دەنساۋلىق ساقتاۋ باسقارماسىنىڭ مالىمەتىنە قاراعاندا, مەديتسينالىق مەكەمەلەردە كوروناۆيرۋس ينفەكتسياسىنا قارسى پرەپاراتتاردىڭ جەتكىلىكتى قورى جاساقتالعان. جەكە قورعانىش قۇرالدارى اپتا سايىن ۇزدىكسىز جەتكىزىلەدى. ال قاۋىپتى ىندەتكە شالدىعىپ, ەم الىپ جاتقان ناۋقاستار ءۇشىن اميكاتسين, ازيتروميتسين, ناتري گەپارينى, دەكسامەتازون, دەكسامەدەتوميدين سەكىلدى باسقا دا انتيبيوتيكتەردىڭ بىرنەشە ءتۇرى بار. الايدا مونيتورينگتىك توپتىڭ مۇشەلەرى №3 اتىراۋ قالالىق ەمحاناسىنداعى جاعدايدىڭ باسقاشا ەكەنىن انىقتادى. ويتكەنى, ولار ەمحاناعا كىرەبەرىسىنەن-اق مەديتسينالىق بەتپەردەنىڭ بولماعانىنا كوز جەتكىزگەن. ال جاۋاپتى قىزمەتكەر بەتپەردەنىڭ قازىر عانا تاۋسىلىپ قالعانىن ايتقان. قالاداعى 4 900 تۇرعىنعا قىزمەت كورسەتەتىن ەمحانانىڭ قورىنداعى كەيبىر ءدارى-دارمەكتىڭ سانى جەتكىلىكسىز بولىپ شىققان.
– مامانداردىڭ ايتۋىنشا, ماسەلەن «كسارەلتو» تابلەتكاسى مەن «دەكسامەتازوننىڭ» شامامەن ەكى ايعا جەتكىلىكتى مولشەرى 5 مىڭ دانا بولۋى قاجەت. مۇنداعى قويمادا اتالعان دارىلەردىڭ تەك 10 دانا قورابى بار. اتالعان ەمحانانىڭ ديرەكتورى ايمان وتەگەنوۆا وزگە ءدارى-دارمەكتەر ءبىرىنشى قاباتتاعى ءدارىحانادا بارىن ءمالىم ەتتى. بىراق, مونيتورينگتىك توپ مۇشەلەرى بۇل جاۋاپقا قاناعاتتانباي, قويماداعى قاجەتتى ءدارى-دارمەكتىڭ قورىن ءالى دە تولىقتىرۋ قاجەتتىگىنە نازار اۋداردى, – دەپ حابارلادى وڭىرلىك دەپارتامەنتتىڭ ءباسپاسوز قىزمەتى.
قوعامدىق باقىلاۋشىلار توبى «سق-فارماتسيا» مەكەمەسىنىڭ اتىراۋ وبلىسىنداعى قويماسىنان ءدارى-دارمەكتى دە, جەكە قورعانىش قۇرالدارىن دا تابا المادى. ءبىر تاڭدانىس تۋدىراتىن ماسەلە – اتىراۋ وبلىسىنا بەرىلۋى ءتيىس ەكى ايلىق ءدارى-دارمەكتەر اقتوبە وبلىسىندا ساقتالاتىنى. نەگە بۇلاي؟ مۇنىڭ سەبەبىن اتالعان مەكەمە وكىلدەرى تۇسىندىرە المايدى.
وسىنداي ولقىلىق وبلىستىق كارديولوگيالىق ورتالىقتا دا كەزدەسىپ وتىر. ويتكەنى مۇندا دا كوروناۆيرۋس ينفەكتسياسىن جۇقتىرعان ناۋقاستاردى ەمدەۋگە قولدانىلاتىن ءدارى-دارمەكتىڭ ەكى ايلىق قورى قويماعا جەتكىزىلمەگەن. ورتالىق ديرەكتورى مارات قونىسوۆتىڭ پىكىرىنشە, قاۋىپتى ىندەتتى جۇقتىرعان ناۋقاستاردى كارديولوگيالىق اۋرۋلارعا ارنالعان ءدارى-دارمەكپەن ەمدەۋگە بولادى ەكەن.
وڭىردەگى مەديتسينالىق ۇيىمداردىڭ قويماسىندا ساقتالعان دارىلىك زاتتاردىڭ ەكى ايلىق قورىنا قاتىستى وبلىستىق دەنساۋلىق ساقتاۋ باسقارماسىنىڭ ۇستانىمى قانداي؟ شىنىمەن دە احۋال ءدال وسىلاي قالىپتاسىپ وتىر ما؟ ەمحانالار ءدارى-دارمەكپەن تولىق قامتىلدى ما؟ الدە... باسقارمانىڭ ءباسپاسوز قىزمەتى تاراتقان اقپاراتقا سۇيەنسەك, دەنساۋلىق ساقتاۋ مينيسترلىگىنىڭ №666 بۇيرىعى بار. وندا كوروناۆيرۋس ينفەكتسياسىن ەمدەۋ ءۇشىن امبۋلاتوريالىق ءدارى-دارمەكتەرمەن قامتاماسىز ەتۋ كوزدەلگەن. سوعان سايكەس, وسى جىلدىڭ 20 شىلدەسىندە ەمدەۋ تىزىمىنە ءۇش انتيكواگۋليانت پەن ەكى قىزۋ تۇسىرەتىن دارىلىك پرەپارات ەنگىزىلىپتى. قازىر وبلىسقا اتالعان پرەپاراتتاردىڭ 194 460 داناسى اكەلىنگەن. ياعني بۇل دارىلىك زاتتاردىڭ بارلىعى باستاپقى مەديتسينالىق سانيتارلىق ۇيىمداردىڭ قويمالارىندا ساقتاۋلى تۇر.
