوڭ ول دا پوليتسياعا حابارلاسۋعا ءماجبۇر بولعان. ءسويتىپ 20 مينۋتتاي جولدا تۇرعان ايەلگە پوليتسەيلەر كومەككە كەلگەن. پاترۋلدىك پوليتسيا باتالونىنىڭ قىزمەتكەرلەرى دانيار وتەگەنوۆ پەن جامبىل قاليەۆ كولىكتى تىركەۋگە الىپ، تەحنيكالىق قىزمەت كورسەتۋ ستانتسياسىنا جەتكىزگەن. «وزگەنىڭ باسىندا ورىن العان جاعدايعا بەي-جاي قاراماي، كومەك قولىن سوزعان ءتارتىپ ساقشىلارىنا العىس بىلدىرەمىن»، - دەپ جازعان ايەل.

كوكتايعاقتىڭ كەسىرى قىس بويى زالالىن تيگىزەرى انىق. سوندىقتان پاترۋلدىك پوليتسيا جۇرگىزۋشىلەرگە دەر كەزىندە قىستىق دوڭگەلەكتەرىن سالىپ، ساقتىق شارالارىن ءجىتى ساقتاۋدى ەسكەرتەدى.

سولتۇستىك قازاقستان وبلىسى

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز