قاسىم-جومارت توقاەۆقا مينيسترلىكتىڭ بيىلعى 9 اي ىشىندە اتقارعان جۇمىستارىنىڭ ناتيجەلەرى جونىندە ەسەپ بەرىلدى.
ادىلەت ءمينيسترى مەملەكەت باسشىسىنا كوروناۆيرۋس پاندەمياسىمەن كۇرەس جۇمىستارىنىڭ جۇرگىزىلۋى, سونىڭ ىشىندە, بىرقاتار زاڭ جوبالارىنىڭ ازىرلەنۋ بارىسى, ولاردىڭ قۇقىقتىق ساراپتاماسى مەن پارلامەنتتە قارالۋى تۋرالى باياندادى.
مارات بەكەتاەۆ پرەزيدەنتكە بيىلعى ناۋرىز-مامىر ايلارىندا ەنگىزىلگەن توتەنشە جاعداي رەجىمىنە بايلانىستى قۇقىقتىق ماسەلەلەردى ءتۇسىندىرۋ جۇمىستارى جايىندا ايتتى. وسى رەتتە, ادۆوكاتتار مەن زاڭ جونىندە كەڭەس بەرۋشىلەردىڭ ۇزدىكسىز قىزمەتى قامتاماسىز ەتىلگەن, سوت ورىنداۋشىلارىنىڭ جۇمىسى ۋاقىتشا توقتاتىلعان. توتەنشە جاعداي رەجىمى اياقتالعاننان كەيىن بارلىق سوت ورىنداۋشىلارىنىڭ جۇمىسى ازاماتتاردىڭ قۇقىعىن قورعاۋعا, اتاپ ايتقاندا, اليمەنتتەردى وندىرۋگە جانە ەڭبەكاقى تولەمىن قامتاماسىز ەتۋگە باعىتتالدى.
سونىمەن قاتار قاسىم-جومارت توقاەۆقا سوت ساراپتاماسى ورگاندارىنىڭ جۇمىسىن جەتىلدىرۋ جونىندە مالىمەت بەرىلدى.
كەزدەسۋ سوڭىندا مەملەكەت باسشىسى مينيسترگە ازاماتتاردىڭ قۇقىقتارىن قورعاۋعا, نورماتيۆتىك اكتىلەردى شىعارۋ قىزمەتىنىڭ ساپاسىن ارتتىرۋعا, جاڭا زاڭداردى جانە باسقا دا نورماتيۆتىك-قۇقىقتىق اكتىلەردى دايىنداۋ جونىندەگى مەملەكەتتىك ورگانداردىڭ جۇمىسىن ۇيلەستىرۋگە قاتىستى بىرقاتار تاپسىرما بەردى.