– ال اتىراۋ قالالىق №3 ەمحاناعا قاتىستى ايتار بولساق, 53 380 دانا دارىلىك زات قوردا تۇر. پاندەميانىڭ ءبىرىنشى تولقىنىندا اتالعان ەمحانا تىركەلۋشىلەرىنىڭ 1 پايىزى عانا كوروناۆيرۋس ينفەكتسياسىنا شالدىققان. وسى كورسەتكىشتى ەسكەرسەك, №3 ەمحانانىڭ قويماسىندا قازىر تىركەلۋشىلەردىڭ 7 پايىزىنا جەتەتىندەي دارىلىك زاتتار بار. ەمحاناعا كەلگەن توپ ەمحاناداعى كۇندەلىكتى ءدارىنى عانا قاراعان, – دەيدى وبلىستىق دەنساۋلىق ساقتاۋ باسقارماسىنىڭ مەديتسينالىق كومەكتى ۇيىمداستىرۋ جانە ليتسەنزيالاۋ ءبولىمىنىڭ باسشىسى نينا وسپانوۆا.
ونىڭ ايتۋىنشا, مونيتورينگتىك توپ نەگىزگى قويماعا بارعان كەزدە «سق-فارماتسيا» جشس وكىلى وپەراتسيالىق قويماعا دارىلىك زاتتار تەك مەديتسينالىق ۇيىمداردىڭ سۇرانىسىنا سايكەس اكەلىنەتىنىن العا تارتقان. باتىس ءوڭىرى ءۇشىن دارىلىك زاتتار اقتوبە قالاسىنداعى قويمادا ساقتالادى. اتىراۋ وبلىسىنداعى فيليالدىڭ سۇرانىسىنا ساي دارىلەر ءار اپتانىڭ سارسەنبىسىندە اكەلىنەدى. مونيتورينگتىك توپ قويماداعى ءدارىنى وبلىستاعى مەديتسينالىق ۇيىمدارعا تاراتىپ, قويمانىڭ بوساعان كەزىنە تاپ كەلگەن-ءمىس.
– قورداعى ءدارى ماسەلەسى كوتەرىلگەندە دەنساۋلىق ساقتاۋ مينيسترلىگى جانە «سق-فارماتسيا» جشس باسشىلىعىمەن حابارلاسىپ, اتىراۋ وبلىسىنا تيەسىلى دارىلىك زاتتاردى وڭىردەگى قويماعا اكەلىپ قويۋ تۋرالى سويلەسكەن ەدىك. بىراق, ولار اتىراۋ وبلىسىنداعى ەمحانالار مەن قويمادا قاجەتتى دارىلىك زاتتاردىڭ جەتكىلىكتى ەكەنىن العا تارتىپ وتىر. ماسەلەن, 21 قازاندا «سق-فارماتسيا» جشس قويماسىنا 35,6 ملن تەڭگەنىڭ 80 ءتۇرلى ءدارىسى اكەلىندى, – دەيدى نينا وسپانوۆا.
وبلىستىق دەنساۋلىق ساقتاۋ باسقارماسىنىڭ مالىمەتىنە سۇيەنسەك, وبلىس اكىمىنىڭ تاپسىرماسىمەن, سونداي-اق دەمەۋشىلىك قولداۋمەن «ىڭكار» جشس ارقىلى 251 ملن تەڭگەنىڭ دارىلىك زاتتارى الىنىپتى. بۇلار اتىراۋ قالاسىنىڭ گەولوگ كەنتىندەگى ەمحانانىڭ قويماسىندا ساقتاۋعا قويىلىپتى. سونىمەن بىرگە «اتىراۋ» الەۋمەتتىك كاسىپكەرلىك كورپوراتسياسى» اق ارقىلى 500 ملن تەڭگەگە دارىلىك زاتتاردىڭ تومەندەمەيتىن تۇراقتاندىرۋ قورى جاساقتالدى. قازىر بولشەك ساۋدامەن اينالىساتىن ءدارىحانالار ءۇشىن ەكى-ءۇش ايلىق دارىلىك زاتتاردىڭ قورى «ىڭكار» جشس قويماسىندا ساقتاۋلى ەكەن.
اتىراۋ وبلىسى
